រាជធានីភ្នំពេញ ៖ អតីតមន្ត្រីជាន់ខ្ពស់គណបក្សសង្គ្រោះជាតិចំនួនពីរូប បានអះអាងថាលទ្ធិប្រជាធិតេយ្យនៅប្រទេសកម្ពុជាបានបាត់បង់ទៅកាលពីថ្ងៃទី១៦ វិច្ឆិកា ដោយសារតុលាការកំពូលបានរំលាយគណបក្សសង្គ្រោះជាតិ។
តែការអះអាងនេះ ត្រូវបានមន្ត្រីជាន់ខ្ពស់គណបក្សកាន់អំណាចថា មិនពិតនោះទេ ផ្ទុយទៅវិញលទ្ធិប្រជាធិបតេយ្យនៅកម្ពុជានៅតែរឹងមាំ ក្រោយបក្សប្រឆាំងត្រូវបានរំលាយដោយតុលាការកំពូល ។
ទាំងលោកស្រី មូរ សុខហួរ អតីតអនុប្រធានគណបក្សសង្គ្រោះជាតិ និងលោក យ៉ែម ប៉ុញ្ញាឬទ្ធិ អតីតអ្នកនាំពាក្យគណបក្សសង្គ្រោះជាតិបានលើកឡើងក្នុងពេលកំពុងធ្វើបាតុកម្មនៅប្រទេសបារាំង ហើយបានបង្ហោះវីដេអូលើបណ្តាញសង្គមនៅថ្ងៃទី២១ វិច្ឆិកា បានបញ្ជាក់ថា ៖ «យើងបានអរគុណដល់ប្រទេសទាំងឡាយណា ដែលបានថ្កោលទោសដល់រាជរដ្ឋាភិបាលកម្ពុជា ដែលបានធ្វើឲ្យលទ្ធិប្រជាធិបតេយ្យនៅប្រទេសកម្ពុជា បានស្លាប់នៅថ្ងៃទី១៦ វិច្ឆិកា ឆ្នាំ២០១៧»។ អ្នកទាំងពីរបន្តថា ពួកគេនៅតែជាអ្នកតំណាងរាស្ត្រស្របច្បាប់ដដែល នឹងបំរើប្រជាពលរដ្ឋខ្មែរដដែល ។
ជាមួយគ្នានោះដែរ លោក យ៉ែម ប៉ុញ្ញាឬទ្ធិ បានបញ្ជាក់ថា៖ «ការធ្វើបាតុកម្មនេះ គឺធ្វើឲ្យខ្មែរនឹករលឹកដល់កិច្ចព្រមព្រៀងសន្តិភាព ថ្ងៃទី២៣ តុលា ឆ្នាំ១៩៩១ ទាំងក្មេង ចាស់ ប្រុស ស្រី ។ សន្តិសញ្ញាទីក្រុងប៉ារីស គេនិយាយពីសន្តិភាព ផ្សះផ្សាយជាតិ មិនមែនបំបិទសិទ្ធិខ្មែរពាក់កណ្តាលប្រទេសនោះទេ »។
ទាក់ទិននឹងការលើកឡើងរបស់មន្ត្រីជាន់ខ្ពស់គណបក្សប្រឆាំងនេះ ត្រូវបានអ្នកនាំពាក្យគណបក្សកាន់អំណាច លោក សុខ ឥសាន លើកឡើងថា នៅពេលមានបក្សប្រឆាំងធ្វើសកម្មភាព បក្សមួយនេះមិនបានអនុវត្តត្រឹមត្រូវតាមតួនាទីរបស់ខ្លួនជាគណបក្សនយោបាយទេ បែរជាដើរតាមការគូសវាស បញ្ជារបស់បរទេសប្រព្រឹត្តតែអំពើរំលោភច្បាប់ រំលោភលទ្ធិប្រជាធិបតេយ្យ ដល់មានបញ្ហាចំពោះមុខច្បាប់ បែរជាចោទរាជរដ្ឋាភិបាល និងគណបក្សកាន់អំណាចថា ធ្វើទុក្ខបុកម្នេញខ្លួនទៅវិញ ចាត់ទុកខ្លួនឯងដែលល្មើសច្បាប់ជាជនរងគ្រោះ ទទួលការគំរាមកំហែងពីបក្សកាន់អំណាចទៅវិញ ៕
ចែករំលែកព័តមាននេះ