រាជធានីភ្នំពេញ ៖ ដើម្បីលើកកម្ពស់សេវាកម្មឱ្យកាន់តែប្រសើរជូនដល់អតិថិជនរបស់ខ្លួន ផ្សារទំនើបអ៊ីអនម៉ល ភ្នំពេញ បានរៀបចំការប្រកួតប្រជែងលើការសម្ដែងលើកកកម្ពស់សេវាកម្មលើកទី២ សម្រាប់ឆ្នាំ២០១៧ ដោយមានការចូលរួមពីបណ្ដាហាងបម្រើ
សេវាកម្មនានាដែលកំពុងធ្វើប្រតិបត្តិការនៅក្នុងផ្សារទំនើបដ៏ធំជាងគេនៅក្នុងព្រះរាជាណាចក្រកម្ពុជា ដែលវគ្គផ្ដាច់ព្រ័ត្រសម្រាប់ការប្រកួតឆ្នាំនេះ បានរៀបចំធ្វើឡើងនៅក្នុងផ្សារទំនើបអ៊ីអនម៉ល កាលពីរសៀលថ្ងៃទី១៥ វិច្ឆិកា ២០១៧ ។
លោក តូម៉ូយូគី ម៉ាតហ្ស៊ឹម៉ូតូ (Tomoyuki Matsumoto) តំណាងផ្សារទំនើបអ៊ីអនម៉ល បានឱ្យដឹងថា កម្មវិធីប្រកួតសម្ដែងលើកកម្ពស់សេវាកម្មលើកទី២ នេះ ត្រូវបានបង្កើតឡើងក្នុងគោលបំណងលើកកម្ពស់កម្រិតសេវាកម្មបំរើអតិថិជនដែលត្រូវបានផ្ដល់ជូនដោយទីភ្នាក់ងារបំរើសេវាកម្មលក់ ឬបុគ្គលិកបម្រើសេវាកម្មរបស់ហាងនីមួយៗនៅក្នុងផ្សារទំនើប អ៊ីអនម៉ល ។ បេក្ខភាពចូលរួមប្រកួតនីមួយៗ មានអ្នកតំណាងចូលរួមម្នាក់ ហើយពួកគេម្នាក់ៗត្រូវភ្ជាប់មកជាមួយឈុតឆាកសម្ដែងផ្សេងៗគ្នាមកបង្ហាញដោយ
សង្ខេបពីរបៀបដែលពួកគេនឹងដោះស្រាយបញ្ហា និងការប្រឈមមុខ តាមឈុតនីមួយៗ ជាមួយនឹងតម្រូវការរបស់អតិថិជន និងស្ថានភាពជាក់ស្ដែងនៃសេវាកម្មដែលត្រូវនឹងអាជីវកម្មរបស់ពួកគេ ។
លោកបន្តថា នៅក្នុងវគ្គផ្ដាច់ព្រ័ត្រនេះ បេក្ខនារីមានទេពកោសល្យចំនួន ១២នាក់មកពីហាងផ្សេងៗគ្នា ត្រូវបានជ្រើសរើស ហើយបេក្ខជន បេក្ខនារីដែលមានសមត្ថភាព ៣រូបនឹងត្រូវជ្រើសរើសដោយគណៈកម្មការនៅក្នុងជុំចុងក្រោយនៃការប្រកួតប្រជែងនេះ ។
គួរបញ្ជាក់ថា បេក្ខជនដែលចូលរួមប្រកួតប្រជែងទាំង១២រូបនោះ មកពីហាងបុកល្ហុងឆ្ងាញ់ , ហាង Asissa Herbs Association, ហាងនាឡិកា ICE Watch, ហាង G 2000, ហាង Loccitane Armanie Exchange , ហាងSwensen’s, ហាង Time Staion NEO, ហាង Akemi Uchi , ហាងCC Double O, ហាង Charles and Keith និងហាងPandora ។ ចំពោះម្ចាស់ជ័យលាភីទាំងបី ដែលទទួលជ័យលាភីលេខ១ បានទៅលើហាងហាង Swensen’s ជ័យលាភីលេខ២ បានទៅលើហាង Loccitane Armanie Exchange និងលេខ៣បានទៅហាង Akemi Uchi ៕
ចែករំលែកព័តមាននេះ