ហុកកៃដូ ៖ ទិន្នផលនេសាទធ្លាក់ចុះនៅប៉ែកខាងជើងនៃតំបន់ប៉ាស៊ីហ្វិក បានធ្វើឲ្យតម្លៃត្រីសាលម៉ុងកើនឡើងក្នុងប្រទេសជប៉ុន ខណៈពលរដ្ឋចាប់ផ្តើមទិញទំនិញសម្រាប់បុណ្យប្រពៃណី ។ យោងតាមផ្នែកគ្រប់គ្រងការនេសាទនៅហុកកៃដូ ឲ្យដឹងថា វាជាតំបន់នេសាទត្រីសាលម៉ុងប្រមាណ៧០ ទៅ៨០%…
ហុកកៃដូ ៖ ទិន្នផលនេសាទធ្លាក់ចុះនៅប៉ែកខាងជើងនៃតំបន់ប៉ាស៊ីហ្វិក បានធ្វើឲ្យតម្លៃត្រីសាលម៉ុងកើនឡើងក្នុងប្រទេសជប៉ុន ខណៈពលរដ្ឋចាប់ផ្តើមទិញទំនិញសម្រាប់បុណ្យប្រពៃណី ។
យោងតាមផ្នែកគ្រប់គ្រងការនេសាទនៅហុកកៃដូ ឲ្យដឹងថា វាជាតំបន់នេសាទត្រីសាលម៉ុងប្រមាណ៧០ ទៅ៨០% នៃចំនួនត្រីទាំងអស់។ គេមើលឃើញទិន្នផលធ្លាក់ចុះប្រមាណ១៥,៣លានក្បាល ស្មើជាង៣០% ។
តម្លៃលក់ដុំនៃត្រីទាំងនេះស្មើប្រមាណ៩,៥ដុល្លារក្នុង១គីឡូក្រាមក្នុងសប្តាហ៍ទី២ខែវិច្ឆិកា កើនឡើងប្រមាណ៥០% បើធៀបនឹងរយៈពេលដូចគ្នាឆ្នាំមុន ។
អង្គការស្រាវជ្រាវប្រចាំហុកកៃដូឲ្យដឹងថា ទិន្នផលត្រីសាលម៉ុងធ្លាក់ចុះក្នុងរដូវរំហើយនេះ គឺបានចាប់ផ្តើមតាំងពីឆ្នាំមុនមកម្ល៉េះ ។ គេគិតថា សីតុណ្ហភាពធ្លាក់ចុះ បានបង្កឲ្យចំនួនត្រីប្រភេទនេះធ្លាក់ចុះក្នុងរយៈពេលប៉ុន្មានឆ្នាំមុន ។
ផ្សារលក់ដុំ Sapporo Central និយាយថា តម្លៃពងត្រីសាលម៉ុង ក៏បានកើនឡើងផងដែរ ដែលតម្លៃលក់ដុំជាមធ្យមកើនឡើងជិត១,៥ដង មកស្មើ៦៧ដុល្លារក្នុង១គីឡូក្រាមកាលពីខែតុលា ។
នៅហុកកៃដូ ធ្លាប់លេចឮហេតុការណ៍ចោរកម្មមួយចំនួន គឺមានជនខិលខូចលួចពងត្រីសាលម៉ុង ដែលបានចិញ្ចឹមក្នុងកន្លែងបង្កាត់ពូជ ។
លើសពីនេះ អ្នកនេសាទក៏លំបាកនេសាទត្រី Saury ផងដែរ ដែលជាត្រីម្យ៉ាងមានប្រជាប្រិយភាពខ្លាំងក្នុងរដូវរំហើយ ។
ក្រុមអ្នកនេសាទនៅតូក្យូនិយាយថា ចំនួនត្រីដែលនេសាទបានសរុបក្នុងប្រទេស ស្មើ ៤៥.៧៥៦តោន នៅថ្ងៃទី៣១ តុលា កន្លងមក។ ពួកគេគិតថា ទិន្នផលនេសាទអាចនឹងធ្លាក់ចុះដល់កម្រិតទាបជាងគេតាំងពីឆ្នាំ១៩៧៦មក។ តម្លៃលក់ដុំនៃត្រីប្រភេទនេះ ក៏បានកើនឡើង ៣០%ផងដែរ បើធៀបនឹងឆ្នាំមុន ។
ភ្នាក់ងារនេសាទនិយាយថា សីតុណ្ហភាពទឹកសមុទ្រប្រែប្រួលបានធ្វើឲ្យត្រីទាំងនោះផ្លាស់ប្តូរជម្រក ដែលបង្កឲ្យទិន្នផលធ្លាក់ចុះ ៕
ចែករំលែកព័តមាននេះ