ខេត្តកំពត ៖ តាមការស្រាជ្រាវ និងស៊ើបអង្កេតលើករណីឃាតកម្មសម្លាប់បុរសម្នាក់ កាត់ក្បាលយកទៅបាត់ កើតឡើងនៅក្នុងខ្ទមដីចាំចម្ការ ស្ថិតក្នុងភូមិដំណាក់ត្រយឹង ឃុំតាកែន ស្រុកឈូកខេត្តកំពត បង្កភ្ញាក់ផ្អើលនៅរសៀលថ្ងៃទី២០ វិច្ឆិកា នោះ ត្រូវបានរកឃើញថា ការសម្លាប់ជនរងគ្រោះនេះ គឺមិនមែនជាករណីប្លន់ទេ អាចជារឿងគំនុំច្រើនជាង ពីព្រោះអ្នកភូមិស្ទើរតែទាំងអស់ មិនសូវរាប់អានជនរងគ្រោះនេះទេ ព្រោះគេសង្ស័យគាត់ជាមនុស្សចេះធ្វើអំពើអាបធ្មប់ ។ នេះបើតាមឱ្យដឹងលោកវរសេនីយ៍ឯក សៅ សំអឿន ស្នងការរងទទួលផែនព្រហ្មទណ្ឌខេត្ត ។
គួរបញ្ជាក់ថា បុរងរងគ្រោះដែលស្លាប់នេះ មានឈ្មោះអយ សុខ អាយុ៦២ឆ្នាំ ។ ប្រភពឱ្យដឹងទៀតថា កន្លងមក នៅក្នុងភូមិនេះ អ្នកស្រុកគឺបានស្លាប់ជាញឹកញាប់ និងភាគច្រើនមានអាយុក្មេងៗ ដែលពួកគាត់ដាក់ការសង្ស័យទៅលើជនរងគ្រោះរូបនេះ។
ជាមួយគ្នានេះដែរ មានប្រភពពីក្រុមគ្រួសាររបស់ជនរងគ្រោះបានឱ្យដឹងដែរា ជនរង គ្រោះ ពុំសូវមានការចុះសំរុងក្នុងគ្រួសារផងដែរ ទើបជនរងគ្រោះទៅសង់ខ្ទមចាំដីស្រែនិង ចំការនៅកណ្តាលព្រៃឆ្ងាយ ពីផ្លូវចម្ងាយប្រមាណជាង៣គីឡូម៉ែត្រ។
សមត្ថកិច្ចបញ្ជាក់ថា ជុំវិញការចុះស្រាវជ្រាវនិងស៊ើបអង្កេតលើករណីឃាតកម្មនេះហាក់ដូចការទទួលព័ត៌មានពីការសហការជាមួយប្រជាពលរដ្ឋ នៅក្នុងតំបន់កើតហេតុនេះ មានតិចណាស់ គឺភាគច្រើនគេមានគំនុំមកលើជនរងគ្រោះភាគច្រើន ដោយសារកន្លងមក អ្នកភូមិមានការភ័យខ្លាចពីការសង្ស័យ មកលើជនរងគ្រោះថា ជាអ្នកចេះធ្វើអំពើអាបធ្មប់ ។ ម្លោះហើយ គេពុំសូវរាប់អានហើយគេពុំហ៊ានទៅជិតទៀតផង។
សមត្ថកិច្ចបានបន្តថា បញ្ហាជំនឿរបស់ពលរដ្ឋជារឿងផ្សេង ចំពោះករណីឃាតកម្មពាក់
ព័ន្ធជាមួយករណីព្រហ្មទណ្ឌ ជារឿងផ្សេង ។ ដូច្នេះ សមត្ថកិច្ចនៅតែដុតដៃដុតជើងក្នុងការស៊ើបអង្កេតក្នុងរឿងនេះ ដើម្បីវែកមុខរកជនដៃដល់ឲ្យឃើញ និងយកមកផ្តន្ទាទោសទៅតាមផ្លូវច្បាប់ ។
ចែករំលែកព័តមាននេះ