ខេត្តបន្ទាយមានជ័យ ៖ មនុស្ស២នាក់បានស្លាប់ភ្លាមៗនៅនឹងកន្លែងក្នុងហេតុ ក្នុងហេតុការណ៍គ្រោះថ្នាក់ចរាចរ នៅវេលាម៉ោង០៨និង១០នាទីយប់ ថ្ងៃទី១៧ ខែវិច្ឆិកា ឆ្នាំ២០១៧ នៅលើកំណាត់ផ្លូវជាតិលេខ១៥៩សេ ត្រង់ចំណុចមុខវត្តសួនស៊ិនណារាម (វត្តថ្មី) ស្ថិតក្នុងភូមិរង្វានកើត ឃុំចំណោម ស្រុកមង្គលបូរី ខេត្តបន្ទាយមានជ័យ ។
នគរបាលចរាចរណ៍ស្រុកមង្គលបូរី បានឲ្យដឹងថា នៅយប់ថ្ងៃទី១៧ ខែវិច្ឆិកា ឆ្នាំ២០១៧ មានករណីគ្រោះថ្នាក់ចរាចរមួយកើតឡើងដោយម៉ូតូមួយគ្រឿងម៉ាកហុងដាឌ្រីម ស៊េរីឆ្នាំ២០០៨ ពាក់ស្លាកលេខ បាត់ដំបង ១A-៥៨២១ ដែលបង្កដោយខ្លួនឯងបុកនឹងបង្គោលចរាចរណ៍ ។ បើកបរដោយឈ្មោះ លន់ សាមឌី ភេទប្រុស អាយុ២១ឆ្នាំ នៅភូមិបឹងត្រស់ ឃុំភ្នំតូច ស្រុកមង្គលបូរី ខេត្តបន្ទាយមានជ័យ រួមដំណើរដោយឈ្មោះ តឿ ភេទប្រុស អាយុ២៥ឆ្នាំ នៅភូមិជាមួយគ្នា ។
ប្រភពដដែលបានបញ្ជាក់ថា មុនពេលកើតហេតុ អ្នកបើកបរម៉ូតូធ្វើដំណើរតាមបណ្តោយផ្លូវជាតិលេខ១៥៩សេ ទិសដៅពីត្បូងទៅជើង ពេលដល់ចំណុចកើតហេតុដែលជាផ្លូវកោង បើកបរមានល្បឿនលឿន យកចង្កូតមិនទាន់ក៏ជ្រុលទៅបុកនឹងបង្គោលចរាចរណ៍ដែលដាក់អមសងខាងផ្លូវ បណ្ដាលឲ្យអ្នកបើកបរ និងអ្នករួមដំណើរ ដោយមិនពាក់មួកសុវត្ថិភាព បែកក្បាលស្លាប់ភ្លាមៗនៅនឹងកន្លែង ម៉ូតូខូចខាតធ្ងន់ ។ ម៉ូតូបានប្រគល់ទៅឲ្យក្រុមគ្រួសារ រួមទាំងសពជនរងគ្រោះផងដែរ ដើម្បីយកទៅធ្វើបុណ្យ ៕
ចែករំលែកព័តមាននេះ