ខេត្តព្រៃវែង ៖ កុមារាអាយុ១១ម្នាក់ត្រូវរងរបួសធ្ងន់រហូតត្រូវក្រុមគ្រួសារបញ្ជូនទៅព្យាបាលនៅរាជធានីភ្នំពេញ ព្រោះតែរឿងមិនព្រមទៅទិញស្រាឲ្យគេផឹក ខណៈជនសង្ស័យត្រូវសមត្ថកិច្ចចាប់ខ្លួនបានបន្ទាប់ពីគេចខ្លួនបានមួយថ្ងៃ ។ ករណីហិង្សាខាងលើបានកើតឡើងកាលពីថ្ងៃ២០ ខែវិច្ឆិកា ឆ្នាំ២០១៧ វេលាម៉ោងប្រមាណជាង៥និង៣០នាទី ភូមិឬស្សីទ្វារ ឃុំព្រៃឃ្នេស ស្រុកមេសាង ខេត្តព្រៃវែង ។
លោកអធិការស្រុកមេសាងបានឲ្យដឹងថា ករណីអំពើហិង្សាដោយចេតនាបង្ករទ្បើង ដោយឈ្មោះ ឆុន ចាន់ ភេទប្រុស អាយុ៤១ឆ្នាំមានទីលំនៅភូមិខាងលើ បានយកកែវស្រាចោលទៅលើជនរងគ្រោះឈ្មោះ អាត អ៊ួ អាយុ១១ឆ្នាំ នៅភូមិកើតហេតុខាងលើ បណ្តាលឲ្យរងរបួស២ កន្លែង ចំក្បាល និងឆ្អឹងខ្នង ដែលមូលហេតុ គឺដោយសារជនសង្ស័យប្រើជនរងគ្រោះឲ្យទៅទិញស្រាឲ្យក្រុមខ្លួនផឹក ហើយមិនព្រមទៅទិញ ទើបជនសង្ស័យខឹង ហើយក៏ទាញបានកែវស្រាចោលទៅលើជនរងគ្រោះតែម្តង ។
ក្រោយកើតហេតុភ្លាមជនសង្ស័យបានគេចខ្លួនបាត់ ឯជនរងគ្រោះដេកព្យាបាលនៅពេទ្យឯកជនក្នុងភូមិខាងលើ និងបន្តទៅព្យាបាលនៅរាជធានីភ្នំពេញបន្ត ។
ធ្វើការស្រាវជ្រាវមួយថ្ងៃ សមត្ថកិច្ចបានតាមចាប់ខ្លួនរបស់ជនសង្ស័យបាន ហើយបច្ចុប្បន្នសមត្ថកិច្ចកំពុងកសាងសំណុំរឿង ដើម្បីបញ្ជូនជនសង្ស័យទៅកាន់តុលារនៅថ្ងៃទី២២ ខែវិច្ឆិកា នេះដើម្បីដោះស្រាយតាមនីតិវិធីច្បាប់ ៕
ចែករំលែកព័តមាននេះ