ខេត្តប៉ៃលិន ៖ ហួសចិត្តនឹងបុរសម្នាក់ ដោយសារប្រចណ្ឌប្រពន្ធដាក់ក្មេងប្រុសៗ នៅក្នុងភូមិ ខណៈ ឃើញប្រពន្ធអង្គុយនិយាយជាមួយក្មេងប្រុស-ស្រីក៏ប្រចណ្ឌ ។ ហេតុការណ៍នេះ បានកើតឡើងកាលពីវេលាម៉ោង៥ និង៣៥នាទីល្ងាច ថ្ងៃទី២០ ខែវិច្ឆិកាឆ្នាំ២០១៧ ស្ថិតនៅក្នុងផ្ទះជនរងគ្រោះក្នុងភូមិបហ៊ុយ សង្កាត់បយ៉ាខា ក្រុងប៉ៃលិន ។
បុរសប៉ុនប៉ងសម្លាប់ខ្លួនឈ្មោះ នៅ វិត អាយុ២៩ឆ្នាំ មុខរបរកម្មករ ប្រពន្ធឈ្មោះ ស្រី មុំ អាយុ២៧ឆ្នាំ មុខរបរកម្មករ ទាំងពីរនាក់រស់នៅភូមិ សង្កាត់ខាងលើ ។
បើតាមសំដីបុរសដែលផឹកថ្នាំពុលឲ្យដឹងថា នៅមុនពេលកើតហេតុ រូបគាត់បានមកពីធ្វើការជាកម្មករសំណង់ លុះពេលមកដល់ផ្ទះមួយសន្ទុះក៏ក្រោកដើរទៅលេងផ្ទះមិត្តភក្តិនៅចុងភូមិដល់ពេលត្រឡប់មកផ្ទះវិញស្រាប់តែឃើញប្រពន្ធរបស់ខ្លួនអង្គុយនិយាយលេងជាមួយក្មេងៗ ក្នុងភូមិ ក៏ស្ដីបន្ទោសឱ្យប្រពន្ធថា មិនចេះដាំបាយ ហើយពេលនោះស្រាប់តែគាត់ឈ្លោះពាក្យសំដីគ្នា រួចក៏សម្រេចចិត្តយកថ្នាំពុលប្រភេទទឹកខៀវយកមកផឹកអស់២កូនកែវតូចប៉ង់សម្លាប់ខ្លួន ។
ក្រោយពេលផឹករួចក៏ក្អួតចង្អោរនៅក្នុងផ្ទះសន្លប់បាត់ស្មាតី ហើយក្រោយមកប្រពន្ធដើរចូលទៅមើលឃើញប្ដីរបស់ខ្លួនដេកសន្លប់ក៏ស្រែកឲ្យអ្នកភូមិជួយដឹកយកទៅសង្គ្រោះនៅមន្ទីរពេទ្យ ។
លោកគ្រូពេទ្យបានបង្ហើបឲ្យដឹងថា អ្នកដែលផឹកថ្នាំពុលទឹកខៀវមានសង្ឃឹមតិចតួចណាស់ បើទោះបីជាគ្រូពេទ្យខំប្រឹងលាងក្រពះជម្រះជាតិពុលយ៉ាងណា ក៏រស់មិនបានយូរដែរ ព្រោះជាតិថ្នាំពុល បានចូលទៅកាត់ផ្តាច់ក្រពះពោះវៀនអស់រលីងទៅហើយ យ៉ាងយូរប្រហែលជារស់បាន រយ:ពេល១អាទិត្យប៉ុណ្ណោះ ព្រោះជាថ្នាំពុលលេខ១នៅប្រទេសថៃ គ្មានថ្នាំសន្សាបនោះឡើយ ៕
ចែករំលែកព័តមាននេះ