រាជធានីភ្នំពេញ ៖ ដើម្បីក្លាយខ្លួនជាកីឡាការិនីឆ្នើមរបស់ជាតិមានតែការព្យាយាម
តស៊ូជម្នះគ្រប់ការលំបាកទាំងអស់ក្នុងអាជីពរបស់ខ្លួន ទើបយើងទទួលជោគជ័យ ។ នេះជាសម្ដីពិតរបស់ម្ចាស់មេដាយមាសពិភពលោក៣ជំនាន់គឺអ្នកស្រីកែ ឡេង ដែលត្រូវបានចាត់ទុកជាវីរកីឡាការិនីឬរាជិនីកីឡាប៉េតង់ដ៏ឆ្នើមរបស់កម្ពុជា ។ ជួបអ្នកយកព័ត៌មានកោះសន្តិភាព អ្នកស្រីកែ ឡេង បានរៀបរាប់ពីប្រវត្តិក៏ដូចជាជំហានក្លាយជាកីឡាការិនីឆ្នើមរបស់ជាតិជូនប្រិយមិត្តអ្នកអានឱ្យបានជ្រាបដូចខាងក្រោម ។
អ្នកស្រីកែ ឡេង អាយុ៥៥ឆ្នាំ មានស្រុកកំណើតនៅខេត្តកំពង់ឆ្នាំង និងមានស្វាមីជាមន្ត្រីរាជការ ។ តាំងពីចាប់ដៃគ្នាជាប្ដីប្រពន្ធ អ្នកស្រីមានកូនប្រុស-ស្រី២នាក់ កូនប្រុសច្បងអាយុ២៧ឆ្នាំ និងកូនស្រីប្អូនអាយុ២១ឆ្នាំដែលពួកគេសព្វថ្ងៃក៏ជាកីឡាករ-កីឡាការិនីប៉េតង់ដែរ ។ សព្វថ្ងៃក្រុមគ្រួសារអ្នកស្រីរស់នៅក្នុងខណ្ឌសែនសុខ រាជធានីភ្នំពេញ។
ដំបូងឡើយអ្នកស្រី កែ ឡេង គ្រាន់តែជាអតីតកីឡាការិនីបាល់ទះមួយរូបនៅក្នុងសមាគមកីឡាក្រសួងការពារជាតិប៉ុណ្ណោះ ប៉ុន្តែក្រោយមកនៅឆ្នាំ១៩៩៣អ្នកស្រីបានលាឈប់ពីអាជីពកីឡាបាល់ទះមកចាប់យកអាជីពកីឡាប៉េតង់នៅឆ្នាំ១៩៩៦ ។ ចាប់តាំងពីចូលលេងកីឡាប៉េតង់មក កេរ្តិ៍ឈ្មោះអ្នកស្រីចាប់ផ្ដើមល្បីជាបន្តបន្ទាប់តាមរយៈការចូលរួមប្រកួតទាំងថ្នាក់ជាតិ និងអន្តរជាតិហើយទទួលបានមេដាយ និងពានជារៀងរាល់លើក ។ កេរ្តិ៍ឈ្មោះអ្នកស្រីកាន់តែល្បីល្បាញខ្លាំងទាំងក្នុងប្រទេស និងក្រៅប្រទេសនៅពេលអ្នកស្រីដណ្ដើមបានមេដាយមាសលំដាប់ពិភពលោកជាបន្តបន្ទាប់ចំនួន៣លើក លើកទី១ឆ្នាំ២០១៣នៅទីក្រុងម៉ុងតូកង់ ប្រទេសបារាំង លើកទី២ឆ្នាំ២០១៥នៅប្រទសថៃ និងលើកទី៣ឆ្នាំ២០១៧នៅប្រទេសចិន ។
អ្នកស្រីកែ ឡេង បានរៀបរាប់ពីជំហានក្លាយជាកីឡាការិនីប៉េតង់ឆ្នើមរបស់ជាតិរហូត
