ខេត្តព្រះសីហនុ ៖ បើតាមសេចក្តីរាយការណ៍បឋមបានឱ្យដឹងថា រោងចក្រផលិតទឹកកកមួយកន្លែងត្រូវបានឆាបឆេះយ៉ាងសន្ធោសន្ធៅ ហេតុការណ៍នេះកើតឡើងកាលពីម៉ោង១និង៥៥នាទីរសៀល ស្ថិតនៅក្នុងភូមិបន្ទាយព្រៃ ឃុំបន្ទាយព្រៃ ស្រុកព្រៃនប់ ខេត្តព្រះសីហនុ ។
បើយោងតាមមេការនៅរោងចក្រខាងលើប្រាប់ឱ្យដឹងជាបឋមថា មូលហេតុដែលនាំឱ្យមានភ្លើងឆាបឆេះយ៉ាងសន្ធោសន្ធៅនេះ គឺបណ្តាលមកពីផ្ទុះត្រង់បង្គោលភ្លើងនៅក្បែរនោះ ហើយក៏ខ្ទាតមកប៉ះចំបំពង់ហ្គាស ទើបបណ្តាលឱ្យមានភ្លើងឆាបឆេះនេះតែម្តង។
តាមសេចក្តីរាយការណ៍បានឱ្យដឹងថា ខណៈពេលនេះភ្លើងនៅបន្តឆាបឆេះយ៉ាងសន្ធោសន្ធៅមិនទាន់មានការថមថយនៅឡើយទេ ហើយក៏មិនមាននរណាម្នាក់គ្រោះថ្នាក់ប៉ះពាល់ដល់អាយុជីវិតដែរ ហើយសមត្ថកិច្ចកំពុងបញ្ចេញរថយន្តពន្លត់អគ្គីភ័យមកកន្លែងកើតហេតុ ដើម្បីធ្វើការពន្លត់ហើយ ។
បើតាមសេចក្តីរាយការណ៍បានបន្តទៀតថា រហូតមកដល់ពេលម៉ោង២និង៣៥នាទីរសៀលនេះ អគ្គិភ័យមិនទាន់រលត់នៅឡើយទេ ទោះបីជាមានរថយន្តពន្លត់អគ្គិភ័យខេត្តព្រះសីហនុមកអន្តរាគមន៍បាញ់ពន្លត់ក៏ដោយ ក៏ភ្លើងនៅបន្តឆាបឆេះដដែល ព្រោះកន្លែងកើតហេតុនេះស្ថិតនៅចំទីតាំងកន្លែងស្តុកប្រេងតែម្តង ហើយឥឡូវនេះរថយន្តពន្លត់អគ្គិភ័យបានបាញ់ទឹកអស់ជាច្រើនគ្រឿងហើយនៅតែមិនទាន់រលត់ដដែល ។
សូមបញ្ជាក់ថា ខណៈពេលកំពុងមានអគ្គិភ័យឆាបឆេះនេះ អាកាសធាតុក៏កំពុងតែមានភ្លៀងធ្លាក់ផងដែរ។
ចែករំលែកព័តមាននេះ