រាជធានីភ្នំពេញ៖ សម្តេចតេជោ ហ៊ុន សែន នាយករដ្ឋមន្ត្រីកម្ពុជា នៅព្រឹកថ្ងៃទី ២២ វិច្ឆិកា នេះបានប្រកាសថា រាជរដ្ឋាភិបាលនឹងប្រារព្ធធ្វើពិធីបុណ្យបួងសួងសុំសេចក្តីសុខសន្តិភាពដ៏ធំមួយមិនធ្លាប់មានពីមុនមករយៈពេល២ថ្ងៃក្នុងខែធ្នូ នៅអង្គរវត្ត ខេត្តសៀមរាប ដោយមានការនិមន្តព្រះសង្ឃរាប់បាតប្រមាណជា ៧ ពាន់អង្គ។
សម្តេចតេជោ មានប្រសាសន៍ថា ពិធីនេះនឹងប្រព្រឹត្តទៅចាប់ពីថ្ងៃទី ២-៣ ធ្នូ ២០១៧ ខាងមុខនេះ គឺ «រាជរដ្ឋាភិបាលនឹងប្រារព្ធពិធីបុណ្យបួងសួងសុំសេចក្តីសុខដ៏ធំមួយនៅអង្គរវត្ត ដែលនឹងមានការនិមន្តព្រះសង្ឃរាប់បាត្រ ៥,០០០ ទៅ ៧,០០០អង្គ ជាមួយនឹងកម្មវិធីសាសនាមួយចំនួនទៀត។ ពិធីនេះនឹងផ្សាយផ្ទាល់ (Live) តាមទូរទស្សន៍ និងតាម Facebook ខ្ញុំ»។
សម្តេចតេជោ ហ៊ុន សែន បញ្ជាក់ថា៖ «កម្ពុជាយើងមានសុខសន្តិភាព និងស្ថេរភាព នយោបាយមកទល់សព្វថ្ងៃនេះ ទើបអាចធ្វើអោយយើងមានឱកាសកសាងប្រទេស និងប្រារព្ធពិធីបុណ្យជាតិធំៗដូចនេះបាន។ ខ្ញុំសូមអំពាវនាវ និងអញ្ជើញបងប្អូនជនរួមជាតិទូទាំងប្រទេស រួមទាំងទេសចរជាតិ និងអន្តរជាតិចូលរួមនៅក្នុងពិធីបួងសួងសុំសុខសន្តិភាពដ៏ធំខាងមុខនេះនៅអង្គរវត្ត»។
សូមបញ្ជាក់ថា ពិធីបួងសួងសុំសេចក្តីសុខនេះ អាចចាត់ទុកថា ជាពិធីដ៏ធំមួយមិនធ្លាប់មានពីមុនមកនៅកម្ពុជា ខណៈដែលគណបក្សសង្គ្រោះជាតិក៏ត្រូវបានរំលាយដោយអំណាចសាលដីការបស់តុលាការកំពូលកាលពីថ្ងៃទី១៦ វិច្ឆិកា ឆ្នាំ២០១៧នេះ៕
ចែករំលែកព័តមាននេះ