ប្រទេសអារ៉ាប៊ី សាអ៊ូឌីត-ប្រទេសអ៊ីរ៉ង់ ៖ ប្រទេសអារ៉ាប៊ី សាអ៊ូឌីត កាលពីថ្ងៃទី១៩ វិច្ឆិកា បានព្រមានថា ខ្លួននឹងមិនឱបដៃនៅស្ងៀមឡើយ ប្រឈមមុខនឹងនយោបាយឈ្លានពានរបស់អ៊ីរ៉ង់…
ប្រទេសអារ៉ាប៊ី សាអ៊ូឌីត-ប្រទេសអ៊ីរ៉ង់ ៖ ប្រទេសអារ៉ាប៊ី សាអ៊ូឌីត កាលពីថ្ងៃទី១៩ វិច្ឆិកា បានព្រមានថា ខ្លួននឹងមិនឱបដៃនៅស្ងៀមឡើយ ប្រឈមមុខនឹងនយោបាយឈ្លានពានរបស់អ៊ីរ៉ង់ ពេលកំពុងមានភាពតានតឹងខ្លាំងរវាងមហាអំណាចប្រជែងគ្នាទាំង២នៅមជ្ឈិមបូពា ។
នាឱកាសនៃកិច្ចប្រជុំវិសាមញ្ញមួយរបស់សម្ព័ន្ធអារ៉ាប់នៅក្រុងគែរអេហ្ស៊ីប តាមសំណើរបស់ក្រុងរីយ៉ាដ រដ្ឋមន្ត្រីការបរទេសអារ៉ាប៊ីសាអ៊ូឌីត លោក ADEL AL JUBEIR បានបញ្ចេញវោហាសាស្ត្រវាយប្រហារប្រឆាំងអ៊ីរ៉ង់ និងសម្ព័ន្ធមិត្តចង់និយាយសំដៅលើក្រុមហេសប៊ុលឡាហ៍លីបង់ និងពួកឧទ្ទាមហ៊ូធីយេម៉ែន ។
អារ៉ាប៊ី សាអ៊ូឌីត ស៊ុននីត និងអ៊ីរ៉ង់ ស៊ីអ៊ីត ដែលទំនាក់ទំនងការទូតរវាងប្រទេសទាំង២ត្រូវកាត់ផ្តាច់ចាប់តាំងពីខែមករា ឆ្នាំ២០១៦មក បានប្រឆាំងគ្នាក្នុងជម្លោះជាច្រើនក្នុងតំបន់ដែលរួមមានសង្គ្រាមនៅយេម៉ែន និងនៅស៊ីរី ព្រមទាំងលើសំណុំរឿងលីបង់ ។
ក្នុងសុន្ទរកថាមួយពេលប្រជុំពេញអង្គរបស់សម្ព័ន្ធអារ៉ាប់ លោក JUBEIR និយាយថា អារ៉ាប៊ី សាអ៊ូឌីត នឹងមិនឱបដៃនៅស្ងៀមឡើយប្រឈមមុខនឹងការឈ្លានពានរបស់អ៊ីរ៉ង់ ហើយនឹងពុំសំចៃការខិតខំប្រឹងប្រែងឡើយ ដើម្បីការពារសន្តិសុខជាតិរបស់ខ្លួន ។
កាលពីថ្ងៃទី៤ វិច្ឆិកា កងទ័ពអារ៉ាប៊ី សាអ៊ូឌីត បានស្ទាក់កម្ទេចពីលើព្រលានយន្តហោះក្រុងរីយ៉ាដនូវមីស៊ីល១គ្រាប់បាញ់ចេញដោយពួកឧទ្ទាមយេម៉ែន ។ អាជ្ញាធរអារ៉ាប៊ី សាអ៊ូឌីត អះអាងថា មីស៊ីលនេះផលិតនៅអ៊ីរ៉ង់ តែក្រុងតេហេរ៉ង់បានបដិសេធ ។ ចំណែករដ្ឋមន្ត្រីការបរទេសបារ៉ែនជាសម្ព័ន្ធមិត្តអារ៉ាប៊ី សាអ៊ូឌីត លោក CHEIKH KHALED BEN AHMAD AL KHALIFA វាយតម្លៃថា លីបង់ស្ថិតក្រោមការត្រួតត្រាទាំងស្រុងរបស់ក្រុមហេសប៊ុលឡាហ៍ ។
ក្នុងសេចក្តីប្រកាសចុងក្រោយមួយបន្ទាប់ពីកិច្ចប្រជុំ សម្ព័ន្ធអារ៉ាប់ បានថ្កោលទោសការបាញ់មីស៊ីលបាលីស្ទិកផលិតនៅអ៊ីរ៉ង់ចេញពីយេម៉ែន ហើយបរិហារថា នេះជាការឈ្លានពានជាក់ស្តែងមួយ ៕
ចែករំលែកព័តមាននេះ