ខ្យល់ព្យុះដ៏សាហាវឈ្មោះសាន់ឌីSANDY កាលពីយប់ថ្ងៃទី២៩ តុលា បានបោកបក់ដល់រដ្ឋញូវចឺស៊ី ខណៈឆ្នេរសមុទ្រខាងកើតរបស់សហរដ្ឋអាមេរិករងការបោកបក់ដោយខ្យល់យ៉ាងខ្លាំងនិងមានភ្លៀងធ្លាក់ខ្លាំងបំផុត ។
យោងតាមម៉ាស៊ីនឃោសនាអាមេរិកថា ព្យុះសាន់ឌីធ្វើឱ្យស្ទះតំបន់មានប្រជាជនរស់នៅច្រើនបំផុតនោះហើយបង្កភាពជ្រួលច្របល់ ។ មនុស្សជាច្រើនពាន់គ្រួសារគ្មានអគ្គិសនីប្រើប្រាស់ចំណែកយុទ្ធនាការឃោសនាបោះឆ្នោតប្រធានាធិបតីត្រូវផ្អាក ។
ព្យុះសាន់ឌីបោកបក់ដល់ជិតក្រុងអាត្លង់ទីសស៊ីធី នាវេលាម៉ោង២០ម៉ោងក្នុងស្រុក ។ យោងតាមមជ្ឈមណ្ឌលត្រួតពិនិត្យខ្យល់ព្យុះអាមេរិកNHCថា ព្យុះនេះបានចុះកម្លាំងបន្តិចមកមានល្បឿនត្រឹម១៣០គីឡូម៉ែត្រក្នុង១ម៉ោងទល់នឹង១៥០គីឡូម៉ែត្រក្នុង១ម៉ោង នាពេលមុននេះក៏ប៉ុន្តែភ្នែករបស់ព្យុះអាចមានកម្លាំងខ្យល់ដល់៨០០គីឡូម៉ែត្រក្នុង១ម៉ោង ។ ភ្នែករបស់វាស្ថិតនៅចម្ងាយ១០គីឡូម៉ែត្រពីក្រុងអាត្លង់ទីសស៊ីធី។
ក្នុងសង្កថាមួយឯសេតវិមានក្រោយកិច្ចប្រជុំបន្ទាន់ផ្នែកគ្រប់គ្រងវិបត្តិលោកប្រធានាធិបតីបារ៉ាក់អូបាម៉ាមានប្រសាសន៍ថា អាទិភាពគឺធ្វើបែបណាជួយសង្គ្រោះជីវិតមនុស្ស ។ លោកបន្តថា លោកផ្អាកការឃោសនាបោះឆ្នោតនាពេលនេះហើយធ្វើប្រមុខមេបញ្ជាការទប់ទល់នឹងព្យុះនេះ ។ ចំណែកបេក្ខជនគណបក្សសាធារណរដ្ឋលោកមីត រ៉ូមនីវិញបានលុបចោលកិច្ចប្រជុំឃោសនាបោះឆ្នោតនានាដែលគ្រោងធ្វើចាប់ពីយប់ថ្ងៃទី២៩ តុលា ទៅដើម្បីជាសញ្ញានៃការគោរពចំពោះពលរដ្ឋអាមេរិកជាច្រើនលាននាក់ដែលកំពុងរងការគំរាមកំហែងដោយព្យុះដ៏កំណាចដែលឥទ្ធិពលរបស់វាអាចមានរយៈពេលច្រើនថ្ងៃ ។
នៅក្រុងអាត្លង់ទីសស៊ីធី កាស៊ីណូ សណ្ឋាគារ និងបារ ដែលក្នុង១ឆ្នាំៗទទួលភ្ញៀវជាង៣០លាននាក់បានត្រូវបិទទ្វារហើយបង្កើតទំនប់បាវខ្សាច់ការពារទឹកជំនន់ ។ ព្យុះនេះក៏ប៉ះពាល់ផងដែរដល់ផលិតកម្មអគ្គិសនីរបស់រដ្ឋដោយរេអាក់ទ័រនុយក្លេអ៊ែរ២ផលិតពាក់កណ្តាលនៃសេចក្តីត្រូវការអគ្គិសនីនៅញូវចឺស៊ីត្រូវរងការគំរាមកំហែងបិទមកពីទឹកជន់ឡើងខ្ពស់ ។ នៅក្រុងញូវយ៉កបណ្តាស្ពានកាត់ទន្លេEAST RIVER ក្នុងនោះមានស្ពានល្បីល្បាញBROOKLYN BRIDGE ត្រូវបិទចាប់តាំងពីថ្ងៃទី២៩ តុលា វេលាម៉ោង១៩ម៉ោងក្នុងស្រុក ។
ចំណែកពលរដ្ឋក្រុងញូវយ៉កជាច្រើនសិបពាន់គ្រួសារគ្មានអគ្គិសនីប្រើប្រាស់។ នៅភាគកណ្តាលសង្កាត់ម៉ាន់ ហាតាន់ ក្រុងញូវយ៉ក ដងស្ទូចមួយនៅកំពូលអគារកម្ពស់៩០ជាន់ដែលកំពុងកសាងត្រូវបាក់មួយផ្នែកព្រោះតែខ្យល់បោកបក់ខ្លាំង ។
យោងតាមការិយាល័យសិក្សាលើការគ្រប់គ្រងគ្រោះថ្នាក់EQECATថា ការខូចខាតដោយសារព្យុះសាន់ឌីនៅសហរដ្ឋអាមេរិកអាចមានដល់ពី១០ទៅ២០ពាន់លានដុល្លារ ។
