ខេត្តកណ្តាល ៖ បុរសម្នាក់ដែលគេសង្ស័យថាចាញ់ល្បែងក្រពុលមុខ ហើយដកកាំភ្លើងខ្លីភ្ជង់គំរាមតំណាងអ្នកមើលការកាស៊ីណូត្រូវក្រុមសន្តិសុខព្រួតគ្នាចាប់វាយទ្រោមខ្លួន ទើបប្រគល់ឲ្យសមត្ថកិច្ចចាត់ការតាមនីតិវិធីច្បាប់ ។ ហេតុការណ៍នេះបានកើតឡើងកាលពីវេលាម៉ោង១២និង១៥នាទីរំលងអធ្រាត្រឈានចូលថ្ងៃទី២១ ខែវិច្ឆិកា ឆ្នាំ២០១៧នៅក្នុងកាស៊ីណូថ្មពេជ្រ ភូមិក្អមសំណក្រោម ឃុំក្អមសំណ ស្រុកលើកដែក ខេត្តកណ្ដាល ។
ជនដែលរងការចោទប្រកាន់ថា ដកកាំភ្លើងខ្លីឈ្មោះអ៊ុំ សុភក្រ័ អាយុ៣៤ឆ្នាំ ជនជាតិខ្មែរមុខរបរនាយផ្នែកស្រាវជ្រាវស៊ើបការ មានទីលំនៅសង្កាត់សែនសុខ ខណ្ឌពោធិ៍សែនជ័យ រាជធានីភ្នំពេញ ត្រូវក្រុមសន្តិសុខកាស៊ីណូព្រួតគ្នាវាយបណ្តាលឲ្យរងរបួសដាច់សុះឈាមហូរស្រោចពេញខ្លួន និងដកយកបានវត្ថុតាងមានកាំភ្លើងខ្លីម៉ាកប៉េអាកុល តួពណ៌សស្នាប់ពណ៌ខ្មៅ១ដើមលេខ៥៥៥៩A១USA ៩គ្រាប់ ខ្នោះដៃ១ និងម៉ូតូហុងដាគុបសេ៥០ពណ៌ស្លែ ស្លាកលេខ ភ្នំពេញ១AA-១៥០៩មួយគ្រឿង រូបថតឯកសណ្ថាននគរបាលមួយសន្លឹកកាបូបស្ពាយពណ៌ឈាមជ្រូក១ និងសម្ភារមួយចំនួនទៀត ប្រគល់ទៅឲ្យសមត្ថកិច្ចនគរបាលចាត់ការតាមនីតិវិធី ។
ចំណែកតំណាងកាស៊ីណូថ្មពេជ្រ រងការគំរាមគំហែងឈ្មោះអៀង សុងទ្រី អាយុ២៥ឆ្នាំ ជនជាតិខ្មែរ ស្នាក់នៅក្នុងកាស៊ីណូដែលជាអ្នកឲ្យខ្មែរចូលលេងម៉ាសេរី ៕
ចែករំលែកព័តមាននេះ