រាជធានីភ្នំពេញ ៖ អ្នកនាំពាក្យគណបក្សប្រជាជនកម្ពុជាបានបានអះអាងថា លិទ្ធិប្រជាធិបតេយ្យនៅកម្ពុជាមិនស្លាប់តាមក្រុមអ្នកនយោបាយទុច្ចរិត និងប្រឆាំងនោះទេ ។ ការលើកឡើងបែបនេះធ្វើឡើង បន្ទាប់ពីគណបក្សប្រឆាំងនៅកម្ពុជា គឺគណបក្សសង្គ្រោះជាតិត្រូវបានរំលាយដោយអំណាចសាលដីកាតុលាការកំពូលកាលពេលថ្ងៃទី១៦ វិច្ឆិកា…
រាជធានីភ្នំពេញ ៖ អ្នកនាំពាក្យគណបក្សប្រជាជនកម្ពុជាបានបានអះអាងថា លិទ្ធិប្រជាធិបតេយ្យនៅកម្ពុជាមិនស្លាប់តាមក្រុមអ្នកនយោបាយទុច្ចរិត និងប្រឆាំងនោះទេ ។ ការលើកឡើងបែបនេះធ្វើឡើង បន្ទាប់ពីគណបក្សប្រឆាំងនៅកម្ពុជា គឺគណបក្សសង្គ្រោះជាតិត្រូវបានរំលាយដោយអំណាចសាលដីកាតុលាការកំពូលកាលពេលថ្ងៃទី១៦ វិច្ឆិកា កន្លងទៅ។
លោក សុខ ឥសាន បានឲ្យដឹងនៅថ្ងៃទី២១ វិច្ឆិកា ឆ្នាំ២០១៧ តាមប្រព័ន្ធតេឡេក្រាមថា ការចាត់វិធានការណ៍ផ្លូវច្បាប់ចំពោះបណ្តាជនល្មើសច្បាប់ ជាពិសេសក្រុមជនក្បត់ជាតិ ដែលបម្រើឲ្យបរទេស អនុវត្តផែនការរបស់បរទេស ប៉ុនប៉ងផ្តួលរំលំរាជរដ្ឋាភិបាលកម្ពុជាស្របច្បាប់ គឺជាការពង្រឹងលទ្ធិប្រជាធិបតេយ្យ និងនីតិរដ្ឋនៅកម្ពុជា ស្របតាមស្មារតីនៃកិច្ចព្រមព្រៀងទីក្រុងប៉ារីស ថ្ងៃទី ២៣ តុលា ឆ្នាំ ១៩៩១ ។
លោកថា ក្រោយការវាយកម្ទេចឧបាយកលដ៏ពិសពុលរបស់ជនក្បត់ជាតិ និងបក្សពួករបស់គេ គឺផ្ទៃមេឃកម្ពុជាប្រែជាស្រឡះល្អ អស់ពពកខ្មៅងងឹត ដែលបង្កលក្ខណៈឲ្យប្រជាជនកម្ពុជាបានធូរស្បើយក្នុងអារម្មណ៍ មានឱកាសធ្វើដំណើរទៅមុខប្រកបដោយសេចក្តីសុខក្សេមក្សាន្តក្នុងការរស់នៅ ប្រកបរបររកស៊ីចិញ្ចឹមជីវិតដោយសេរី គ្មានការរំខាន ដូចពេលមានបក្សប្រឆាំងដែលតែងតែអុកឡុកសភាពការណ៍ស្រុកទេសឲ្យវិកវរជាប្រចាំនោះ ។
សូមជម្រាបថា ការលើកឡើងរបស់អ្នកនាំពាក្យគណបក្សកាន់អំណាចនេះ ស្របពេលអតីតអ្នកតំណាងរាស្ត្រអតីតគណបក្សសង្គ្រោះជាតិបានកំពុងប្រមូលផ្តុំគ្នានៅក្រៅប្រទេស ដោយបានអះអាងថា លិទ្ធិប្រជាធិបតេយ្យនៅកម្ពុជាបានបាត់បងហើយ ដោយសារគណបក្សកាន់អំណាចបានរំលាយគណបក្សប្រឆាំងនៅកម្ពុជា ។
លោកស្រី មូរ សុខហួរ អតីតអនុប្រធានគណបក្សសង្គ្រោះជាតិដឹកនាំធ្វើបាតុកម្មនៅទីលានប្រជាធិបតេយ្យនៅប្រទេសបារាំង ដោយចោទប្រកាន់ថា កម្ពុជាបានបាត់បង់លិទ្ធិប្រជាធិបតេយ្យ ជាពិសេសគឺក្រុមគាត់មិនទទួលស្គាល់នូវសាលដីការបស់តុលាការកំពូលដែលសម្រេចរំលាយគណបក្សប្រឆាំងនោះទេ ។
លោកស្រីបានបន្ថែមថា សមាជិកសភាបក្សសង្គ្រោះជាតិបានកំពុងតែធ្វើការកៀរគរឲ្យបរទេស ដាក់គំនាបមករដ្ឋាភិបាលកម្ពុជា ហើយស្នើមានការដោះលែងលោកកឹម សុខា អតីតប្រធានគណបក្សសង្ក្រោះជាតិផងដែរ ៕
ចែករំលែកព័តមាននេះ