ខេត្តបន្ទាយមានជ័យ ៖ រថយន្ត១គ្រឿងបើកកៀរអ្នកជិះម៉ូតូ បណ្ដាលឲ្យដួលចូលរថយន្តកិនស្លាប់ម្នាក់ និងម្នាក់ទៀតរបួសធ្ងន់ ដែលកើតឡើងនៅវេលាម៉ោង០៦និង៣០នាទី ថ្ងៃទី១៩ ខែវិច្ឆិកា ឆ្នាំ២០១៧ តាមបណ្ដោយផ្លូវជាតិលេខ៥ ស្ថិតមុខផ្សារទឹកផ្លាភូមិ សង្កាត់ទឹកផ្លា ក្រុងសិរីសោភ័ណ ។
ជនរងគ្រោះដែលស្លាប់មានឈ្មោះ ស្រី ការ ហៅទី ភេទស្រី អាយុ២៣ឆ្នាំ និងជនរងគ្រោះដែលរបួសធ្ងន់ឈ្មោះ ហូ ទី ភេទស្រី អាយុ២១ឆ្នាំ ស្នាក់នៅភូមិ១ សង្កាត់ព្រះពន្លា ក្រុងសិរីសោភ័ណ មានស្រុកកំណើតខេត្តបាត់ដំបង ។
អ្នកឃើញហេតុការបានប្រាប់ថា ៖ នៅពេលគ្រោះថ្នាក់ចរាចរកើតឡើងគឺមានរថយន្ត១គ្រឿងម៉ាក់ហ៊ីយ៉ានដាយកូរ៉េ ពាក់ស្លាក់លេខ ភ្នំពេញ ៣D-៦១២៥ អ្នកបើកបរមិនស្គាល់អត្តសញ្ញាណ បានបើកបររថយន្តក្នុងល្បឿនលឿនក្នុងទិសដៅពីលិចទៅកើត ហើយបានកៀរជនរងគ្រោះដែលជិះម៉ូតូម៉ាក់ហុងដា ពាក់ស្លាកលេខ ភ្នំពេញ ១CY-២១១២ ឌុបគ្នា២នាក់ ស្របទិសជាមួយរថយន្ត បានកៀរដួលចូលរថយន្តកិនស្លាប់ម្នាក់ និងរងរបួសធ្ងន់ ត្រូវបានបញ្ជូនទៅសង្គ្រោះបន្ទាន់ភ្លាមៗ ។
ក្រោយពេលគ្រោះថ្នាក់ចរាចរកើតឡើង មន្ត្រីនគរបាលចរាចរណ៍ខេត្តបន្ទាយមានជ័យ ចុះទៅពិនិត្យវាស់វែងឃើញថា គ្រោះថ្នាក់ចរាចរដែលកើតឡើងបណ្ដាលមកពីរថយន្តបើកក្នុងល្បឿនលឿនទៅកៀរអ្នកជិះម៉ូតូ បណ្ដាលឲ្យដួលកិនស្លាប់ម្នាក់ និងរបួសធ្ងន់ម្នាក់ ចំណែកអ្នកបើកបរត្រូវបានរត់គេចខ្លួនបាត់ ៕
ចែករំលែកព័តមាននេះ