កំពង់ធំ ៖ ឧបទ្ទវហេតុមួយបានកើតឡើងកាលវេលាម៉ោង១០និង៥០នាទីយប់ ថ្ងៃទី២០ ខែវិច្ឆិកា ឆ្នាំ២០១៧ នៅលើកំណាត់ផ្លូវជាតិលេខ៦ ចន្លោះគីឡូម៉ែត្រលេខ ១៩៤-១៩៥ ស្ថិតក្នុងភូមិសានគរ(ខ)…
កំពង់ធំ ៖ ឧបទ្ទវហេតុមួយបានកើតឡើងកាលវេលាម៉ោង១០និង៥០នាទីយប់ ថ្ងៃទី២០ ខែវិច្ឆិកា ឆ្នាំ២០១៧ នៅលើកំណាត់ផ្លូវជាតិលេខ៦ ចន្លោះគីឡូម៉ែត្រលេខ ១៩៤-១៩៥ ស្ថិតក្នុងភូមិសានគរ(ខ) ឃុំសានគរ ស្រុកកំពង់ស្វាយ ខេត្តកំពង់ធំ ដែលបង្កឡើងរវាងរថយន្តបុកម៉ូតូក្នុងទិសដៅផ្ទុយគ្នា បណ្ដាលឲ្យរបួសធ្ងន់មនុស្ស២នាក់ ។
បើយោងតាមប្រភពពីកន្លែងកើតហេតុប្រាប់ថា នៅមុនពេលកើតហេតុ គេឃើញរថយន្តម៉ាកកាមរីគូទស្វិតមួយគ្រឿង ពណ៌ផ្ទៃមេឃ ពាក់ស្លាកលេខ ឃ-៨៨៩៤ ភព២ បើកបរនៅក្នុងទិសដៅពីកើតទៅលិច ក្នុងល្បឿនយ៉ាងលឿន លុះមកដល់ចំណុចកើតហេតុខាងលើ រថយន្តបង្កក៏បានបើកវ៉ាជែងរថយន្តមួយគ្រឿងទៀតក្នុងស្ថានភាពគ្រោះថ្នាក់ ហើយក៏បានជ្រុលចង្កូតទៅបុកនឹងម៉ូតូម៉ាកហុងដាC១២៥ ពណ៌ខ្មៅ ពាក់ស្លាកលេខ កំពង់ធំ ១X-៧២៣២ បើកបរពីលិចទៅកើតបញ្ច្រាសទិសគ្នាយ៉ាងពេញទំហឹង បណ្ដាលឲ្យខ្ចេចម៉ូតូ និងរងរបួសធ្ងន់២នាក់ បន្ទាប់ពីបង្ករហេតុរួច អ្នកបើកបររថយន្តបានចុះរត់គេចខ្លួនបាត់ ។
ជនរងគ្រោះអ្នកបើកបរម៉ូតូឈ្មោះ ចាន់ សាវឿន ភេទប្រុស អាយុ២៣ឆ្នាំ នៅភូមិស្រែធ្នង់ ឃុំរមណី ស្រុករវៀង ខេត្តព្រះវិហារ (របួសធ្ងន់មានពាក់មួកសុវត្ថិភាព) និងអ្នករួមដំណើរជាមួយម្នាក់ទៀត សមត្ថកិច្ចនៅមិនស្គាល់ឈ្មោះនៅឡើយ ពីព្រោះរងរបួសធ្ងន់ពេក (មានពាក់មួកសុវត្ថិភាដូចគ្នា) ជនរងគ្រោះទាំងពីរនាក់ត្រូវបានបញ្ជូនទៅសង្គ្រោះនៅមន្ទីរពេទ្យ ។
សមត្ថកិច្ចបញ្ជាក់ថា ករណីគ្រោះថ្នាក់ចរាចរខាងលើនេះ បង្កឡើងដោយអ្នកបើកបររថយន្ត បើកវ៉ាជែងក្នុងស្ថានភាពគ្រោះថ្នាក់ វត្ថុតាងយកមករក្សាទុកនៅអធិការដ្ឋាននគរបាលស្រុកកំពង់ស្វាយ ដើម្បីបំពេញសំណុំបែបបទចាត់ការតាមនីតិវិធី ៕
ចែករំលែកព័តមាននេះ