ទីក្រុងឡុងដ៍ ៖ រថយន្តក្រុង២ជាន់ ពណ៌ក្រហម របស់ទីក្រុងឡុងដ៍ នឹងចាប់ផ្តើមប្រើប្រាស់ជីវឥន្ធនៈ ដែលមួយផ្នែកចម្រាញ់ចេញពីកាកកាហ្វេ នាពេលឆាប់ៗនេះ ។ ជីវឥន្ធនៈនេះនឹងផ្គត់ផ្គង់ដោយក្រុមហ៊ុន…
ទីក្រុងឡុងដ៍ ៖ រថយន្តក្រុង២ជាន់ ពណ៌ក្រហម របស់ទីក្រុងឡុងដ៍ នឹងចាប់ផ្តើមប្រើប្រាស់ជីវឥន្ធនៈ ដែលមួយផ្នែកចម្រាញ់ចេញពីកាកកាហ្វេ នាពេលឆាប់ៗនេះ ។ ជីវឥន្ធនៈនេះនឹងផ្គត់ផ្គង់ដោយក្រុមហ៊ុន Bio-bean Ltd សហការជាមួយក្រុមហ៊ុន Royal Dutch Shell Plc ផងដែរ ។ ពួកគេនឹងផលិតជីវឥន្ធនៈប្រមាណ៦ពាន់លីត្រក្នុង១ឆ្នាំ ។
ដោយសារតែមានសម្ពាធពីសាធារណជន ដែលប្រឆាំងនឹងការប្រើប្រាស់អាហារធ្វើជាសាំង ក្រុមហ៊ុនជាច្រើនបានងាកមកប្រើជីវឥន្ធនៈផលិតពីកាកសំណល់ដូចជា ប្រេងឆាប្រើប្រាស់រួច និងរុក្ខជាតិមិនទាន់ទទួលទានបានជាដើម។ ដំណាំមួយចំនួនដូចជា ពោត និងអំពៅ គឺអាចប្រើប្រាស់មកផលិតជាអេតាណុលសម្រាប់ម៉ាស៊ីន ។
ក្រុមហ៊ុន Bio-bean បានសហការជាមួយហាងកាហ្វេរាប់ពាន់ហាងនៅចក្រភពអង់គ្លេស រួមមាន Costa Coffee Ltd និង Caffe Nero ដើម្បីប្រមូលកាកកាហ្វេដែលប្រើប្រាស់រួច ។
លោក Arthur Kay ស្ថាបនិកក្រុមហ៊ុន Bio-bean និយាយថា ចក្រភពអង់គ្លេសមានកាកកាហ្វេប្រមាណ៥០ម៉ឺនតោនជារៀងរាល់ឆ្នាំ ។
បន្ទាប់មក កាកកាហ្វេទាំងនេះនឹងផលិតជាជីវឥន្ធនៈក្នុងរោងចក្ររបស់ក្រុមហ៊ុន និងលាយជាមួយសាំងធម្មតាប្រមាណ២០% ។ គេនឹងដឹកជញ្ជូនវាទៅកាន់កន្លែងស្តុកទុកសម្រាប់រថយន្តក្រុងទាំងនោះ ។
គួរបញ្ជាក់ថា ក្រុមហ៊ុន Bio-bean បានបង្កើតឡើងក្នុងឆ្នាំ២០១៣ និងទទួលបានជំនួយពីរដ្ឋាភិបាលអង់គ្លេស, ក្រុមហ៊ុន Shell និងវិនិយោគិនឯកជនដទៃ ។ ក្រុមហ៊ុនមានផែនការពង្រីកនៅអង់គ្លេស រួចឆ្លងទៅប្រទេសដទៃក្នុងទ្វីបអឺរ៉ុប និងទៅកាន់សហរដ្ឋអាមេរិកទៀតផង ។
លោក Kay និយាយថា ៖« យើងកំពុងតែស្វែងរកកន្លែងដែលមានមនុស្សទទួលទានកាហ្វេច្រើន ។ ផែនការពង្រីកដំបូងរបស់យើង គឺទៅកន្លែងមានរោងចក្រកាហ្វេ » ៕
ចែករំលែកព័តមាននេះ