រាជធានីភ្នំពេញ ៖ វៀតណាមបានក្លាយជាដៃគូវិនិយោគធំមួយរបស់កម្ពុជាក្នុងរយៈពេលប៉ុន្មានឆ្នាំចុងក្រោយនេះ ដោយបច្ចុប្បន្ន វៀតណាមបានវិនិយោគនៅកម្ពុជា កើនទឹកប្រាក់ដល់ជិត៣ពាន់លានដុល្លារអាមេរិក និងមានគម្រោងសរុបចំនួន១៩០គម្រោង ។
មានប្រសាសន៍ក្នុងពិធីបើកវេទិកាពាណិជ្ជកម្ម និងវិនិយោគវៀតណាម-កម្ពុជា នាព្រឹកថ្ងៃទី២០ វិច្ឆិកា នៅរាជធានីភ្នំពេញ លោក ដូ វឹក ហឹង អនុប្រធាននាយកដ្ឋានទីផ្សារអាស៊ី-អាហ្វ្រិក នៃក្រសួងឧស្សាហកម្ម និងពាណិជ្ជកម្មវៀតណាមបានលើកឡើងថា មកទល់បច្ចុប្បន្ន មានគម្រោងចំនួន១៩០របស់វៀតណាម ដែលបានធ្វើវិនិយោគនៅកម្ពុជា ដោយមានទឹកប្រាក់ចំនួនជិត៣ពាន់លានដុល្លារអាមេរិក ។
លោកបន្តថា ៖« សកម្មភាពវិនិយោគ និងការប្រកបអាជីវកម្មរបស់សហគ្រាសវៀតណាមនៅកម្ពុជា ត្រូវបានទទួលការវាយតម្លៃខ្ពស់ពីថ្នាក់ដឹកនាំកម្ពុជា ដោយបានរួមចំណែកយ៉ាងសកម្មក្នុងការអភិវឌ្ឍកម្ពុជានាពេលកន្លងមក »។
លោកបន្តថា ចំណែកការវិនិយោគពីកម្ពុជា ទៅកាន់វៀតណាមវិញ ក៏មានការកើនឡើងផងដែរ ដោយមានគម្រោងចំនួន១៨ ក្នុងទឹកប្រាក់ចំនួន៥៨លានដុល្លារអាមេរិក ស្របពេលទំហំពាណិជ្ជកម្មទ្វេភាគី ក៏បានសម្រេចជាមធ្យមប្រមាណ៣ពាន់លានដុល្លារអាមេរិកផងដែរក្នុង១ឆ្នាំ ។
ប្រធាននាយកដ្ឋាននាំចេញ-នាំចូលនៃក្រសួងពាណិជ្ជកម្មកម្ពុជា លោក ហូ ស៊ីយ៉ុង បានថ្លែងថា ទំហំពាណិជ្ជកម្មទ្វេភាគីនៃប្រទេសទាំងពីរ ដែលកើនឡើងជាលំដាប់នេះ ដោយសារកិច្ចសហប្រតិបត្តិការល្អរវាងរដ្ឋាភិបាល និងវិស័យឯកជននៃប្រទេសទាំងពីរ ។
លើសពីនេះទៀត ក្រោមការដឹកនាំដ៏ល្អរបស់ប្រមុខរាជរដ្ឋាភិបាលធ្វើឲ្យទំនាក់ទំនងទាំងផ្នែកនយោបាយ សេដ្ឋកិច្ច ពាណិជ្ជកម្ម និងសង្គម រវាងកម្ពុជា-វៀតណាមកាន់តែមានភាពល្អប្រសើរពីមួយឆ្នាំទៅមួយឆ្នាំ ។
លោកឧកញ៉ា លឹម ហេង អនុប្រធានសភាពាណិជ្ជកម្មកម្ពុជា បានថ្លែងថា ការវិនិយោគរវាងប្រទេសវៀតណាម និងទំហំពាណិជ្ជកម្មជាមួយកម្ពុជា កាន់តែមានភាពល្អប្រសើរឡើង ហើយអ្វីដែលយើងខិតខំប្រឹងប្រែងសព្វថ្ងៃនេះ គឺចង់ឲ្យគេមកបណ្ដាក់ទុនវិនិយោគកាន់តែច្រើន នៅពេលគេមកវិនិយោគហើយ យើងត្រូវធ្វើយ៉ាងណា ឲ្យពួកគេមានទំនុកចិត្ត និងផ្ដល់ភាពកក់ក្ដៅដល់ពួកគេផងដែរ ។
លោកបន្តថា បើនិយាយពីទំហំពាណិជ្ជកម្មកម្ពុជា-វៀតណាម ដែលមានគោលដៅសម្រេចឲ្យបាន៥ពាន់លានដុល្លារ យើងនឹងអាចសម្រេចបាន ដោយសារកម្ពុជានាំចេញកសិផលភាគច្រើនទៅវៀតណាម ហើយវៀតណាមក៏បាននាំចូលច្រើនមកកម្ពុជាផងដែរ ។
លោកឧកញ៉ាបន្តថា ៖« បច្ចុប្បន្ន សេដ្ឋកិច្ចនាំមុខនយោបាយហើយ ព្រោះបើចង់បានទំនាក់ទំនងនយោបាយល្អ លុះត្រាតែមានការធ្វើពាណិជ្ជកម្មល្អ ដូចគា្ននឹងអ្វីដែលប្រទេសធំៗបានចាប់ដៃជាមួយអាស៊ាន គឺចង់ពង្រីកទំហំពាណិជ្ជកម្ម » ។ លោកបន្ថែមថា ៖« បើចង់បានទំនាក់ទំនងនយោបាយល្អ តែមិនជួយសេដ្ឋកិច្ចដល់គេ ទំនាក់ទំនងនយោបាយក៏មិនល្អផងដែរ » ៕
ចែករំលែកព័តមាននេះ