កងឆ្មាំឆ្នេរសមុទ្រអាមេរិកប្រកាសកាលពីយប់ថ្ងៃទី២៩ តុលា ពីការលិចនាវាក្តោងHSM BOUNTY បណ្តាលឱ្យបាត់ខ្លួននាវិក២នាក់រួចសាកសពនាវិកម្នាក់ទើបត្រូវបានរកឃើញ ។ នាវានេះលិចនៅដែនសមុទ្ររដ្ឋការ៉ូលីនខាងជើងពេលព្យុះសាន់ឌីបោកបក់ ។ ក្រៅពីនាវិករងគ្រោះ២នាក់មនុស្ស១៤នាក់ទៀតជិះលើនាវានេះត្រូវបានជួយសង្គ្រោះ ។ ព្យុះសាន់ឌីញ៉ាំងឱ្យមានការលុបចោលជើងហោះហើររបស់យន្តហោះដល់ទៅ១០.០០០ជើងនៅភាគឦសានសហរដ្ឋអាមេរិកហើយផ្សារហ៊ុនអាមេរិកក៏បិទទ្វារដែរ ។
ព្យុះសាន់ឌីស្លាប់យ៉ាងតិច១៦នាក់នៅអាមេរិក
ព្យុះឈ្មោះ សាន់ឌី បានបោកបក់យ៉ាងខ្លាំង ហើយញុំាងឱ្យមានទឹកជំនន់ បណ្តាលឱ្យមនុស្សស្លាប់យ៉ាងតិច១៦នាក់នៅសហរដ្ឋអាមេរិក និងម្នាក់នៅកាណាដា ។
មនុស្សជាច្រើនលានគ្រួសារគ្មានអគ្គិសនីប្រើប្រាស់ ។ ទីក្រុងញូវយ៉កផ្នែកមួយធំនៃទីក្រុងនោះដាច់ភ្លើងងងឹត ។ ព្យុះសាន់ឌីជាព្យុះសាហាវប្រចាំសតវត្ស បណ្តាលឱ្យមនុស្សស្លាប់៦៧នាក់ រួចហើយក្នុងតំបន់ការ៉ាអីុប ។ កាសែតវ៉ាស៊ីនតោនប៉ុស្តិ៍រាយការណ៍ថា ព្យុះនោះបណ្តាលឱ្យមនុស្សជិត៦លាននាក់គ្មានភ្លើងប្រើ ។
ប្រធានាធិបតីអាមេរិកបានចេញការប្រកាសអាសន្នក្នុងរដ្ឋ៨ ។ លោកបានលុបចោលការធ្វើដំណើរដែលគ្រោងទុកនាថ្ងៃទី២៩ និង៣០តុលា ដើម្បីទៅត្រួតពិនិត្យប្រតិបត្តិការណ៍ជួយសង្គ្រោះពីសេតវិមាន ។
ក្រុងញូវយ៉កមានទឹកជំនន់ខ្លាំង
ក្រុងញូវយ៉កជួបគ្រោះអាសន្នខ្លាំងបំផុតកាលពីយប់ថ្ងៃទី២៩ មក៣០ តុលា ពេលព្យុះឈ្មោះសាន់ឌី SANDY វាយប្រហារ ។ នៅក្នុងរដ្ឋញូវយ៉កមានមនុស្សស្លាប់៥នាក់ដោយសារព្យុះនេះ ។
ទឹកបានឡើងយ៉ាងខ្ពស់ដែលជោរជន់មកពីជ្រុងទាំង៣នៃសង្កាត់ម៉ាន់ហាតាន់ ដែលពាក់កណ្តាលនៃសង្កាត់នោះត្រូវដាច់ភ្លើងងងឹតសូន្យសុង ។ នាភាគខាងត្បូងក្រុងញូវយ៉កគឺក្នុងសង្កាត់BATTERY PARK ទឹកសមុទ្របានឡើងរហូតដល់កម្ពស់៤,១៥ម៉ែត្រ ដែលពុំធ្លាប់ជួបប្រទះទាល់តែសោះចាប់តាំងពីឆ្នាំ១៩៦០មក ។ ទឹកបានជន់ឡើងលិចផ្លូវរហូតការដ្ឋានGROUND ZERO ជាកន្លែងរងការវាយប្រហារភេរវកម្មថ្ងៃទី១១ កញ្ញា ។
នៅភាគខាងកើតក្រុងញូវយ៉កព្រែកEAST RIVER បានជោរជន់រហូតដល់លិចមហាវិថីលេខ២ ហើយទឹកបានហូរចូលលិចផ្លូវរូងក្រោមដីរវាងម៉ាន់ហាតាន់ និងBROOKLYN ។ ផ្លូវអិុចប្រេសFDR ក៏ត្រូវទឹកជន់លិចដែរ ។ នៅជិតឧទ្យានកណ្តាលដងស្ទូចមួយនៅឯការដ្ឋានសាងសង់អគារមានកម្ពស់៩០ជាន់ត្រូវបាក់ធ្លាក់មួយផ្នែក ។ ទឹកជំនន់ក៏កើតមានដែរក្នុងសង្កាត់BROOKLYN និងសង្កាត់BRONX ៕
ចែករំលែកព័តមាននេះ