រាជធានីភ្នំពេញ៖ ក្រោយពីអនុប្រធានម្នាក់ និងសមាជិក២រូបរបស់គណៈកម្មាធិការជាតិរៀបចំការបោះឆ្នោត ហៅកាត់ថា (គ.ជ.ប) បានដាក់ពាក្យលាឈប់ពីស្ថាប័នបោះឆ្នោតមួយនេះជាផ្លូវការកាលពីថ្ងៃទី ២០ វិច្ឆិកា ឆ្នាំ២០១៧នេះ រដ្ឋសភានឹងកោះប្រជុំនៅសប្តាហ៍ក្រោយ…
រាជធានីភ្នំពេញ៖ ក្រោយពីអនុប្រធានម្នាក់ និងសមាជិក២រូបរបស់គណៈកម្មាធិការជាតិរៀបចំការបោះឆ្នោត ហៅកាត់ថា (គ.ជ.ប) បានដាក់ពាក្យលាឈប់ពីស្ថាប័នបោះឆ្នោតមួយនេះជាផ្លូវការកាលពីថ្ងៃទី ២០ វិច្ឆិកា ឆ្នាំ២០១៧នេះ រដ្ឋសភានឹងកោះប្រជុំនៅសប្តាហ៍ក្រោយ ដើម្បីបោះឆ្នោតជ្រើសរើសអ្នកថ្មីជំនួសតំណែងទំនេរនេះ ។ នេះបើតាមការឱ្យដឹងរបស់លោក ឡេង ប៉េងឡុង អ្នកនាំពាក្យរដ្ឋសភាជាតិ។
លោក ឡេង ប៉េងឡុង បានបន្តថា សម្រាប់បេក្ខភាពសម្រាប់ការបោះឆ្នោតនាពេលខាងមុខ គឺមិនមែនមកពីគណបក្សដឹកនាំរាជរដ្ឋាភិបាលនោះទេ គឺមានន័យថា នឹងត្រូវជ្រើសរើសចេញពីគណបក្សដែលមានអាសន្នៈនៅរដ្ឋសភា។ ដូច្នេះរដ្ឋសភានៅរង់ចាំឱ្យស្ថាប័ន គ.ជ.ប ធ្វើការអនុវត្តន៍ការបែងចែកអាសន្នៈទៅគណបក្សថ្មីចំនួន ៦ គណបក្សដែលនឹងទទួលបានអាសន្នៈរបស់គណបក្សសង្គ្រោះជាតិដែលត្រូវបានរំលាយជាផ្លូវការដោយអំណាចសាលដីការបស់សាលាកំពូលចុះថ្ងៃទី ១៦ វិច្ឆិកា ថ្មីៗនេះ។
សម្រាប់ការបែងចែកអាសន្នៈជូនទៅគណបក្សនយោបាយចំនួន ៦ នោះ គឺ គ.ជ.ប នឹងត្រូវបញ្ចប់ត្រឹមថ្ងៃទី ២៣ វិច្ឆិកា ដើម្បីផ្ញើជូនរដ្ឋសភានូវការអនុវត្តការបែងចែកនេះ ។
សូមបញ្ជាក់ស្ថាប័ន គ.ជ.ប មានសមាសភាព ៩ រូប ដែលទទួលបានអាណត្តិ ៥ ឆ្នាំ ។ សមាសភាព ៤ រូបត្រូវជ្រើសរើសដោយគណបក្សដឹកនាំរាជរដ្ឋាភិបាល និង ៤ រូបត្រូវជ្រើសរើសចេញពីគណបក្សមានអាសន្នៈក្នុងរដ្ឋសភាដែលមិនចូលរួមក្នុងរាជរដ្ឋាភិបាល និង ១ រូបត្រូវជ្រើសរើសដោយមានការព្រមព្រៀងគ្នារវាងគណបក្សទាំងអស់ដែលមានអាសន្នៈក្នុងរដ្ឋសភា ។
យ៉ាងណាមិញសមាសភាព ៣ រូបក្នុងចំណោម ៤ រូប នៃអតីតគណបក្សសង្គ្រោះជាតិ រួមមានលោក គួយ ប៊ុនរឿន អនុប្រធាន គ.ជ.ប លោក រ៉ុង ឈុន និងលោកស្រី តែ ម៉ានីរ៉ុង ជាសមាជិក គ.ជ.ប បានសរសេរលិខិតជាផ្លូវការជូនសម្តេចប្រធានរដ្ឋសភានាថ្ងៃទី ២០ វិច្ឆិកា ប្រកាសលាលែងពីតំណែងជាផ្លូវការ ។
ចែករំលែកព័តមាននេះ