រាជធានីភ្នំពេញ ៖ ដីដុះមួយកន្លែង រួមជាមួយព្រៃត្រែង និងចំណតទូកនេសាទដែលចតត្រៀបត្រានៅជ្រោយចង្វារត្រើយខាងកើតហាក់កំពុងតែធ្វើឲ្យប៉ះពាល់ដល់សោភណ្ឌភាពរាជធានីភ្នំពេញនារដូវទឹកសម្រកនេះ ។
ភ្ញៀវទេសចរណ៍ជាតិ និងអន្តរជាតិដែលមកដើរកម្សាន្តនៅតាមច្រាំងទន្លេទទួចឲ្យអាជ្ញាធរខណ្ឌជ្រោយចង្វារ ក៏ដូចជារដ្ឋបាលរាជធានីភ្នំពេញជួយចាត់វិធានការណ៍ ដើម្បីលើកកម្ពស់សោភ័ណភាពរាជធានីភ្នំពេញដែលជាបេះដូងនៃព្រះរាជាណាចក្រកម្ពុជាឲ្យកាន់តែប្រសើរឡើង ។ អ្វីដែលកាន់តែសំខាន់នោះគឺថា ជ្រោយចង្វារត្រើយខាងកើតគឺជាទឹកដីក្រុងរណបថ្មី ជាដីមាស ដីពេជ្រដ៏មានសត្តានុពល ។
ភ្ញៀវទេសចរណ៍ជាតិម្នាក់ ដែលបានដើរកម្សាន្តតាមមាត់ច្រាំងទន្លេសាបខាងជ្រោយចង្វារត្រើយខាងកើតបានឲ្យដឹងថា ក្បាលជ្រោយចង្វារជាតំបន់មួយដែលគួរឲ្យគយគន់ ហើយកំពុងតែទាក់ទាញអ្នកទេសចរណ៍មកកម្សាន្តជាហូរហែរ ។
អ្នកទេសចរណ៍បានបន្តថា «នៅពេលដែលយើងមើលទៅទិសខាងលិច ឃើញព្រះបរមរាជវាំង មើលទិដ្ឋភាពកោះពេជ្រកំពុងតែអភិវឌ្ឍ ឃើញសំណង់ខ្ពស់ៗកំពុងតែឈរអណ្តែតខ្លួនទៅលើអាកាស ដែលបញ្ជាក់ថារាជធានីភ្នំពេញកំពុងតែអភិវឌ្ឍន៍យ៉ាងខ្លាំង »។
អ្នកទេសចរណ៍បន្តទៀតថា ចាប់តាំងពីគល់ស្ពានជ្រោយចង្វាររហូតដល់ក្បាលជ្រោយនារដូវទឹកសម្រកឃើញមានដីដុះជាប់មាត់ច្រាំងទន្លេ ដែលលាតសន្ទឹងពីច្រាំងរហូតដល់ផ្ទៃទឹកមិនតិចជាង១០០ម៉ែត្រនោះទេ ។
https://www.youtube.com/watch?v=Exe19ukyBY4
ចែករំលែកព័តមាននេះ