រាជធានីភ្នំពេញ ៖ ជាមួយគោលដៅបង្កើនប្រសិទ្ធភាពនៃការប្រមូលពន្ធ អគ្គនាយកដ្ឋាន
ពន្ធដារបានផ្សព្វផ្សាយអំពីការដាក់ឲ្យដំណើរការបង់ប្រាក់ពន្ធ តាមប្រព័ន្ធអេឡិចត្រូនិកថ្មីចំនួន២ គឺប្រព័ន្ធអេឡិចត្រូនិក (E-payment) សម្រាប់ប្រកាសការបង់ប្រាក់ពន្ធ និងប្រព័ន្ធអេឡិចត្រូនិក (E-Filing) សម្រាប់ដំណើរការនៃការដាក់លិខិតប្រកាសបង់ពន្ធ ។
ប្រតិភូរាជរដ្ឋាភិបាល ទទួលបន្ទុកជាអគ្គនាយកនៃអគ្គនាយកដ្ឋានពន្ធដារ លោក គង់ វិបុល បានថ្លែងនៅក្នុងសិក្ខាសាលា ស្តីពីកាតព្វកិច្ចពន្ធលើប្រាក់ចំណេញប្រចាំឆ្នាំ និងការកែទម្រង់ប្រព័ន្ធរដ្ឋបាលសារពើពន្ធ (E-Payment) នាព្រឹកថ្ងៃទី២០ វិច្ឆិកា ថា ការរៀបចំសិក្ខាសាលានេះ គឺក្នុងគោលបំណងផ្សព្វផ្សាយឲ្យកាន់តែទូលំទូលាយ និងបានជ្រួតជ្រាបដល់គ្រប់មជ្ឈដ្ឋានអ្នកជាប់ពន្ធ ជាពិសេស ដើម្បីឈ្វេងយល់ឲ្យបានកាន់តែស៊ីជម្រៅថែមទៀតចំពោះកាតព្វកិច្ចសារពើពន្ធរបស់សហគ្រាស និងការប្រកាសបង់ពន្ធលើប្រាក់ចំណូល ដែលនឹងត្រូវចូលមកដល់នាខែមករា ឆ្នាំ២០១៨ ឆាប់ៗខាងមុខនេះ ។
លោកបន្តថា ៖« អ្វីដែលសំខាន់ជាងនេះទៅទៀត អគ្គនាយកដ្ឋានពន្ធដារចង់ផ្សព្វផ្សាយអំពីការដាក់ឲ្យដំណើរការបង់ប្រាក់ពន្ធតាមប្រព័ន្ធអេឡិចត្រូនិក (E-payment) ដែលបានរៀបចំរួចរាល់ និងដាក់ឱ្យដំណើរការចាប់ពីពេលនេះតទៅ » ។ លោកបន្តថា ៖« ការដំណើរការនៃការដាក់លិខិតប្រកាសបង់ពន្ធតាមប្រព័ន្ធអេឡិចត្រូនិក (E-Filing) គ្រោងនឹងដាក់ឲ្យដំណើរការនៅដើមឆ្នាំ២០១៨ខាងមុខ ហើយប្រព័ន្ធទាំងពីរនេះ គឺបង្កលក្ខណៈងាយស្រួលគ្រប់បែបយ៉ាងជូនអ្នកជាប់ពន្ធ និងផ្តល់សេវាជូនអ្នកជាប់ពន្ធឲ្យកាន់តែប្រសើរឡើងថែមទៀត » ។
