«ស៊ីនហួ» របស់ចិនផ្សាយកាលពីពេល ថ្មីៗកន្លងមកថា អ្នកបុរាណវិទ្យាបានប្រទះឃើញកន្លែងបញ្ចុះសពបុរាណ អាយុប្រហែល២៤០០ឆ្នាំមុន ស្ថិតនៅក្បែរក្រុងស៊ីនជាំង ខេត្តហ៊ឺណាន ភាគកណ្តាល ប្រទេសចិន ។ បរិវេណដែលប្រទះឃើញពោរពេញដោយគ្រោង ឆ្អឹងសេះជាង១០០ក្បាល និងរទេះសេះបុរាណចំនួន៤គ្រឿង អាចជារបស់មេទ័ព នៅយុគសម័យរាជវង្សចូវអំឡុងឆ្នាំ១០៤៦-២២១ មុនគ្រឹស្តស័ករាជ ។
គ្រោងរទេះសេះទាំង៤ដែលឃើញនៅក្នុងកន្លែងបញ្ចុះនោះ រំពឹងថារទេះសេះ៣គ្រឿងអាចជារបស់ក្រុមគ្រួសារមេទ័ព ព្រោះវាមានប្រវែង២,៥៦ម៉ែត្រ និងទទឹង១,៦៦ម៉ែត្រ ហើយនៅផ្នែកខាងក្នុងមានបំពាក់ឧបករណ៍ការពារកម្តៅថ្ងៃ រួមទាំងមានតុបតែងដោយសំរឹទ្ធិ ។
ការជីករុករកផ្នែកបុរាណវិទ្យានេះស្ថិតក្នុងក្រឡាផ្ទៃប្រហែល២០ហិកតា រួមទាំងរណ្តៅកប់ធុនធំមានចំនួន១៨កន្លែង និងគ្រោងឆ្អឹងសេះ រួមទាំងរទេះសេះជាង៣០០០រណ្តៅ ។ តាំងពីខែកុម្ភៈ អ្នកបុរាណវិទ្យាបានជីកឃើញគ្រោងរទេះសេះ និងគ្រោងឆ្អឹងសេះប្រហែល ៩០គ្រោង ។
លោកម៉ា ជួនឆាយ ប្រធានក្រុមអ្នករុករកពីមន្ទីរបេតិកភណ្ឌវប្បធម៌ និងបុរាណវិទ្យារបស់ខេត្តបានបញ្ជាក់ថាតួលេខសេះដែលកប់នៅក្នុងរណ្តៅអាចមានជាង១០០ក្បាល ។
សម្រាប់គ្រឿងសំរឹទ្ធិនៅក្នុងរណ្តៅគឺជាតឹកតាងដ៏សំខាន់អាចបញ្ជាក់លើបច្ចេកវិទ្យា ការផលិត និងស្ថានភាពសង្គម រួមទាំងការប្រារព្ធពិធីបុណ្យសពក្នុងអំឡុងពេលនោះផងដែរ។
លោកម៉ា បញ្ជាក់ទៀតថា រទេះសេះដែលប្រទះឃើញនេះ អាចជារទេះសេះដែលមេទ័ព និងប្រពន្ធមេទ័ពប្រើប្រាស់ជាប្រចាំ ។
លោកលី ហុងឆាង នាយកតំបន់ទេសចរណ៍នៃរណ្តៅកប់សេះ និងរទេះសេះបុរាណសន្និដ្ឋានថា យុគសម័យនោះគេសម្លាប់សេះ រួចយកទៅកប់ក្បែររណ្តៅសពម្ចាស់ និងយករទេះសេះដោយបំបែកជា បំណែកៗរួចយកទៅកប់ពីលើសេះមួយជាន់ទៀត ៕
ចែករំលែកព័តមាននេះ