សហរដ្ឋអាមេរិក-អាហ្វហ្គានីស្ថាន ៖ អ្នកទទួលខុសត្រូវយោធាអាមេរិករាយការណ៍កាលពីថ្ងៃទី២០ វិច្ឆិកា ថា អាមេរិកបានធ្វើការវាយប្រហារតាមអាកាសជាលើកដំបូងប្រឆាំងបណ្តាមន្ទីរពិសោធន៍ជាទីតាំងផលិតហេរ៉ូអីុននៅអាហ្វហ្គានីស្ថាន ដើម្បីរារាំងដល់ប្រភពចំណូលសំខាន់របស់ពួកតាលីបង់ ។
យោងតាមឧត្តមសេនីយ៍ JOHN NICHOSLON ថា ប្រតិបត្តិការនេះធ្វើឡើងរួមគ្នាជាមួយកងទ័ពអាហ្វហ្គានីស្ថានកាលពីយប់ថ្ងៃទី១៩ មក២០ វិច្ឆិកា អាចកម្ទេចមន្ទីរពិសោធន៍កែច្នៃអាភៀនទៅជាហេរ៉ូអីុន៨កន្លែងនៅខេត្តហែលម៉ង់ ជាខេត្តដាំអាភៀនច្រើនជាងគេមួយផ្នែកធំស្ថិតក្រោមការត្រួតត្រារបស់ពួកតាលីបង់ ។
ឧត្តមសេនីយ៍អាមេរិករូបនេះជាមេបញ្ជាការប្រតិបត្តិការ «RESOLUTE SPPORT» របស់អូតង់នៅអាហ្វហ្គានីស្ថានក្នុងសន្និសីទសារព័ត៌មានមួយនាក្រុងកាប៊ុល ដើម្បីបង្ហាញពីយុទ្ធសាស្ត្រ នេះប្រឆាំងការរត់ពន្ធគ្រឿងញៀនដែលផ្តល់ហិរញ្ញវត្ថុដល់ពួកតាលីបង់បានព្រមានថា ការវាយប្រហារតាមអាកាសនឹងបន្តដើម្បីប្រឆាំងពួកតាលីបង់ ។ ការវាយប្រហារទាំងឡាយរបស់កងទ័ពអាមេរិករហូតមកទល់ពេលនេះសំដៅតែលើពួកបះបោរផ្ទាល់ប៉ុណ្ណោះ ។
វិមានប្រធានាធិបតីអាហ្វហ្គានីស្ថានក្នុងសេចក្តីប្រកាសមួយបញ្ជាក់ថា ការវាយប្រហារបែបនេះជាលើកដំបូងហើយ ។
ផលិតកម្មអាភៀនមានការកើនទ្វេដងនៅអាហ្វហ្គានីស្ថានក្នុងឆ្នាំ២០១៧ ដែលតាម អ.ស.ប ថាឡើងដល់៩.០០០តោនហើយ ធ្វើឱ្យអាហ្វហ្គានីស្ថានក្លាយជាប្រទេសផលិតអាភៀនធំជាងគេបំផុតនៃពិភពលោក ។
ឧត្តមសេនីយ៍ NICHOLSON រំលឹកថា បណ្តាបណ្តាញពួកឧក្រិដ្ឋជនដែលជួយទ្រទ្រង់ដល់ពួកតាលីបង់ជាអ្នកទទួលខុសត្រូវលើការផលិតហេរ៉ូអ៊ីនដល់ទៅ៨៥% លើពិភពលោក ។ លោកគូសបញ្ជាក់ថា សេដ្ឋកិច្ចលួចលាក់អាចឱ្យពួកតាលីបង់ប្រមូលបានប្រាក់ចំណូលប្រមាណជា២០០លានដុល្លារ និងអាចលើសពីនេះពេលហេរ៉ូអ៊ីនត្រូវបញ្ជូនចេញពីប្រទេស ហើយតម្លៃរបស់វាមានការកើនឡើង ។ លោកបន្តថា យើងវាយប្រហារប្រឆាំងសេដ្ឋកិច្ចខុសច្បាប់នេះសំដៅលើបណ្តាមន្ទីរពិសោធន៍ជាទីតាំងកែច្នៃអាភៀនទៅជាហេរ៉ូអ៊ីន បណ្តាឃ្លាំងស្តុក បណ្តាកន្លែងសង្ស័យតម្កល់ប្រាក់ទុកកន្លែងបញ្ជា និងគ្រប់គ្រងការរត់ពន្ធ ៕
ចែករំលែកព័តមាននេះ