ខេត្តកំពត ៖ ប្រជាពលរដ្ឋបានប្រទះឃើញសាកសព យុវជនម្នាក់ដេកស្លាប់នៅក្នុងព្រៃទួលមួយកន្លែងត្រង់ចំណុចខាងលិចឆៀងខាងត្បូង វិទ្យាល័យ ហ៊ុនសែន ព្រែកត្នោត ជិតផ្លូវចូលទៅរមណីយដ្ឋានអន្លុងធំ ស្ថិតក្នុងភូមិព្រែកក្រែង ឃុំព្រែកត្នោត ស្រុកទឹកឈូ។ តាមប្រភពពីសមត្ថកិច្ចបានឲ្យដឹងថា វេលាម៉ោង២ និង២០នាទីរសៀល ថ្ងៃទី១៧ ខែវិច្ឆិកា ឆ្នាំ២០១៧នេះ ប្រជាពលរដ្ឋបានរាយការណ៍ពីករណីប្រទះឃើញសពយុវជនម្នាក់ ដោយត្រូវគេអារកសម្លាប់យ៉ាងព្រៃផ្សៃ ស្ថិតនៅចំណុចខាងលិចឆៀងខាងត្បូង ជិតវិទ្យាល័យ ហ៊ុនសែន ព្រែកត្នោត ក្នុងភូមិព្រែកក្រែង ឃុំព្រែកត្នោត ស្រុកទឹកឈូ ខេត្តកំពត។
សមត្ថកិច្ចបានបញ្ជាក់ថា បន្ទាប់ពីមានសេចក្តីរាយការណ៍ សមត្ថកិច្ចជំនាញក៏បានចុះទៅទីតាំងកើតហេតុភ្លាមៗ ដើម្បីពិនិត្យ ធ្វើកោសល្យវិច្ច័យសព ហើយក្រោយពីបានពិនិត្យទើបដឹងថា យុវជនរងគ្រោះ ត្រូវបានជនមិនស្គាល់មុខអារកសម្លាប់យ៉ាងពិតប្រាកដ ដោយខណៈនោះសមត្ថកិច្ចក៏បានដុតដៃដុតជើង ស្រាវជ្រាវយ៉ាងល្អិតល្អន់បំផុត ដើម្បីវែកមុខជនដៃដល់។ ជាមួយនេះ តាមរយៈអ្នកធ្លាប់ស្គាល់ជនរងគ្រោះ បានប្រាប់ថា យុវជនដែលត្រូវគេអារកសម្លាប់នោះ ឈ្មោះ មិត្ត រតនៈ ហៅដាំ ភេទប្រុស អាយុ១៨ឆ្នាំ មានទីលំនៅ ភូមិព្រៃតុម្ព ឃុំព្រៃឃ្មុំ ស្រុកទឹកឈូ ខេត្តកំពត។
ទាក់ទិននឹងករណីមនុស្សឃាតខាងលើ លោកឧត្តមសេនីយ៍ទោ ម៉ៅ ច័ន្ទមធុរិទ្ធ ស្នងការនគរបាលខេត្តកំពត បានឲ្យដឹងថា ឆ្លងតាមការស្រាវជ្រាវស៊ើបអង្កេតលើករណីនេះ យើងក៏ទទួលដំណឹងថា៖ មុនពេលមានមានករណីបែបនេះកើតឡើង គឺនៅយប់ថ្ងៃទី១៦ ខែវិច្ឆិកា ឆ្នាំ២០១៧ ជនរងគ្រោះបានដើរលេងជាមួយគូកនបីទៅបួននាក់ទៀត ដែលសុទ្ធសឹងជាអ្នករស់នៅក្នុងភូមិជាមួយគ្នា លុះពួកគេត្រលប់មកវិញ បាត់ជនរងគ្រោះមិនឃើញមកផ្ទះ ទើបសមត្ថកិច្ចសម្រេចឃាត់ខ្លួនជនសង្ស័យចំនួនបីនាក់ នៅល្ងាចថ្ងៃទី១៧ ខែវិច្ឆិកា ឆ្នាំ២០១៧ ដើម្បីនាំមកសាកសួរតាមនីតិវិធីតែម្តង។ បច្ចុប្បន្នសពយុវជនរងគ្រោះ ត្រូវបានក្រុមគ្រួសារទៅទទួលមកកាន់លំនៅឋានដើម្បីចាត់ចែងធ្វើបុណ្យតាមប្រពៃណី៕
ចែករំលែកព័តមាននេះ