រាជធានីភ្នំពេញ ៖ បច្ចុប្បន្ន សហគ្រាសធុនតូច និងមធ្យម (SMEs) នៅកម្ពុជាមានប្រមាណ៥៣ម៉ឺនសហគ្រាស ។ វិស័យមួយនេះបានដើរតួនាទីយ៉ាងសំខាន់ក្នុងការចូលរួមជំរុញការអភិវឌ្ឍប្រទេសជាតិ ប៉ុន្តែមានបញ្ហាសំខាន់ធំៗចំនួន៤…
រាជធានីភ្នំពេញ ៖ បច្ចុប្បន្ន សហគ្រាសធុនតូច និងមធ្យម (SMEs) នៅកម្ពុជាមានប្រមាណ៥៣ម៉ឺនសហគ្រាស ។ វិស័យមួយនេះបានដើរតួនាទីយ៉ាងសំខាន់ក្នុងការចូលរួមជំរុញការអភិវឌ្ឍប្រទេសជាតិ ប៉ុន្តែមានបញ្ហាសំខាន់ធំៗចំនួន៤ ដែលធ្វើឱ្យ SMEs ក្នុងស្រុកនៅទ្រឹង និងគ្មានសន្ទុះទៅមុខ ។ នេះបើតាមលោក ហេង សុខគង់ រដ្ឋលេខាធិការក្រសួងឧស្សាហកម្ម និងសិប្បកម្ម បានលើកឡើងក្នុងវេទិកាសប្តាហ៍សហគ្រិនពិភពលោក កាលពីថ្ងៃទី១៩ វិច្ឆិកា ម្សិលមិញ នៅមជ្ឈមណ្ឌលសហប្រតិបត្តិការកម្ពុជា-ជប៉ុន។
លោករដ្ឋលេខាធិការបន្ដថា បន្ទាប់ពីវិទ្យាស្ថានអភិវឌ្ឍន៍ធនធានកម្ពុជា (CDRI) សិក្សាកន្លងមកឃើញថា មានមូលហេតុចំនួន៤ ដែលធ្វើឱ្យ SMEs របស់កម្ពុជានៅទ្រឹង និងពេលខ្លះ វាមិនសូវទៅមុខ ។
លោកបញ្ជាក់ថា ៖« កត្ដាទាំងនោះរួមមាន ១-តម្លៃអគ្គិសនី គឺអ្នកណាក៏លើកឡើងដែរថា ថ្លៃភ្លើងនៅស្រុកខ្មែរថ្លៃជាងគេ បើធៀបនៅក្នុងតំបន់។ ២-បញ្ហាទីផ្សារនិងអតិថិជន គឺមានការពិបាកក្នុងការប្រមូលលុយពីអតិថិជន និងការប្រកួតប្រជែងកើនឡើងខ្ពស់ ។ ៣-បញ្ហាធនធានមនុស្ស បើខ្វះធនធានមនុស្ស ក៏មិនអាចឱ្យក្រុមហ៊ុនរីកចម្រើនទៅមុខបានដែរ និង៤-បញ្ហាផលិតផលនិងសេវា គឺតម្លៃវត្ថុធាតុដើមចេះតែកើនឡើង ដែលផលិតបានហើយលក់បានថោក » ។
ដើម្បីលើកកម្ពស់វិស័យនេះនាពេលបច្ចុប្បន្ននិងអនាគត លោក ហេង សុខគង់ បានលើកឡើងថា SMEs ក្នុងស្រុកទាមទារឱ្យដៃគូសហការគ្នាបានល្អ និងការគ្រប់គ្រងត្រូវកាត់ផ្តាច់ចេញពីអាជីវកម្មបែបគ្រួសារ ។ ចំណែករាជរដ្ឋាភិបាលត្រូវបញ្ចុះតម្លៃភ្លើងឱ្យចុះមកដល់កម្រិតអតិបរមានៅឆ្នាំ២០១៨ ធ្វើយ៉ាងណា ឱ្យការប្រកួតប្រជែងគ្នារបស់ SMEs មានភាពស្មើគ្នាទាំងនៅលើការបង់ពន្ធ និងការធ្វើអាជីវកម្ម, បន្ថែមនូវព័ត៌មានដល់ SMEs មានលទ្ធភាពសិក្សាឈ្វេងយល់ពីទីផ្សារ ដឹងពីបច្ចេកវិទ្យាថ្មីៗ និងដឹងអ្វីខ្លះដែលអាចឱ្យយើងជំរុញការអភិវឌ្ឍបាន ។ លើសពីនេះ ចំណុចសំខាន់ ត្រូវបញ្ចុះតម្លៃទៅលើវត្ថុធាតុដើម ដែលនៅពេលបច្ចុប្បន្ននេះ យើងបានចុះ MOU ចំនួន២ ដោយបង្កើតជាកន្លែងផលិតវត្ថុធាតុដើម ដែលត្រៀមធ្វើនៅខេត្តតាកែវ កំពង់ឆ្នាំង និងកំពង់ចាម ។
ដោយមើលឃើញថា SMEs ក្នុងស្រុកនៅមានការយល់ដឹងពុំទាន់ច្បាស់លាស់ បើតាមប្រធានសមាគមសហគ្រិនវ័យក្មេងកម្ពុជា មានប្រសាសន៍ថា ទិវាសប្តាហ៍សហគ្រិនពិភពលោក ធ្វើឡើងនៅកម្ពុជានេះ មានគោលបំណងបំផុសគំនិតដល់យុវជនកម្ពុជាឱ្យបានយល់កាន់តែច្បាស់ និងចេះស្វែងរក ឬបង្កើតគំនិតថ្មីៗ ។
លោក គួច ផេង ប្រធានសមាគមរូបនេះបានមានប្រសាសន៍ថា ៖«ទិវាសប្តាហ៍សហគ្រិនពិភពលោក ធ្វើឡើងក្នុងគោលបំណងបំផុសគំនិតដល់យុវជនកម្ពុជាឱ្យបានយល់ពីសហគ្រិនភាពកាន់តែច្បាស់ជាងមុន ។ លើសពីនេះ យើងចង់ផ្សារភ្ជាប់យុវជនកម្ពុជាដើម្បីស្វែងរកគំនិតថ្មីៗ » ។
លោកលើកឡើងថា កម្មវិធីសប្តាហ៍សហគ្រិនពិភពលោក២០១៧ ពាំនាំមកជាមួយនូវប្រធានបទនៃកិច្ចពិភាក្សាក្នុងវិស័យធុរកិច្ច ដូចជា កាតាលីករនៃការរីកចម្រើននៅក្នុងមីក្រូសហគ្រាស និងសហគ្រាសធុនតូច មធ្យម(MSME), ប្រព័ន្ធអេកូឡូស៊ីនៃ MSME, ក្រមសីលធម៌ និងអភិបាលកិច្ចនៃពាណិជ្ជកម្ម, កិច្ចពិភាក្សាទៅលើនិរន្តរភាព និងភាពរីកចម្រើននៃMSME ជាដើម ៕
ចែករំលែកព័តមាននេះ