លោក គង់ វិបុល បន្ថែមថា ទាក់ទិននឹងការខិតខំប្រឹងប្រែងពង្រីកប្រព័ន្ធផ្តល់សេវាឲ្យកាន់តែងាយស្រួលនេះ វារួមចំណែកខ្ពស់ក្នុងការពង្រឹងការអនុវត្តកាតព្វកិច្ចសារពើពន្ធ។ តាមរយៈសិក្ខាសាលានេះដែរ សិក្ខាកាមទាំងអស់ នឹងទទួលបានចំណេះដឹងថ្មីៗបន្ថែមទៀត ស្តីពីកាតព្វកិច្ចប្រកាសបង់ពន្ធលើប្រាក់ចំណូលប្រចាំឆ្នាំរបស់ខ្លួន ដោយអគ្គនាយកដ្ឋានពន្ធដារសង្ឃឹមយ៉ាងមុតមាំថា ក្រោយពីសិក្ខាសាលានេះបានផ្សព្វផ្សាយរួចរាល់នោះ អ្នកជាប់ពន្ធ ក៏ដូចជាភ្នាក់ងារសេវាកម្មពន្ធដារទាំងអស់បានយល់កាន់តែច្បាស់នូវកាតព្វកិច្ចពន្ធដារ និងនីតិវិធីនៃការប្រកាសបង់ពន្ធលើប្រាក់ចំណូលប្រចាំឆ្នាំ២០១៧ ។
លោក ង៉ែត ជូ ទីប្រឹក្សាជាន់ខ្ពស់ផ្នែកសេដ្ឋកិច្ច និងអភិវឌ្ឍន៍នៃក្រុមហ៊ុន Emerging Market Consulting បានថ្លែងថា ការកែទម្រង់ និងរៀបចំប្រព័ន្ធប្រមូលពន្ធបែបថ្មីនេះ ពិតជារឿងល្អ ដោយវាជួយបង្កើនប្រសិទ្ធភាពនៃការប្រមូលពន្ធ ហើយចំណេញទាំងពេលវេលាសម្រាប់អ្នកបង់ពន្ធ អ្នកប្រមូលពន្ធ និងកាត់បន្ថយថ្លៃដើមនៃការប្រមូលពន្ធ ។ លោកបន្តថា ប្រព័ន្ធបែបនេះ ជួយធ្វើឲ្យការប្រមូលពន្ធកាន់តែមានតម្លាភាពផងដែរ ព្រោះវាជួយឲ្យការបង់ពន្ធបានលឿន និងមានភាពវិជ្ជមានច្រើនសម្រាប់ការប្រមូលពន្ធ។
លោកបន្តថា ៖« ការកែទម្រង់ការប្រមូលពន្ធរបស់អគ្គនាយកដ្ឋានពន្ធដារមានផលវិជ្ជមានច្រើន ហើយខ្ញុំសូមលើកទឹកចិត្តឲ្យមានការអនុវត្តជាបន្តទៀត » ។ លោកបន្តថា ៖« ប៉ុន្តែអ្វីដែលគួរធ្វើបន្ថែម គឺអគ្គនាយកដ្ឋានពន្ធដារគួរជួយលើកទឹកចិត្តវិស័យសហគ្រាសធុនតូច និងមធ្យមបន្ថែមទៀត ជាពិសេស សហគ្រាសណាដែលផ្តល់ការងារច្រើនដល់ប្រជាពលរដ្ឋ » ។
លោកបណ្ឌិត ម៉ី កល្យាណ ទីប្រឹក្សាជាន់ខ្ពស់ឧត្តមក្រុមប្រឹក្សាសេដ្ឋកិច្ចជាតិ បានថ្លែងថា ការកែទម្រង់ការប្រមូលពន្ធកន្លងមកនេះ ទទួលបានលទ្ធផលល្អ ប៉ុន្តែលោកលើកទឹកចិត្តឲ្យខិតខំបន្ថែមទៀត ដើម្បីជំរុញឲ្យការប្រមូលពន្ធបានកាន់តែច្រើន ។
លោកបន្តថា ៖« បច្ចុប្បន្ន យើងប្រមូលពន្ធបានច្រើនហើយ ប៉ុន្តែយើងនៅមានលទ្ធភាពប្រមូលបានច្រើនថែមទៀត ។ ហេតុនេះ ទាមទារឲ្យមានការប្តេជ្ញាចិត្ត និងឆន្ទៈអនុវត្តការងារច្រើនថែមទៀតពីមន្ត្រីពន្ធដារ » ៕
ចែករំលែកព័តមាននេះ