ខេត្តបន្ទាយមានជ័យ ៖ ជនសង្ស័យប្រុសស្រី២នាក់ ជាជនជាតិវៀតណាម ត្រូវបានកម្លាំងកងរាជអាវុធហត្ថឃាត់ខ្លួន ពីបទបង្ខំឱ្យក្មេងប្រុសស្រី១១នាក់ឱ្យដើរសុំទាន នៅវេលាម៉ោង៧ព្រឹកថ្ងៃទី២១ វិច្ឆិកា នៅភូមិក្បាលស្ពានទី១ សង្កាត់ប៉ោយប៉ែត…
ខេត្តបន្ទាយមានជ័យ ៖ ជនសង្ស័យប្រុសស្រី២នាក់ ជាជនជាតិវៀតណាម ត្រូវបានកម្លាំងកងរាជអាវុធហត្ថឃាត់ខ្លួន ពីបទបង្ខំឱ្យក្មេងប្រុសស្រី១១នាក់ឱ្យដើរសុំទាន នៅវេលាម៉ោង៧ព្រឹកថ្ងៃទី២១ វិច្ឆិកា នៅភូមិក្បាលស្ពានទី១ សង្កាត់ប៉ោយប៉ែត ក្រុងប៉ោយប៉ែត ។
លោកវរសេនីយ៍ទោ ព្រហ្ម ថេង ប្រធានមន្ទីរយុត្តិធម៌នៃបញ្ជាការដ្ឋានកងរាជអាវុធហត្ថខេត្តបន្ទាយមានជ័យបានប្រាប់ថា ជនសង្ស័យប្រុសស្រីដែលត្រូវឃាត់ខ្លួន ជាជនជាតិវៀតណាមឈ្មោះខ្មែរមាន១-ឈ្មោះ ចូច គង់ ភេទស្រី អាយុ៤៤ឆ្នាំ ២-ឈ្មោះ ឈៀង វណ្ណារ៉ា ភេទប្រុស អាយុ២១ឆ្នាំ ស្នាក់នៅភូមិសាមគ្គីមានជ័យ សង្កាត់ប៉ោយប៉ែត ក្រុងប៉ោយប៉ែត ។
លោកបានបញ្ជាក់ថា ក្រោយពីទទួលព័ត៌មានថាមានកុមារច្រើននាក់ត្រូវបានគេបង្ខំឱ្យដើរសុំទាននៅតំបន់ប៉ោយប៉ែត កម្លាំងកងរាជអាវុធហត្ថក្រុងប៉ោយប៉ែត រួមជាមួយកម្លាំងកងរាជអាវុធហត្ថខេត្តបានចុះស្រាវជ្រាវកំណត់មុខសញ្ញា ឃាត់ខ្លួនប្រុសស្រីទាំង២នាក់និងរំដោះកុមារងគ្រោះចំនួន១១នាក់ ក្នុងនោះមានកុមារីម្នាក់ត្រូវបានបញ្ជូនមកទី បញ្ជាការកងរាជអាវុធហត្ថខេត្ត ។ កុមារទាំងនេះជាកូនខ្មែរទាំងអស់ ដែលមានជនជាតិវៀតណាម២នាក់ជាមេខ្លោង ។
បើតាមចម្លើយកុមាររងគ្រោះបានឱ្យដឹង គឺជនសង្ស័យ២នាក់នេះ បានបង្ខំឱ្យពួកគេបំបែកគ្នាដើរសុំទាននៅផ្សាររុងក្លឿប្រទេសថៃ និងច្រកទ្វារអន្តរជាតិប៉ោយប៉ែត នៅបរិវេណកាស៊ីណូ ក្នុង១ថ្ងៃម្នាក់កំណត់ឱ្យបានលុយ៥ម៉ឺនរៀល ទើបឱ្យហូបបាយ បើមិនបានតាមកំណត់ត្រូវបង្អត់បាយហើយ បើរកលុយបានគេឱ្យទិញកាវហិតជាប្រចាំ ។ ឯការដើរដេកគឺនៅតាមសំយាបផ្ទះអ្នកស្រុក ឯមេ២នាក់នោះជួលផ្ទះគេនៅ ។
លោកបានបញ្ជាក់ថា ដោយយោងតាមចម្លើយសារភាព ប្រុសស្រីជាជនជាតិវៀតណាម២នាក់នេះ គឺពួកគេបានឱ្យក្មេងប្រុសស្រីទាំងនេះដើរសុំទានជាច្រើនខែមកហើយ ដែលពួកក្មេងទាំងនេះខ្លះមានឪពុកម្តាយក្រីក្រស៊ីឈ្នួលរុញរទេះ និងខ្លះជាក្មេងកំព្រា អនាថាដែលរស់នៅក្រុងប៉ោយប៉ែត ។
ក្រោយពេលសាកសួរហើយជនទាំង២ ត្រូវបានកសាងសំណុំរឿងបញ្ជូនទៅសាលា ដំបូងខេត្តបន្ទាយមានជ័យ ចាត់ការតាមច្បាប់ ចំណែកជនរងគ្រោះដែលត្រូវរំដោះ ត្រូវបានប្រគល់ជូនមណ្ឌលអប់រំកែប្រែភ្នំបាក់ដើម្បីបីបាច់ថែរក្សា ៕
ចែករំលែកព័តមាននេះ