រាជធានីភ្នំពេញ ៖ ជារៀងរាល់ឆ្នាំក្រុមហ៊ុនហ្វដ (Ford) ដែលជាបុត្រសម្ព័ន្ធរបស់ក្រុមហ៊ុន អអិមអេ ខេមបូឌា តែងតែនាំអតិថិជនរបស់ខ្លួនធ្វើដំណើរកម្សាន្តនៅតាមតំបន់នានាក្នុងប្រទេសកម្ពុជា និងប្រទេសជិតខាង ជាក់ស្ដែងកន្លងមកក្រុមហ៊ុនហ្វដបាននាំអតិថិជនដែលប្រើប្រាស់រថយន្តហ្វដទៅកាន់ទឹកដីប្រទេសថៃ និងប្រទេសឡាវ ។
ដោយឡែកក្នុងឆ្នាំ២០១៧ ក្រុមហ៊ុនលក់រថយន្តមួយនេះនឹងនាំអតិថិជនរបស់ខ្លួនប្រមាណ៥០០នាក់ទៅកាន់ទឹកដីប្រទេសថៃជាថ្មីម្ដងទៀត ជាមួយក្បួនរថយន្តជាង១០០គ្រឿងច្រើនជាងរាល់ឆ្នាំ ។
ថ្លែងក្នុងសន្និសីទសារព័ត៌មាននាថ្ងៃទី១៧ វិច្ឆិកា លោក ងន សាំង អគ្គនាយកក្រុមហ៊ុនអអិមអេ ខេមបូឌា បានឱ្យដឹងថា ដំណើរកម្សាន្តសម្រាប់អតិថិជនហ្វដ គឺធ្វើឡើងតាំងពីឆ្នាំ២០០៧មកម្ល៉េះ ក្នុងគោលបំណងនាំអតិថិជនដែលទិញរថយន្តហ្វដពីក្រុមហ៊ុន អាចបើកបរសាកល្បងលើដងផ្លូវផ្សេងគ្នា ព្រោះអ្នកទិញរថយន្តហ្វដទាំងអស់មិនប្រាកដថាបានបើកបរទៅកាន់ទីឆ្ងាយៗ និងបើកបរលើផ្លូវពិបាកដែរ ។ ដូចនេះការនាំអតិថិជនទៅដំណើរការកម្សាន្តនាពេលនេះ គឺជាឱកាសអោយអតិថិជនបើកបររថយន្តលើចម្ងាយផ្លូវឆ្ងាយ និងពិបាក ដើម្បីអោយដឹងថា គុណភាពរថយន្តហ្វដវាមានកម្រិតប៉ុណ្ណា។
លោកបន្តថា ដំណើរកម្សាន្តនេះដែរ ក៏បានផ្ដល់ឱកាសអោយអតិថិជនហ្វដទាំងអស់បង្កើតមិត្តភាព និងទំនាក់ទំនងក្នុងធុរកិច្ចជាមួយគ្នា និងដើម្បីកម្សាន្តលំហែប្រចាំឆ្នាំជាលក្ខណៈគ្រួសារធំមួយផងដែរ។ សម្រាប់ដំណើរកម្សាន្តឆ្នាំនេះ មានភាពអស្ចារ្យជាងឆ្នាំមុនៗទៅទៀត ដោយសារតែក្បួនរថយន្តហ្វដនឹងកើនឡើងដល់ជាង១០០គ្រឿង ខណៈឆ្នាំមុនៗមានត្រឹមតែ៦០ទៅ៧០គ្រឿងប៉ុណ្ណោះ ។ ហើយឆ្នាំនេះ ហ្វដនឹងនាំអតិថិជនទៅកាន់ទឹកដីខេត្តរ៉ាយ៉ង និងប៉ាតាយ៉ា ដែលជាតំបន់ល្បីឈ្មោះប្រចាំប្រទេសថៃ ។
លោកបន្ថែមថា ក្រៅពីដំណើរកម្សាន្តនេះដែរ ហ្វដនឹងមានអំណោយបន្តិចបន្តួចដែលជាការបរិច្ចាគពីអតិថិជនចូលរួមទៅចែកចាយប្រជាពលរដ្ឋក្រីក្រនៅតំបន់ដែលខ្លួនឆ្លងកាត់ ។ លោកបញ្ជាក់ថា ហ្វដបានធ្វើដំណើរទៅកាន់ខេត្តមណ្ឌលគីរី ខេត្តរតនគិរី ខេត្តប៉ៃលិន ក៏ដូចជាខេត្តចម្ប៉ាប្រទេសឡាវ ខេត្តត្រាត ខេត្តចន្ថាបុរី ខេត្តបុរីរាម ប្រទេសថៃ ជាបន្តបន្ទាប់តាំងពីឆ្នាំ២០០៧ រហូតដល់ឆ្នាំ២០១៦ នេះ។
លោក Bernado ESEO នាយករងកិច្ចការប្រតិបត្តិនៃក្រុមហ៊ុន Total Cambodge ដែលបានចូលរួមគាំទ្រជាមួយហ្វដតាំងពីដើមមកបានអោយដឹងថា នេះគឺជាវត្តមានលើកទី១០ ហើយរបស់ Total Cambodge ដែលបានសហការឧបត្ថម្ភធំសម្រាប់ដំណើរកម្សាន្ត Ford Adventure ។ ជាច្រើនឆ្នាំមកនេះ ការសហការរវាងក្រុមហ៊ុន Total Cambodge និងក្រុមហ៊ុន RMA Cambodia តែងតែមានភាពរលូនជានិច្ច ។ លោកបានបន្តថា ការសហការឧបត្ថម្ភនេះបានផ្ដល់ឱកាសល្អសម្រាប់ក្រុមហ៊ុនក្នុងការបង្ហាញពីសមត្ថភាព និងគុណភាពខ្ពស់នៃប្រេងឥន្ធនៈ Excellium ដែលអាចសម្អាតម៉ាស៊ីនរថយន្តរហូតបានដល់ទៅ 93%។
គួរបញ្ជាក់ថា ជារៀងរាល់ឆ្នាំដំណើរកម្សាន្តរបស់ហ្វដ ក្រៅពីការឧបត្ថម្ភពីក្រុមហ៊ុនតូតាល់ហើយនោះ ក៏មានការចូលរួមឧបត្ថម្ភពីបណ្ដាក្រុមហ៊ុនផ្សេងទៀតផងដែរ ដូចជាក្រុមហ៊ុន Cambrew Ltd and Angkor Beverage Co.Ltd ក្រុមហ៊ុន EFG ជាដើម ៕
ចែករំលែកព័តមាននេះ