តើ Sevilla និង Liverpool ក្រុមមួយណាដែលទទួលបានភាពរីករាយ?

ថ្ងៃទី ២១ ខែ វិច្ឆិកា ឆ្នាំ ២០១៧

ម៉ោង ១១:១៥

ការប្រកួតវគ្គជម្រុះតាមពូលនៃពានរង្វាន់យូហ្វាឆេមពានលីគនេះ គេសង្កេតឃើញថា ពូល E គឺជាពូលដែលក្រុមនីមួយៗ មានពិន្ទុប្រដេញគ្នាយ៉ាងស្វិតស្វាញ ។ ចំពោះការប្រកួតនារាត្រីនេះ ក្រុម Sevilla នឹងបើកទ្វារស្វាគមន៍ក្រុមជើងខ្លាំងមកពីអង់គ្លេស Liverpool ដែលពួកគេទាំងពីរមានចំណាត់ថ្នាក់លេខ៥ ដូចគ្នាក្នុងលីគរបស់ខ្លួន ។ ដ្បិតឈរនៅចំណាត់ថ្នាក់លេខ២ក្នុងពូល E ប៉ុន្តែ Sevilla ចាញ់ Liverpool តែ១ពិន្ទុប៉ុណ្ណោះ ខណៈក្រុមចំណាត់ថ្នាក់លេខ៣ Spartak Moskva មាន៥ពិន្ទុ ធ្វើឱ្យក្រុមទាំងបីនេះសុទ្ធតែមានឱកាសក្នុងការដណ្តើមកៅអីទៅវគ្គបន្តដូចគ្នា ។

ប្រវត្តិបរាជ័យដ៏ធំបំផុតរបស់ Sevilla ក្នុងការប្រកួតពានរង្វាន់នេះ គឺអំឡុងពេលពួកគេទៅសួរសុខទុក្ខក្រុម Spartak Moskva កាលពីខែតុលា កន្លងទៅ ដោយបានចាញ់ផ្ទះម្ទាស់១ទល់នឹង៥ ខណៈការប៉ះគ្នាម្តងទៀតនៅទឹកដីរបស់ខ្លួន កាលពីដើមខែវិច្ឆិកា Sevilla បានត្រឹមវាយបកវិញ ២-១ប៉ុណ្ណោះ ។ ផ្ទុយពីក្រុម Liverpool ដែលពួកគេបានបង្ហាញទម្រង់លេងយ៉ាងល្អ ថែមទាំងមិនទាន់ស្គាល់ពាក្យថាចាញ់ម្តងណាឡើយ ។

យ៉ាងណាមិញ ការប៉ះគ្នានារាត្រីនេះ ស្ថានភាពក្រុមម្ចាស់ផ្ទះ Sevilla ហាក់មានប្រៀបជាងក្រុមភ្ញៀវ Liverpool ដោយផ្អែកលើប្រវត្តិជួបគ្នាទាំងពីរដង ។ ការប៉ះគ្នាលើកដំបូងនៅយូរ៉ូប៉ាលីគឆ្នាំ ២០១៦ Sevilla បានយកឈ្នះ Liverpool ៣ទល់នឹង១ រីឯជំនួបលើកទីពីរនៅឆេមពានលីគថ្មីៗនេះ ពួកគេបានត្រឹមទទួលលទ្ធផលស្មើ ២-២ ។

សមាជិកក្រុមរបស់ក្លិប Sevilla ដែលអវត្តមានក្នុងការប្រកួតនេះមានដូចជាកីឡាករ Carrico, Pareja, Mercado, Correa និងកីឡាករ Motoya រីឯស្ថានភាពកូនក្រុមរបស់ក្លិប Liverpool មិនមានកីឡាករសំខាន់រូបណារងរបួសឡើយលើកលែងតែកីឡាករ Joel Matip និងកីឡាករ Lallana ប៉ុណ្ណោះដែលស្ថិតនៅកៅអីបម្រុង ។

ចំពោះការប្រកួតនេះ ក្រុមម្ចាស់ផ្ទះ Sevilla មានភាគរយឈ្នះច្រើនជាងក្រុមភ្ញៀវ ហើយក៏ជាពេលដែលពួកគេអាចមានឱកាសឡើងឈរនៅកំពូលតារាងផងដែរ ដើម្បីធានាសុវត្ថិភាពរបស់ខ្លួន ។

បាល់ទាត់យូហ្វាឆេមពានលីគ វគ្គជម្រុះតាមពូល ជុំទី 5 សម្រាប់រាត្រីថ្ងៃអង្គារនេះមានចំនួន 8 ប្រកួត ។ Sevilla និង Liverpool តើក្រុមមួយណាដែលទទួលបានភាពរីករាយ ? ចំណែកឯ Spartak Mos, Man City និង Real Madrid ប៉ះគូប្រកួតខ្សោយ ។