រាជធានីភ្នំពេញ ៖ សេដ្ឋកិច្ចប្រទេសកម្ពុជា នៅរយៈពេលប៉ុន្មានឆ្នាំកន្លងមកនេះ មានការរីកលូតលាស់គួរឲ្យកត់សម្គាល់ ទាំងលំហូរវិនិយោគទុនផ្ទាល់ពីបរទេស និងការវិនិយោគផ្ទាល់ពីសំណាក់វិនិយោគិនក្នុងស្រុក ដោយរក្សាបាននូវកំណើនសេដ្ឋកិច្ចរង្វង់៧%ក្នុងរយៈពេល២ទសវត្សរ៍មកនេះ ដែលជាហេតុធ្វើឲ្យវិនិយោគិនបរទេសកាន់តែច្រើនឡើងៗ មកបណ្ដាក់ទុនវិនិយោគក្នុងព្រះរាជាណាចក្រកម្ពុជា ជាពិសេស វិនិយោគិនចិន ។
វិនិយោគិនមកពីប្រទេសចិន លោក Ma Hejun ដែលបានចូលមកវិនិយោគនៅកម្ពុជា បាននិយាយថា ការអភិវឌ្ឍប្រទេសកម្ពុជានាពេលបច្ចុប្បន្ន គឺមិនខុសគ្នាទៅនឹងទីក្រុងស៊ិនជិនប្រទេសចិន កាលពី២០ឆ្នាំមុននោះទេ ។ ដូចនេះ នៅរយៈពេល២០ឆ្នាំខាងមុខទៀត ការរីកចម្រើនរបស់ប្រទេសកម្ពុជា នឹងដូចទីក្រុងស៊ិនជិន ប្រទេសចិន នាពេលបច្ចុប្បន្ននេះ ។
លោកថា ៖« ស្ថានភាពសេដ្ឋកិច្ចប្រទេសកម្ពុជា ជាពិសេសនៅទីក្រុងភ្នំពេញ គឺជាស្ថានភាពដ៏ល្អបំផុតសម្រាប់អ្នកវិនិយោគនានាបណ្ដាក់ទុនវិនិយោគ ហើយដោយមើលឃើញថា ការអភិវឌ្ឍនៅប្រទេសកម្ពុជា នឹងកាន់តែល្អប្រសើរទៀតនោះ ទើបពួកយើងមកបណ្ដាក់ទុនវិនិយោគនៅទីក្រុងភ្នំពេញ នៃព្រះរាជាណាចក្រកម្ពុជានេះ » ។
ធនាគារអភិវឌ្ឍន៍អាស៊ី ហៅកាត់ថា ADB ក៏បានមើលឃើញពីទស្សនវិស័យការអភិវឌ្ឍប្រទេសកម្ពុជានាពេលអនាគតផងដែរ ដោយធនាគារមួយនេះបានដាក់រហ័សនាមថ្មីដល់កម្ពុជាថា «ខ្លាអាស៊ី» ក្នុងនោះ ផលិតផលក្នុងស្រុកសរុបរបស់ប្រជាពលរដ្ឋម្នាក់ៗបានកើនឡើងជាបន្តបន្ទាប់ ។ ជាក់ស្ដែង ក្នុងឆ្នាំ២០១៦ ចំណូលប្រចាំឆ្នាំជាមធ្យមសម្រាប់មនុស្សម្នាក់ មានប្រមាណតែជាង១.៣០០ដុល្លារអាមេរិក ប៉ុណ្ណោះ តែដល់ឆ្នាំ២០១៧នេះត្រូវបានព្យាករថា នឹងកើនឡើងដល់ជាង១.៤០០ដុល្លារអាមេរិកក្នុងមនុស្សម្នាក់ ។
