រាជធានីភ្នំពេញ ៖ យុវជនម្នាក់ពិតជាមានចិត្តទមិឡមែន ដោយបានលួចស្ទូចត្រីនៅក្នុងស្រះទឹកនៅក្នុងវត្តហើយ នៅពេលព្រះសង្ឃឃាត់មិនឲ្យស្ទូចស្រាប់តែផ្ទុះកំហឹងស្រែកឡូឡា បញ្ចេញឫកពាច្រងេងច្រងាងគំរាមព្រះសង្ឃយ៉ាងចាស់ដៃថែមទៀត។ ដោយអត់ទ្រាំ និងខន្តីលែងបាន ព្រះសង្ឃបានហៅទូរស័ព្ទសុំឲ្យនគរបាលជួយអន្តរាគមន៍ ហើយភ្លាមៗនោះកម្លាំងនគរបាលប៉ុស្តិ៍ចោមចៅ៣…
រាជធានីភ្នំពេញ ៖ យុវជនម្នាក់ពិតជាមានចិត្តទមិឡមែន ដោយបានលួចស្ទូចត្រីនៅក្នុងស្រះទឹកនៅក្នុងវត្តហើយ នៅពេលព្រះសង្ឃឃាត់មិនឲ្យស្ទូចស្រាប់តែផ្ទុះកំហឹងស្រែកឡូឡា បញ្ចេញឫកពាច្រងេងច្រងាងគំរាមព្រះសង្ឃយ៉ាងចាស់ដៃថែមទៀត។ ដោយអត់ទ្រាំ និងខន្តីលែងបាន ព្រះសង្ឃបានហៅទូរស័ព្ទសុំឲ្យនគរបាលជួយអន្តរាគមន៍ ហើយភ្លាមៗនោះកម្លាំងនគរបាលប៉ុស្តិ៍ចោមចៅ៣ បានចុះទៅធ្វើការឃាត់ខ្លួនជននោះនាំទៅប៉ុស្តិ៍ធ្វើការអប់រំឲ្យរាងចាលម្ដង។ ហេតុការណ៍នោះបានកើតឡើង កាលពីវេលាម៉ោង៣ និង៥០នាទីរសៀល ថ្ងៃទី២១ ខែវិច្ឆិកា ឆ្នាំ២០១៧ ស្ថិតនៅក្នុងស្រះទឹកវត្តជម្ពូវ័ន សង្កាត់ចោមចៅ៣ ខណ្ឌពោធិ៍សែនជ័យ រាជធានីភ្នំពេញ។ យុវជនស្ទាវខាងលើនោះឈ្មោះ កែវ ឧត្តម អាយុ២០ឆ្នាំ មុខរបរកម្មករសំណង់ មានទីលំនៅក្នុងភូមិព្រៃព្រីងត្បូង សង្កាត់ចោមចៅ៣ ខណ្ឌពោធិ៍សែនជ័យ និងមានស្រុកកំណើត នៅក្នុងខេត្តព្រៃវែង។
ព្រះសង្ឃ១អង្គបានមានសង្ឃដីកាថា នៅមុនពេលកើតហេតុយុវជនស្ទាវម្នាក់ខាងលើនោះ បានដើរចូលទៅក្នុងវត្តដោយមានកាន់សន្ទូចទៅជាមួយផង បន្ទាប់មកបានធ្វើសកម្មភាពស្ទូចត្រីនៅក្នុងស្រះទឹកមុខព្រះវិហារក្នុងវត្តនោះ ដោយមិនគិតពីបាបបុណ្យអ្វីឡើយ ក្រោយពេលឃើញបែបនេះព្រះអង្គរួមជាមួយព្រសង្ឃផ្សេងទៀត បានចូលទៅសួរនាំ និងឃាត់ឲ្យឈប់ស្ទូចត្រីក្នុងវត្តតទៅទៀត។ ព្រោះវត្តអារាមគឺជាទីកន្លែងសម្រាប់សក្ការៈបូជា ដូច្នេះការស្ទូចត្រីនៅក្នុងវត្តបែបនេះមិនសមឡើយ។ ខណៈនោះស្រាប់តែបានធ្វើឲ្យជនស្ទាវខាងលើ មានការខឹងសម្បារយ៉ាងខ្លាំង ហើយបានបញ្ចេញឫកពា ច្រងេងច្រងាង និងស្រែកឡូឡាដាក់ព្រះអង្គគួរឲ្យខ្លាច។ ប្រភពដដែលបានបន្តទៀតថា ដោយសារតែមិនអាចទ្រាំបាននឹងខន្តីតទៅទៀតបាន ទើបព្រះសង្ឃទាំងអស់ខលទៅប្ដឹង សុំកម្លាំងនគរបាលជួយអន្តរាគមន៍ ហើយភ្លាមៗនោះនគរបាលប៉ុស្ដិ៍ចោមចៅ៣ បានចុះទៅជួយឃាត់ខ្លួនយុវជននោះទៅកាន់ ប៉ុស្ដិ៍ធ្វើការសួរនាំតែម្ដង។
ដោយឡែកនៅក្នុងស្រះទឹកមុខព្រះវិហារវត្តជម្ពូវ័ននេះមានត្រីច្រើនណាស់ និងត្រីច្រើនប្រភេទថែមទៀតផង ដែលត្រីទាំងនោះមួយចំនួនវាបានរស់នៅក្នុងស្រះនេះយូរមកហើយ និងមួយចំនួនទៀតត្រូវបានបងប្អូនប្រជាពុទ្ធបរិស័ទជិតឆ្ងាយនាំយកពីគ្រប់ទីកន្លែងទៅលែងនៅទីនោះ ជាការសន្សំកុសលផលបុណ្យរៀងៗខ្លួន ហើយត្រីដែលបានរស់នៅក្នុងវត្តបែបនេះ គឺជាសត្វដែលមានបុណ្យ មានសំណាងគេចផុតពីការយាយីពីសំណាក់មនុស្សទាំងឡាយ។ ពួកវាត្រូវការរស់នៅដោយភាពស្ងប់ស្ងាត់និងសុខដុមរមនា មិនអនុញ្ញាតឲ្យបុគ្គលណាមួយទៅនេសាទយកចេញពីស្រះនេះឡើយ ដូច្នេះទើបនៅពេលដែលយុវជនខាងលើទៅស្ទូច ព្រះសង្ឃត្រូវតែហាមឃាត់ និងមានសិទ្ធិពេញលេញដើម្បីឃាត់ ហើយតាំងពីយូរមកហើយទើបតែឃើញយុវជនម្នាក់នេះប៉ុណ្ណោះ ដែលហ៊ានចូលទៅស្អូចត្រីក្នុងវត្តបែបនេះ។
នគរបាលបានឲ្យដឹងថា ក្រោយពេលទទួលបានបណ្ដឹងពីព្រះសង្ឃកម្លាំងនគរបាលប៉ុស្ដិ៍ចោមចៅ៣ បានចេញទៅអន្តរាគមន៍ភ្លាមៗ ហើយបានឃើញជននោះកំពុងឡូឡាដាក់ព្រះសង្ឃ ដោយមិនខ្លាចបាបបុណ្យគុណទោសអ្វីទាំងអស់ សូម្បីតែអ្នកកាន់សាសនាផ្សេងក្រៅពីព្រះពុទ្ធសាសនា ក៏មិនហ៊ានប្រើកាយវិការបែបនេះដាក់ព្រះសង្ឃឡើយ។ បន្ទាប់មកកម្លាំងក៏បានធ្វើការឃាត់ខ្លួននាំទៅសាកសួរនៅប៉ុស្ដិ៍ ហើយខណៈនោះព្រះសង្ឃមិនបានឲ្យយកទោសចំពោះយុវជននោះឡើយ ដោយព្រះអង្គបានសំណូមពរសុំឲ្យនគរបាល ត្រឹមអប់រំណែនាំដល់រូបគេប៉ុណ្ណោះរួចឲ្យដោះលែងវិញ៕
https://youtu.be/KHM8Y8eGr0w
ចែករំលែកព័តមាននេះ