ប្រទេសបារាំង ៖ ទូរទស្សន៍បារាំង BFMTV រាយការណ៍កាលពីថ្ងៃទី១៩ វិច្ឆិកា ថា ប៉ូលិសម្នាក់បានបាញ់សម្លាប់មនុស្ស៣នាក់ និងធ្វើឱ្យរបួស៣នាក់ទៀតជាមួយអាវុធរបស់គេមុនពេលធ្វើអត្ថឃាតកាលពីយប់ថ្ងៃទី១៨ វិច្ឆិកា…
ប្រទេសបារាំង ៖ ទូរទស្សន៍បារាំង BFMTV រាយការណ៍កាលពីថ្ងៃទី១៩ វិច្ឆិកា ថា ប៉ូលិសម្នាក់បានបាញ់សម្លាប់មនុស្ស៣នាក់ និងធ្វើឱ្យរបួស៣នាក់ទៀតជាមួយអាវុធរបស់គេមុនពេលធ្វើអត្ថឃាតកាលពីយប់ថ្ងៃទី១៨ វិច្ឆិកា នៅ VIEUX SARCELLES ជាសង្កាត់មួយស្ថិតនៅភាគខាងជើងក្រុងប៉ារីស ។
ទូរទស្សន៍នោះបន្តថា ប៉ូលិសរូបនេះដំបូងបានបាញ់សម្លាប់មនុស្ស២នាក់នៅតាមផ្លូវសាធារណៈមួយ ដែលពួកគេពុំមានទំនាក់ទំនងអ្វីទាំងអស់ជាមួយគ្នា រួចបន្ទាប់មកបានសម្លាប់ឪពុកក្មេករបស់ខ្លួន ហើយបាញ់ឱ្យរបួសប្រពន្ធគេ ម្តាយនាង និងប្អូនស្រីនាងនៅឯផ្ទះដែលភរិយាគេរស់នៅ ។
ចំណែកកាសែតបារាំង LE PARISIEN គូសបញ្ជាក់ថា ទីបំផុតប៉ូលិសរូបនោះបានសម្លាប់ខ្លួនឯងនៅសួនច្បារផ្ទះក្បែរឆ្កែមួយក្បាលរបស់គេ ។ ប៉ូលិសរូបនេះ ស្ថិតក្នុងកងឯកភាពប៉ូលិសការពារសន្តិសុខ និងធ្វើអន្តរាគមន៍នៃកងប៉ូលិសក្រុងប៉ារីស ។ កាសែត LE PARISIEN បន្តថា ការឈ្លោះទាស់ទែងគ្នាជាមួយប្រពន្ធអាចជាមូលហេតុនៃសោកនាដកម្ម នេះ ។
ការបាញ់សម្លាប់មនុស្សនោះកើតមានខណៈការធ្វើអត្តឃាតក្នុងជួរកងកម្លាំងប៉ូលិសបារាំងមានការកើនឡើង ។ ចាប់តាំងពីដើមឆ្នាំ២០១៧នេះមក ប៉ូលិសយ៉ាងតិច៤៦នាក់ និងតម្រួតបារាំង១៦នាក់បានធ្វើអត្តឃាត ៕
ចែករំលែកព័តមាននេះ