រាជធានីភ្នំពេញ ៖ មុខរបរលក់សាំងដបនៅតាមចិញ្ចើមផ្លូវ ក៏ដូចជាមុខរបរបន្ទាប់បន្សំមួយចំនួនទៀត កំពុងតែជួបការលំបាកយ៉ាងខ្លាំង ក្នុងការប្រកួតប្រជែងដណ្ដើមទីផ្សារ ។
លោក ឌុំ ហ៊ាង ជាអ្នកប្រកបរបរលក់សាំងដប នៅមុខវត្តស្ទឹងមានជ័យ បានរៀបរាប់ថា មុខរបរលក់សាំងដបនេះកំពុងជួបការលំបាក ខណៈស្ថានីយ និងដេប៉ូប្រេងបច្ចុប្បន្ន មានការកើនឡើងជាបន្ដបន្ទាប់ ។
លោកបន្ដថា ៖« សព្វថ្ងៃនេះ ខ្ញុំលក់បានពី៣០ទៅ៤០លីត្រនៅថ្ងៃសៅរ៍-អាទិត្យ និងថ្ងៃបុណ្យទាន។ ចំណែកថ្ងៃធម្មតា បានត្រឹមតែពី១៥ទៅ២០លីត្រប៉ុណ្ណោះ ដោយលក់ក្នុងតម្លៃពី៣.៥០០ទៅ៣.៧០០រៀលក្នុង១លីត្រទៅតាមតម្លៃឡើងចុះ » ។
ក្រៅពីលក់សាំង លោកក៏មានលក់គ្រឿងភេសជ្ជៈ និងសេវាប៉ះកង់ផងដែរ ដោយក្នុង១ថ្ងៃ លោកអាចរកចំណូលបានជាមធ្យមពី៣ម៉ឺនទៅ៤ម៉ឺនរៀលសម្រាប់ដោះស្រាយជីវភាពគ្រួសារ និងផ្គត់ផ្គង់ការរៀនសូត្ររបស់កូនៗ និងក្មួយៗកំព្រានៅក្នុងបន្ទុកគ្រួសារ ។
លោក ឌុំ ហ៊ាង បានបន្តទៀតថា មុខរបរលក់សាំងដបរាល់ថ្ងៃនេះ អាចរកប្រាក់បានត្រឹមតែយកទៅចិញ្ចឹមកូនចៅ និងបង់ថ្លៃផ្ទះជួលចំនួន៦០ដុល្លារក្នុង១ខែ ព្រមទាំងបង់ថ្លៃទឹក និងភ្លើងប៉ុណ្ណោះ ដោយមិនបានសល់ជាដុំកំភួនអ្វីឡើយ ព្រោះជាមុខរបរតូចតាច ហើយសព្វថ្ងៃ កាន់តែលំបាកខ្លាំងឡើង ព្រោះក្រុមហ៊ុនបង្កើតស្ថានីយ និងដេប៉ូប្រេងឥន្ធនៈកាន់តែច្រើនឡើងៗ។ មិនត្រឹមតែប៉ុណ្ណោះ ថែមទាំងមានការរំខានពីអាជ្ញាធរមូលដ្ឋានខ្លះៗតែងតែដេញពួកគាត់ នៅពេលផ្លូវកកស្ទះចរាចរណ៍ម្តងៗផងដែរ ។
មុខរបរមួយនេះ នៅថ្ងៃអនាគត អាចនឹងមានវាសនាដូចរបរបម្រើសេវាទូរស័ព្ទសាធារណៈ ឬហាងបម្រើសេវាអ៊ីនធើរណេតផងដែរ ដោយសារតែការរីកចម្រើននៃបច្ចេកវិទ្យា និងការអភិវឌ្ឍប្រទេសជាតិ ដែលធ្វើឲ្យមុខរបរខ្លះត្រូវបាត់បង់ និងជំនួសដោយក្រុមហ៊ុនផ្ដល់សេវាកម្ម និងមានផលិតផលប្រកបដោយស្ដង់ដា និងគុណភាពខ្ពស់ ៕
ចែករំលែកព័តមាននេះ