ខេត្តបន្ទាយមានជ័យ ៖ កងកម្លាំងរាជអាវុធខេត្តបន្ទាយមានជ័យបញ្ជូនជនសង្ស័យម្នាក់ទៅសាលាដំបូងខេត្តក្នុងករណីរក្សាទុក ចែកចាយ និងប្រើប្រាស់ដោយខុសច្បាប់នូវសារធាតុញៀន នៅថ្ងៃទី២១ ខែវិច្ឆិកា ឆ្នាំ២០១៧ នេះផងដែរ ។
បើតាមសំដីលោកអនុសេនីយ៍ឯក ចាន់ រដ្ឋា មេបញ្ជាការស្តីទីមូលដ្ឋានកងរាជអាវុធហត្ថក្រុងប៉ោយប៉ែតបានប្រាប់ឲ្យដឹងថា នៅវេលាម៉ោង០៨យប់ ថ្ងៃទី១៩ ខែវិច្ឆិកា ឆ្នាំ២០១៧ កម្លាំងមូលដ្ឋានកងរាជអាវុធហត្ថក្រុងប៉ោយប៉ែត ដឹកនាំដោយលោកអនុសេនីយ៍ឯក នួន នីណារ៉ូ មេបញ្ជាការរងមូលដ្ឋានកងរាជអាវុធហត្ថក្រុងបានចុះប្រតិបត្តិការចេញល្បាតការពារសុវត្ថិភាពជូនប្រជាពលរដ្ឋក្នុងភូមិសាស្ត្រក្រុង លុះដល់ម៉ោង១២នឹង៣០នាទីរំលងអធ្រាត្រឈានចូលថ្ងៃទី២០ ខែវិច្ឆិកា ឆ្នាំ២០១៧ បានឃើញមុខសញ្ញាដែលមានការសង្ស័យ កម្លាំងក៏បានធ្វើការឃាត់ខ្លួន ។ ក្រោយពីធ្វើការចាប់ឃាត់ខ្លួនឈ្មោះ បែ តូនី ភេទប្រុស អាយុ២៩ឆ្នាំ ជនជាតិឥណ្ឌូនេស៊ី ស្នាក់នៅបណ្ដោះអាសន្នបន្ទប់ជួល ស្ថិតក្នុងបរិវេណកាស៊ីណូផ្កាយ៥ ក្នុងភូមិក្បាលស្ពាន១ សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ សមត្ថកិច្ចកងរាជអាវុធហត្ថបានឆែកឆេរក្នុងខ្លួនរកឃើញគ្រឿងញៀនប្រភេទខេ សម្រាប់ហិតចំនួន០៤កូនថង់ថ្លា ។ ក្រោយមកដោយមានការសម្របសម្រួលពីលោក តេង សាម៉ៃ ព្រះរាជអាជ្ញាអមសាលាដំបូងខេត្តបន្ទាយមានជ័យ និងមានការអនុញ្ញាតពីលោកឧត្ដមសេនីយ៍ត្រី បោន ប៊ិន មេបញ្ជាការកងរាជអាវុធហត្ថខេត្តបន្ទាយមានជ័យ ទើបនៅថ្ងៃទី២០ ខែវិច្ឆិកា ឆ្នាំ២០១៧ បានធ្វើការឆែកឆេរទីតាំងបន្ទប់ស្នាក់នៅរបស់ជនសង្ស័យរកឃើញវត្ថុតាងកញ្ឆា០១ថង់ធំ និង០៣កូនថង់តូច ព្រមទាំងថង់ថ្លាមួយចំនួនធំ ទូរស័ព្ទ១គ្រឿង លោហធាតុពណ៌លឿង ខ្សែ.ក ចិញ្ចៀន លិខិតឆ្លងដែន នាឡិកាដៃ១ និងថវិកាមួយចំនួនផងដែរ ។
លោកវរសេនីយ៍ឯក ស ប៊ុនសឿង មេបញ្ជាការរងកងរាជអាវុធហត្ថខេត្តបន្ទាយមមានជ័យទទួលការងារបទល្មើសគ្រឿងញៀនបានឲ្យដឹងថា ក្រោយពីកម្លាំងជំនាញធ្វើការសាកសួរចម្លើយរួចមកជនសង្ស័យឈ្មោះ បែ តូនី បានឆ្លើយសារភាពថា ខ្លួនគេពិតជាបានទិញថ្នាំញៀនប្រភេទខេសម្រាប់ទុកហិតក្នុងពេលចូលក្លិបកំសាន្ត ហើយសម្រាប់លក់ឲ្យមិត្តភក្តិពិតប្រាកដមែន ៕
ចែករំលែកព័តមាននេះ