រាជធានីភ្នំពេញ ៖ យុវជនម្នាក់បានប្រើប្រាស់គ្រឿងញៀនរហូតញៀនដល់កម្រិតបែកថ្នាំលែងដឹងខុសត្រូវ លែងស្គាល់គុណស្គាល់ទោស លែងស្តាប់ដំបូន្មាន ព្រមទាំងវាយធ្វើបាបឪពុកម្តាយ និងបំផ្លិចបំផ្លាញទ្រព្យសម្បត្តិនៅក្នុងផ្ទះ ធ្វើឲ្យឪពុកម្ដាយរស់នៅក្នុងស្ថានភាពភ័យខ្លាចរាល់ថ្ងៃ។ ដោយអត់ទ្រាំទៅនឹងទង្វើដ៏លាមករបស់កូនតិរច្ឆានខាងលើលែងបានតទៅទៀតនោះ ទើបពួកគាត់សម្រេចចិត្តប្តឹងឲ្យនគរបាលចាប់ខ្លួនកូនប្រុសខាងលើនោះនាំយកទៅចាត់ការតាមច្បាប់ ដោយលែងស្ដាយស្រណោះតទៅទៀតហើយ បើមិនដូច្នោះទេពួកគាត់រស់នៅបៀមទុក្ខព្រួយគ្មានសេចក្ដីសុខនឹងគេឡើយ។ នគរបាលបានឲ្យដឹងថា ក្រោយពីទទួលបានពាក្យបណ្ដឹង កម្លាំងនគរបាលបានចុះទៅធ្វើការចាប់ខ្លួនជនអន្ធពាលម្នាក់នោះ កាលពីវេលាម៉ោង៤ និង៣០នាទីល្ងាច ថ្ងៃទី២០ ខែវិច្ឆិកា ឆ្នាំ២០១៧ នៅភូមិថ្មគោល៣ សង្កាត់ចោមចៅ២ ខណ្ឌពោធិ៍សែនជ័យ រាជធានីភ្នំពេញ។
កូនប្រុសអកត្តញ្ញូញៀនថ្នាំវាយម៉ែឪនេះឈ្មោះ សេង សុខា អាយុ២១ឆ្នាំ មុខរបរមិនពិតប្រាកដ ស្នាក់នៅក្នុងភូមិកើតហេតុ មានម្តាយឈ្មោះ សំ យ៉ា អាយុ៥១ឆ្នាំ មុខរបរមេផ្ទះ ឪពុកឈ្មោះ ស៊ិន ធូ អាយុ៤៨ឆ្នាំ មុខរបរលក់ត្រី។ ស្ត្រីជាម្តាយបានឲ្យរៀបរាប់ទាំងទឹកភ្នែកថា កាលពីមុនកូនប្រុសរបស់គាត់ម្នាក់នេះ មានការងារធ្វើជាសន្តិសុខ ពេលនោះគាត់គ្មានការព្រួយបារម្ភនោះទេ ព្រោះកូនប្រុសបានជួយរកប្រាក់បានមួយផ្នែកដែរ ប៉ុន្តែក្រោយមកបានចាប់ផ្ដើមប្រើប្រាស់គ្រឿងញៀន ហើយគាត់បានប្រៀនប្រដៅអប់រំណែនាំច្រើលើកច្រើនសារ ដើម្បីឲ្យកូនចៀសឆ្ងាយពីគ្រឿងញៀនដែរ ប៉ុន្តែកូនប្រុសម្នាក់នេះមិនបានស្ដាប់តាមឡើយ។
ទីបំផុតគេបានលង់ខ្លួនយ៉ាងជ្រៅទៅក្នុងថ្នាំញៀន និងបានញៀនយ៉ាងជោគជាំរហូតដល់បោះបង់ចោលការងារ ដើរលេងពាលាអាវាសែ មិនតែប៉ុណ្ណោះបានបង្កអំពើហិង្សារក្នុងគ្រួសារ វាយពួកគាត់ព្រមទាំងបំផ្លិចបំផ្លាញទ្រព្យសម្បត្តិនៅក្នុងផ្ទះថែមទៀត។ ប្រភពដដែលបានបន្តទៀតថា គាត់តូចចិត្តខ្លាំងណាស់ដែលមានកូនប្រុសមិនតាមគន្លងធម៌បែបនេះ ហើយក៏ខ្មាសអៀនអ្នកជិតខាងណាស់ដែរ ម្យ៉ាងទៀតរស់នៅក្នុងភាពភ័យខ្លាចរាល់ថ្ងៃទៀតផង។ ដោយសារតែកូនប្រព្រឹត្តនៅទង្វើរគួរឲ្យខ្លាចរាល់ថ្ងៃបែបនេះ ទើបពួកគាត់អត់ទ្រាំលែងបានតទៅទៀត ហើយហើយក៏ប្តឹងនគរបាលប៉ុស្ដិ៍ចោមចៅ២ឲ្យចុះទៅចាប់ខ្លួន ដើម្បីចាត់ការទៅតាមផ្លូវច្បាប់តែម្ដង៕
ចែករំលែកព័តមាននេះ