រាជធានីភ្នំពេញ ៖ នៅពេលសម្ភារប្រើប្រាស់ធ្វើពីដែក និងឈើមួយចំនួនមិនរឹងមាំ ឬពិបាកថែទាំ អាជីវករមួយចំនួនធំ ក៏ដូចជាអ្នកប្រើប្រាស់ផ្ទាល់ ម្ចាស់សហគ្រាស និងភោជនីយដ្ឋាន បានងាកទៅចាប់អារម្មណ៍ និងនិយមប្រើប្រាស់សម្ភារធ្វើពីអ៊ីណុកវិញ បើទោះជាវាថ្លៃជាងបន្ដិចក៏ដោយ ។
លើសពីនេះ សម្ភារប្រើប្រាស់ពីអ៊ីណុកមានច្រើនប្រភេទ ដែលបានដាក់លក់នៅតាមបណ្តោយផ្លូវសំខាន់ៗមួយចំនួនក្នុងរាជធានីភ្នំពេញ ។
លោក វេង សេង ម្ចាស់សិប្បកម្មអ៊ីណុកយីហោ វេង សេង បានឱ្យដឹងថា បច្ចុប្បន្ន តម្រូវការសម្ភារប្រើប្រាស់ធ្វើពីអ៊ីណុកមានច្រើន ទាំងនៅតាមលំនៅឋាន និងភោជនីយដ្ឋាន ។ ជាក់ស្តែង សិប្បកម្មរបស់លោកបានទទួលការកុម្មង់ពីភោជនីយដ្ឋានច្រើន ដូចជា ចង្ក្រានបាយធ្វើពីអ៊ីណុក តុ និងកៅអី ជាដើម ។ ដោយឡែក តម្រូវការប្រើប្រាស់ដូចជា តុ ទូ នៅតាមលំនៅឋាន ក៏មានចំនួនច្រើនជាងមុនដែរ ។
ម្ចាស់សិប្បកម្មរូបនេះបន្តថា រាល់សម្ភារធ្វើពីអ៊ូណុក គឺមានតម្លៃថ្លៃជាងសម្ភារធ្វើពីដែក មួយទ្វេជាពីរ ដោយសារវាមានគុណភាពល្អជាង រឹងមាំជាង ច្រែះមិនស៊ី ងាយស្រួលថែទាំ និងលាងសម្អាត ។ មកដល់បច្ចុប្បន្ន អាជីវកម្មផ្គត់ផ្គង់សម្ភារអ៊ីណុកកំពុងប្រកួតប្រជែងតម្លៃ និងដណ្តើមអតិថិជនខ្លាំង ខុសពីគ្រាមុនៗ ។
លោកបន្តថា ៖« តាមការសង្កេត សិប្បកម្មផលិតសម្ភារប្រើប្រាស់ពីអ៊ីណុកនេះកើនឡើងច្រើន និងប្រកួតប្រជែងគ្នាក៏ខ្លាំងជាងមុនដែរ ។ កាលពីមុន មិនសូវមានអ្នកផ្គត់ផ្គង់ទេ យើងអាចលក់បានថ្លៃបន្តិច តែមកដល់ឥឡូវ អ្នកផ្គត់ផ្គង់មានចំនួនច្រើន អីចឹង តម្លៃក៏ត្រូវចុះទៅតាមនោះដែរ ដើម្បីទាក់ទាញអតិថិជន » ។
លោក សុង សុផា អ្នកមើលការខុសត្រូវក្នុងសិប្បកម្មរិទ្ធីការ លក់ដុំ-រាយតុ និងទូ ធ្វើពីអាលុយមីញ៉ូម និងអ៊ីណុក បានឱ្យដឹងថា មកដល់បច្ចុប្បន្ន តម្រូវការប្រើប្រាស់សម្ភារធ្វើពីអាលុយមីញ៉ូម និងអ៊ីណុក មានចំនួនច្រើនជាងសម្ភារធ្វើពីឈើ ព្រោះសម្ភារធ្វើពីឈើខ្លះឆាប់ពុកខូច ។ ចំណែកសម្ភារធ្វើពីអ៊ីណុក បើទោះបីមានតម្លៃថ្លៃ ប៉ុន្តែវាធន់នឹងការប្រើប្រាស់បានយូរ ។
លោក សុង សុផា បន្ថែមថា ៖« សិប្បកម្មអ៊ីណុកមានច្រើន ហើយដើម្បីប្រកួតប្រជែងនៅលើទីផ្សារ យើងធ្វើយ៉ាងណា ធ្វើតុ ឬទូ ទាមទារឱ្យមានគុណភាព និងច្នៃម៉ូដថ្មីៗ ទើបអាចទាក់ទាញចំណាប់អារម្មណ៍ពីអ្នកប្រើប្រាស់បាន » ។
អ្នកស្រី ណៃហំ អាជីវករលក់បាយ បានឱ្យដឹងថា ការដែលអ្នកស្រីសម្រេចចិត្តទិញតុ ធ្វើពីអ៊ីណុកនេះ ដោយសារងាយស្រួលលាងសម្អាត ប៉ុន្តែវាមានតម្លៃថ្លៃបន្ដិច ។ ជាក់ស្តែង តុអ៊ីណុកទំហំតូចមួយ គឺមានតម្លៃជាង២០ដុល្លារ ។
អ្នកស្រីបន្តថា សព្វថ្ងៃនេះសម្ភារធ្វើពីអ៊ីណុក មិនត្រឹមតែមានអ្នកប្រើប្រាស់ច្រើននៅតាមលំនៅឋានទេ សូម្បីតែអាជីវករលក់ដូរតូចតាចនៅតាមដងផ្លូវ ក៏ជ្រើសរើសតុ និងទូអ៊ីណុកច្រើនដែរ ព្រោះវាស្រាល និងងាយស្រួលដឹកជញ្ជូន ។ ចំណែកអ្នកស្រី គួច សុខហ៊ុន ម្ចាស់ដេប៉ូផ្គត់ផ្គង់អ៊ីណុក នៅជិតស្តុបណូគា ផ្លូវ២០០៤ បានឱ្យដឹងដែរថា តម្រូវការប្រើប្រាស់អ៊ីណុកមានច្រើនជាងមុន ទាំងនៅតាមខុនដូ រោងចក្រស្រាបៀរ រោងចក្រទឹកផ្លែឈើ និងសិប្បកម្មតូចៗ ដោយសារសម្ភារទាំងនេះងាយស្រួលថែទាំ ។
អ្នកស្រីបញ្ជាក់ថា អ៊ីណុកដែលអ្នកស្រីយកមកផ្គត់ផ្គង់នៅរាជធានីភ្នំពេញ និងចែកចាយទៅតាមខេត្តផ្សេងៗ គឺនាំចូលមកពីប្រទេសចិន វៀតណាម និងថៃ ដោយក្នុង១តោន ថ្លៃ១.២០០ដុល្លារ ខណៈដែក១តោន ថ្លៃប្រហែល៧០០ដុល្លារប៉ុណ្ណោះ ហេតុដូច្នេះហើយបានជាសម្ភារធ្វើពីអ៊ីណុកតម្លៃថ្លៃជាង ៕
ចែករំលែកព័តមាននេះ