តាមរយៈកំណើនសេដ្ឋកិច្ច និងផលិតផលក្នុងស្រុកសរុបបែបនេះ ក៏បានផ្ដល់ទំនុកចិត្តដល់វិនិយោគិនបរទេសក្នុងការបណ្ដាក់ទុន ជាពិសេសវិនិយោគិនចិន ។ ជាក់ស្ដែង បច្ចុប្បន្ននេះ កំណើនវិនិយោគិនចិនបានជាប់ចំណាត់ថ្នាក់លេខ១ ក្នុងការបណ្ដាក់ទុនក្នុងប្រទេសកម្ពុជា។ តួយ៉ាង ខេត្តព្រះសីហនុ ដែលកាលពីមុន គឺសម្បូរទៅដោយវិនិយោគិនមកពីអឺរ៉ុប ប៉ុន្តែក្រោយពីរាជរដ្ឋាភិបាលបានប្រសិទ្ធនាមថា ក្រុងព្រះសីហនុ នឹងអាចក្លាយជាទីក្រុងស៊ិនជិន ប្រទេសចិននាពេលដ៏ខ្លីនោះ ក៏បានធ្វើឲ្យវិនិយោគិនចិនជាច្រើនសម្រុកទៅដាក់ទុនវិនិយោគលើវិស័យដូចជា សណ្ឋាគារ កាស៊ីណូ និងអចលនទ្រព្យ ។
សម្ដេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានឲ្យដឹងផងដែរថា បច្ចុប្បន្ន រាជរដ្ឋាភិបាលកម្ពុជា តែងតែខិតខំរិះរកវិធីសាស្ត្រនានាដើម្បីទាក់ទាញកៀងគរ និងលើកទឹកចិត្តដល់វិនិយោគិនបរទេស ធ្វើយ៉ាងណា ឲ្យគេមកវិនិយោគនៅក្នុងប្រទេសកម្ពុជា ។
សម្ដេចមានប្រសាសន៍ថា ៖« ការវិនិយោគផ្ទាល់ពីបរទេសនៅក្នុងប្រទេសកម្ពុជា នឹងផ្ដល់អត្ថប្រយោជន៍ជាច្រើនដល់កម្ពុជា ក្នុងនោះ ចូលរួមកាត់បន្ថយភាពក្រីក្ររបស់ប្រជាពលរដ្ឋ និងចូលរួមអភិវឌ្ឍន៍សេដ្ឋកិច្ចកម្ពុជាផងដែរ » ។
គួរបញ្ជាក់ថា បើតាមរបាយការណ៍ចេញផ្សាយថ្មីៗនេះ បានបង្ហាញថា ចាប់តាំងពីឆ្នាំ២០០០ រហូតដល់ឆ្នាំ២០១៧នេះ មានប្រទេស៥ត្រូវបានចាត់ទុកថា ជាប្រទេសដែលមកបណ្ដាក់ទុនវិនិយោគនៅកម្ពុជាច្រើនជាងគេ ក្នុងនោះ ប្រទេសមហាអំណាចចិនឈរនៅលំដាប់ទី១ ដែលបានបោះទុនវិនិយោគចំនួន១២១គម្រោង ស្មើនឹងទឹកប្រាក់ប្រមាណ២ពាន់លានដុល្លារអាមេរិក ។ មិនតែប៉ុណ្ណោះ បច្ចុប្បន្នចំនួនភ្ញៀវទេសចរចិនមកទស្សនាក្នុងប្រទេសកម្ពុជា ក៏បានជាប់ចំណាត់ថ្នាក់កំពូលដែរ ក្នុងចំណោមភ្ញៀវទេសចរបរទេសទាំងអស់ ហើយរាជរដ្ឋាភិបាលកម្ពុជា ក៏បានបន្តផ្សព្វផ្សាយ និងទាក់ទាញទេសចរចិនមកកម្ពុជា ឲ្យបានកាន់តែច្រើនបន្ថែមទៀតផងដែរ ៕
ចែករំលែកព័តមាននេះ