ប្រទេសរុស្ស៊ី-ប្រទេសបារាំង ៖ ទីភ្នាក់ងារឧតុនិយមរុស្ស៊ី ROSGUIDROMET ទទួលស្គាល់កាលពីថ្ងៃទី២០ វិច្ឆិកា ថា ពពកដែលមានអត្រាវិទ្យុសកម្មខ្ពស់នៃ RUTHENIUM-106 ត្រូវចាប់ឃើញកាលពីដំណាច់ខែកញ្ញានៅតាមតំបន់ជាច្រើនរបស់រុស្ស៊ី ដែលនេះជាការបញ្ជាក់ចំពោះរបាយការណ៍ទាំងឡាយនៃបណ្តាញត្រួតពិនិត្យវិទ្យុសកម្មអឺរ៉ុបជាច្រើន ដែលថាចាប់ឃើញវិទ្យុសកម្មនៅបារាំង ។
ក្នុងសេចក្តីប្រកាសមួយ ROSGUIDROMET បញ្ជាក់ថា វិទ្យុសកម្ម ISTOTOPE RU-106 ត្រូវចាប់ឃើញដោយស្ថានីយត្រួតពិនិត្យនៅ ARGUAIACH និង NOROGORNY រវាងថ្ងៃទី២៥ កញ្ញា និងថ្ងៃទី១ តុលា ។
ROSGUIDROMET ពុំផ្តល់ការបញ្ជាក់លើប្រភពនៃការបញ្ចេញសារធាតុពុលនេះឡើយ តែតំបន់ ARGUAIACH ស្ថិតនៅចម្ងាយ៣០គីឡូម៉ែត្រ ពីទីតាំងនុយក្លេអ៊ែរ MAIAK ដែលកាលពីឆ្នាំ១៩៥៧ ធ្លាប់ជួបប្រទះគ្រោះថ្នាក់នុយក្លេអ៊ែរយ៉ាងអាក្រក់បំផុតមួយ ។ MAIAK បច្ចុប្បន្នជាទីតាំងចម្រាញ់កាកសំណល់គ្រឿងឆេះនុយក្លេអ៊ែរ ។
ROSGUIDROMET បញ្ជាក់ថា RUTHENIUM-106 បន្ទាប់មកចាប់ឃើញនៅរដ្ឋកាតាស្ថាន ហើយក្រោយមកនៅភាគខាងត្បូងរុស្ស៊ី មុនពេលកំណត់ឃើញចាប់ពីថ្ងៃទី២៩ កញ្ញា នៅក្នុងបណ្តាប្រទេសអឺរ៉ុប ចាប់ពីអុីតាលីទៅ ហើយឆ្ពោះមកភាគខាងជើងទ្វីបអឺរ៉ុប ។
វិទ្យាស្ថានការពារវិទ្យុសកម្ម និងសន្តិសុខនុយក្លេអ៊ែរ IRSN បារាំងគូសបញ្ជាក់ថា ប្រភពនៃការបំពុលនេះពុំអាចចេញមកពីរេអាក់ទ័រនុយក្លេអ៊ែរមួយឡើយ ព្រោះមានសមាសភាពវិទ្យុសកម្មឯទៀតៗអាចចាប់ឃើញ រួចវាអាចចេញមកពីទីតាំងណាមួយទាក់ទិននឹងការចម្រាញ់កាកសំណល់នុយក្លេអ៊ែរ ឬផលិតផលិតផលមានប្រភពពីវិទ្យុសកម្ម ។
សារធាតុ RUTHENIUM-106 ជាផលិតផលមួយចេញពីឧស្សាហកម្មនុយក្លេអ៊ែរ ដែលប្រើម្យ៉ាងទៀត សម្រាប់ការព្យាបាលខាងវេជ្ជសាស្ត្រ ៕
ចែករំលែកព័តមាននេះ