ដណ្ដើមបានមេដាយមាសពីព្រឹត្តិការណ៍ប្រកួតជ្រើសរើសជើងឯកពិភពលោកថា ដំបូងផ្ដើមចេញពីការយកចិត្តទុកដាក់ក្នុងការហ្វឹកហាត់ត្រៀមទាំងកម្លាំងកាយនិងកម្លាំងចិត្ត មុនពេលចេញទៅប្រកួតម្ដងៗ ។ ជាពិសេសត្រូវស្វែងយល់ពីអាកាសធាតុនៅលើទីលានប្រកួតឱ្យបានច្បាស់លាស់ជាមុន ។ ជាក់ស្ដែងមុនពេលចូលរួមប្រកួតជើងឯកពិភពលោកនៅប្រទេសចិនក្នុងឆ្នាំ២០១៧កន្លងទៅនេះ អ្នកស្រីបានសិក្សាយ៉ាងលម្អិតជាមួយលោកគ្រូបង្ហាត់ និងអ្នកដឹកនាំថាតើត្រូវរៀបចំខ្លួនបែបណាដើម្បីជម្នះរាល់ឧបសគ្គឱ្យបាន ។ អ្នកស្រីថា គ្រប់ការប្រកួតនៅបណ្ដាប្រទេសនីមួយៗគឺមិនដូចគ្នាឡើយ បូករួមទាំងអាកាសធាតុឡើងទៅ ។
ដូច្នេះបើសិនជាយើងមិនបានសិក្សាលម្អិតពីភូមិសាស្ត្រនៅទីនោះឱ្យច្បាស់លាស់ទេនឹង
មិនអាចទទួលជោគជ័យបានឡើយ ។ ជាងនេះ ការតាំងចិត្តប្រកបដោយឆន្ទៈខ្ពស់ ការ
ប្រមូលអារម្មណ៍ឱ្យបានល្អ កុំភ័យតក់ស្លុត ទោះបីជួបគូប្រកួតខ្លាំងៗយ៉ាងណាក៏៏ដោយ
គួបផ្សំនឹងការមិនមើលស្រាលលើគូប្រកួតផងនោះគឺជាបច្ច័យធ្វើឱ្យយើងទទួលជោគជ័យផងដែរ ។
អ្នកស្រី កែ ឡេង ប្រាប់ថា បច្ចុប្បន្ន អ្នកស្រីកំពុងតែស្វែងរកអ្នកដែលមានទេពកោសល្យថ្វីដៃល្អខាងកីឡាប៉េតង់នេះ ដើម្បីជ្រើសរើសយកមកបណ្ដុះបណ្ដាលឱ្យក្លាយជាកីឡាការិនីឆ្នើមជំនួសអ្នកស្រីទៅថ្ងៃក្រោយ ។ ប៉ុន្តែមកដល់ថ្ងៃនេះនៅមិនទាន់ឃើញប្អូនៗណាម្នាក់មានចំណុចលេចធ្លោនៅឡើយ ដោយសារពួកគាត់នៅក្មេងមានការលេងសើចច្រើន មិនសូវយកចិត្តទុកដាក់ក្នុងការហ្វឹក ។ ទោះបីយ៉ាងណា អ្នកស្រីកំពុងតែពិនិត្យមើលលើការប្រកួតជាក់ស្ដែងរបស់ពួកគេនៅគ្រប់ព្រឹត្តិការណ៍ប្រកួតនានា ដូចជាតាមរយៈការប្រកួតជ្រើសរើសជើងឯកប្រចាំឆ្នាំ២០១៧នេះតែម្ដង ។ សម្រាប់ការប្រកួតជ្រើសរើសជើងឯកឆ្នាំនេះ អ្នកស្រីមិនចូលរួមប្រកួតទេ គឺទុកឱ្យកូនសិស្សប្រកួត ដើម្បីយកពេលវេលានេះដើរមើលពួកគេ តើអ្នកណាមានសមត្ថភាពអាចយកទៅបណ្ដុះបណ្ដាលឱ្យក្លាយជាកីឡាការិនីឆ្នើមទៅថ្ងៃអនាគត ៕
ចែករំលែកព័តមាននេះ