ចិន ៖ តាមប្រភពព័ត៌មាន Viral4real បានឲ្យដឹងថា ក្មេងប្រុសអាយុ៥ឆ្នាំម្នាក់ ត្រូវបានម្តាយឪពុកទុកឲ្យនៅពេទ្យម្នាក់ឯង ក្រោយពេលដឹងថា មានជំងឺមហារីក។
ក្មេងប្រុសម្នាក់ឈ្មោះហៅក្រៅថា Rong Rong ត្រូវបានម្តាយឪពុកនាំមកមន្ទីរពេទ្យនៅ Foshan ខេត្ត Guangdong ដោយសារតែមានអាការៈខ្វះជាតិទឹក ហើយមិនអាចងើបដើរបាន។ នៅពេលគ្រូពេទ្យពិនិត្យទើបដឹងថា Rong Rong មានជំងឺមហារីកដំណាក់កាលចុងក្រោយ ដែលត្រូវការព្យាបាលជាបន្ទាន់។
ដោយគ្រាន់តែលឺភ្លាម ម្តាយឪពុករបស់ Rong Rong បានសុំគ្រូពេទ្យទៅផ្ទះរកលុយមកបង់ថ្លៃព្យាបាលជំងឺ តែការពិតនោះគ្រាន់តែជាពាក្យដោះសារតែប៉ុណ្ណោះ។ គោលបំណងពិត គឺចង់ទុកកូនចោលឲ្យនៅពេទ្យ ហើយរត់យករួចខ្លួនមិនចង់បង់លុយព្យាបាលកូនប្រុស។
អស់រយៈពេលពីរបីថ្ងៃក្រោយមក ទើបគ្រូពេទ្យដឹងថា ម៉ែឪពីរនាក់នោះរត់ចោលកូនមែន។ ក្រុមគ្រូពេទ្យមានការអាណិតអាសូរដល់ Rong Rong មែនទែន ព្រោះថា រូបគេមានសាច់ដុះនៅក្នុងពោះដែលជាសាច់កាច ហើយពេលនេះម្តាយឪពុករត់ចោលទៀត។ Rong Rong មានទម្ងន់ត្រឹមតែ១៥គីឡូក្រាមប៉ុណ្ណោះ ដែលត្រូវឲ្យគ្រូពេទ្យជួយជាទឹកដោះគោឲ្យផឹក។ មិនត្រឹមតែជួយជាទឹកដោះគោនោះទេ ពួកគេបានផ្តល់ខោអាវរបស់កូនពួកគេឲ្យ Rong Rong ស្លៀកពាក់ទៀតផង។
នាពេលនេះ គ្រូពេទ្យគ្រោងនឹងសរសេរពាក្យស្នើសុំជំនួយពីរដ្ឋាភិបាលដែរ តែតម្រូវឲ្យមានហត្ថលេខាពីម្តាយឪពុក។ តើវាសនា Rong Rong ទៅជាយ៉ាងណា បើម្តាយឪពុករត់យករួចខ្លួនបែបនេះ?
ចែករំលែកព័តមាននេះ