រាជធានីភ្នំពេញ ៖ បុរសជនជាតិចិន២នាក់ស្រវឹងស្រាបើករថយន្តបើកបុករបាំងថ្មពុះចែកទ្រូងផ្លូវអស់ចំនួន២កង់ បង្កឲ្យមានការភ្ញាក់ផ្អើលកាលពីវេលាម៉ោង០៨យប់ ថ្ងៃទី២១ ខែវិច្ឆិកា ឆ្នាំ២០១៧ នៅតាមបណ្តោយផ្លូវសហព័ន្ធរុស្ស៊ី ភូមិក្បាលដំរី សង្កាត់កាកាប ខណ្ឌពោធិ៍សែនជ័យ។ រថយន្តបង្កម៉ាកកូរ៉ូឡា ពណ៌ស្លែ ពាក់ស្លាកលេខ កណ្ដាល ២A-៥៤៦៤ បើកបរក្នុងទិសដៅពីកើតទៅលិច ជិះគ្នា២នាក់ជាជនជាតិចិន ។
តាមប្រភពព័ត៌មានពីកន្លែងកើតហេតុបាននិយាយថា នៅមុនពេលកើតហេតុ គេឃើញរថយន្តបង្កខាងលើបើកបរដោយជនជាតិចិន២នាក់ ក្នុងទិសដៅកើតទៅលិចយ៉ាងលឿន លុះបើកមកដល់ចំណុចកើតហេតុ ស្រាប់តែរថយន្តបង្កបានរេចង្កូតទៅផ្នែកខាងឆ្វេង បុកខឿនពុះចែកផ្លូវពេញទំហឹងបាក់អស់២កង់ ធ្លាយរថយន្តទៅផ្លូវម្ខាងទៀតនៅច្រងាងកណ្ដាលផ្លូវ បណ្ដាលឲ្យខ្ទេចមួយកំណាត់មុខ និងផ្ទុះពោងសុវត្ថិភាពទាំង២ តែមិនបង្កគ្រោះថ្នាក់ដល់នាក់បើកបរឡើយ ។
ប្រភពដដែលបានបន្តទៀតថា បន្ទាប់ពីកើតហេតុភ្លាមៗ បុរសជនជាតិចិនទាំង២នាក់ខាងលើ ត្រូវបានខាងជំនាញចរាចរណ៍ខណ្ឌពោធិ៍សែនជ័យដឹកយកទៅសួរនាំ ប៉ុន្តែបុរសជនជាតិចិនទាំង២នាក់នោះ បានបដិសេធថាគាត់មិនមែនជាអ្នកបើកបរទេ ទើបជំនាញចរាចណ៍ក្រុងបានឲ្យត្រលប់ទៅវិញ ព្រោះមិនមានបង្ករបួសស្នាមដល់អ្នកទៃផង ចំណែករថយន្តបង្កស្ទួចយកទៅរក្សាទុកនៅការិយាល័យនគរបាលចរាចរណ៍ផ្លូវគោក ៕
ចែករំលែកព័តមាននេះ