រាជធានីភ្នំពេញ ៖ គណបក្សដែលមិនបានសម្លេងឆ្នោតមួយ គឺលោក ក្រវាញ ដារ៉ន ប្រធានគណបក្សខ្មែរឈប់ក្រ បានបដិសេធមិនទទួលយកអាសន្នៈដែលនឹងត្រូវបែងចែកដោយគណៈកម្មាធិការជាតិរៀបចំការបោះឆ្នោត (គ.ជ.ប) នោះទេ នាំឱ្យចំនួនគណបក្សដែលបដិសេធមិនយកអាសន្នៈរបស់គណបក្សសង្គ្រោះជាតិកើនឡើងដល់ទៅ ៣ គណបក្ស។
លោក ក្រវាញ ដារ៉ន ប្រកាសបដិសេធបែបនេះ បន្ទាប់ពី គ.ជ.ប បានជូនដំណឹងកាលពីថ្ងៃទី២១ វិច្ឆិកា ជូនគណបក្សនយោបាយចំនួន ៦ បញ្ជួនឯកសារទៅ គ.ជ.ប សម្រាប់ការអនុវត្តបែងចែងអាសន្នៈ របស់គណបក្សសង្គ្រោះជាតិដែលត្រូវបានរំលាយកាលពីថ្ងៃទី១៦ ខែវិច្ឆិកា ឆ្នាំ២០១៧។
លោកប្រធានគណបក្សខ្មែរឈប់ក្រ បានលើកឡើងថា៖ «អាសន្នៈនេះមិនបានមកពីម្ចាស់ឆ្នោតដែលបានបោះឆ្នោតឲ្យគណបក្សខ្មែរឈប់ក្រទេ។ ខ្ញុំ ក្រវាញ ដារ៉ន ប្រធានគណបក្សខ្មែរឈប់ក្រធ្លាប់បានប្រកាសថា មិនទទួលយកលទ្ធផលការបោះឆ្នោតឆ្នាំ២០១៣ទេ»។ លោកប្រធានបក្សបន្តថា លោកជាមនុស្សខ្មែរម្នាក់មានឧត្តមគតិស្នេហាជាតិពិតប្រាកដ គឺឈរលើអ្វី គឺក្តីស្រឡាញ់សន្តិភាព សេរីភាព យុត្តិធម៌ សុភមង្គល ប៉ុន្តែអ្វីដែលក្រៅពីធ្វើឲ្យខ្មែរបានសុខសប្បាយ ខ្វះយុត្តិធម៌លោកមិនចូលរួមទេ៕
ចែករំលែកព័តមាននេះ