ខេត្តកំពង់ចាម ៖ សួនច្បារជាច្រើនកន្លែងនៅតាមផ្លូវសាធារណៈក្នុងក្រុងកំពង់ចាម ត្រូវបានអភិវឌ្ឈន៍ពីមួយឆ្នាំទៅមួយឆ្នាំ កាន់តែមានភាពស្រស់ស្អាត រួមទាំងសួនច្បារមាត់ទន្លេដែលជាផ្នែកមួយធ្វើឲ្យមានសោភ័ណភាព និងទាក់ទាញភ្ញៀវជាតិ និងអន្តរជាតិផងដែរ ។ ប៉ុន្តែផ្ទុយទៅវិញមានពលរដ្ឋមួយចំនួនបានលែងគោបែបអាណាធិបតេយ្យ ដើរមកឲ្យស៊ីស្មៅដែលដាំលម្អ និងខ្លះទៀតដេកនៅលើសួនច្បារដែលម្ចាស់គោមិនមានយកចិត្តទុកដាក់នោះ ។
លោកវរសេនីយ៏ត្រី រស់ ម៉ុងសេង អធិការស្តីទីក្រុងកំពង់ចាម ឲ្យដឹងនៅព្រឹកថ្ងៃទី២១ ខែវិច្ឆិកា ឆ្នាំ២០១៧ ថា លោកអភិបាលក្រុងកំពង់ចាម ក៏ដូចជាថ្នាក់ដឹកនាំខេត្ត បានចេញបំរាមហាមឲ្យម្ចាស់គោក្របីលែងដើរបែបអាណាធិបតេយ្យចូលក្នុងក្រុងកំពង់ចាមនោះ ដោយសារតែតាមផ្លូវសាធារណៈមានសួនច្បារត្រូវបានរៀបចំលម្អដាំស្មៅ និងផ្កា ព្រមទាំងមានអំពូលបំពាក់នៅពេលរាត្រីថែមទៀត ។
លោកវរសេនីយ៍ត្រី រស់ ម៉ុងសេង អធិការស្តីទីក្រុងកំពង់ចាម បន្តថា ទោះបីជាមានការណែនាំបែបនេះក្តី ក៏មានប្រជាពលរដ្ឋមួយចំនួនតូច មិនស្តាប់នោះទេ បែរជាលែងគោទាំងហ្វូង នាពេលកន្លងមកឲ្យដើរចូលក្នុងក្រុង បាត់បង់សណ្តាប់ធ្នាប់តាមផ្លូវសាធារណៈ ។ បន្ទាប់ពីបានឃើញបែបនេះ កម្លាំងសមត្ថកិច្ចបានទៅចាប់ដឹកមកកាន់អធិការដ្ឋាននគរបាលក្រុងកំពង់ចាម ដើម្បីធ្វើការស្រាវជ្រាវរកម្ចាស់ជាបន្តបន្ទាប់ចំនួន៥លើកមកហើយ ។ ដោយឡែកថ្មីៗនេះ មានគោចំនួន៣ក្បាល បានដើរមកដេកនៅលើសួនច្បារក្នុងសង្កាត់បឹងកុក ក្រុងកំពង់ចាម ក្រោយពីទទួលបាននូវសេចក្តីរាយការណ៍ពីប្រជាពលរដ្ឋហើយនោះ រូបលោកបានចាត់ឲ្យប៉ុស្តិ៍រដ្ឋបាលសង្កាត់បឹងកុក ចុះទៅដឹកយកមកកាន់ប៉ុស្តិ៍ និងស្រាវជ្រាវរកម្ចាស់ ដែលម្ចាស់គោនោះធ្លាប់ធ្វើការអប់រំចំនួន៣លើកមកហើយផងដែរ ។
លោកអធិការស្តីទីក្រុងកំពង់ចាម បញ្ជាក់ថា ថ្នាក់ដឹកនាំខេត្តបានយកចិត្តទុកដាក់ធ្វើការកែលម្អសួនច្បារឲ្យកាន់តែមានភាពស្រស់ស្អាត ដូច្នេះសូមពលរដ្ឋម្ចាស់គោទាំងឡាយ មេត្តាធ្វើយ៉ាងណាចិញ្ចឹមដាក់ក្នុងក្រោល និងមានខ្សែចងត្រឹមត្រូវ ចៀសវាងព្រលែងពាសវាលពាសកាលចូលមក្នុងក្រុងកំពង់ចាម ដែលធ្វើឲ្យបាត់បង់សណ្តាប់ធ្នាប់ ។ មិនតែប៉ុណ្ណោះ គោបានជុះលាមកនៅតាមផ្លូវបន្ថែមទៀត លោកថាក្នុងករណីម្ចាស់គោមិនរាងចាលទេនោះ នឹងមានវិធានការក្តៅលើម្ចាស់គោក្របីបន្ថែមទៀត ៕
ចែករំលែកព័តមាននេះ