ក្រុមរដ្ឋអ៊ិស្លាម ៖ នៅតាមឃ្លាំងស្តុកអាវុធថ្មីៗដែលដណ្តើមយកបានពីពួកភេរវករនៅស៊ីរីគេរកឃើញគ្រឿងអាវុធរបស់អូតង់ផលិតនៅអាមេរិក អឺរ៉ុប ឬអ៊ីស្រាអែល ក្នុងបរិមាណយ៉ាងខ្ពស់ ។ នេះជាការអះអាងរបស់កងទ័ពស៊ីរីនាពេលថ្មីៗនេះ ។ កងទ័ពស៊ីរីវាយរំដោះបានពីក្រុមរដ្ឋអ៊ិស្លាមនូវសង្កាត់ថ្មីៗនៃទីក្រុង…
ក្រុមរដ្ឋអ៊ិស្លាម ៖ នៅតាមឃ្លាំងស្តុកអាវុធថ្មីៗដែលដណ្តើមយកបានពីពួកភេរវករនៅស៊ីរីគេរកឃើញគ្រឿងអាវុធរបស់អូតង់ផលិតនៅអាមេរិក អឺរ៉ុប ឬអ៊ីស្រាអែល ក្នុងបរិមាណយ៉ាងខ្ពស់ ។ នេះជាការអះអាងរបស់កងទ័ពស៊ីរីនាពេលថ្មីៗនេះ ។
កងទ័ពស៊ីរីវាយរំដោះបានពីក្រុមរដ្ឋអ៊ិស្លាមនូវសង្កាត់ថ្មីៗនៃទីក្រុង DEIR EZZOR ជាកន្លែងដែលកងទ័ពនេះរកឃើញបណ្តាឃ្លាំង ដែលស្តុកអាវុធក្នុងបរិមាណយ៉ាងច្រើន ។ ទាហានស៊ីរីម្នាក់ចូលរួមផ្ទាល់ក្នុងប្រតិបត្តិការរៀបរាប់ប្រាប់ SPUTNIK ថា បណ្តាអាវុធដែលរកឃើញក្នុងបណ្តាកន្លែងស្តុករបស់ក្រុមរដ្ឋអ៊ិស្លាម រួមមានជាពិសេសកាំភ្លើងវាយលុកធុន M16 មីស៊ីលប្រឆាំងរថក្រោះធុន TOW ព្រមទាំងអាវុធឯទៀតៗផលិតនៅអាមេរិក អឺរ៉ុប ឬអ៊ីស្រាអែល ។
ម្យ៉ាងវិញទៀត គេរកឃើញបណ្តារថយន្តពាសដែកធុន HUMMER ដែលប្រើសម្រាប់ដឹកជញ្ជូនមនុស្ស និងសម្រាប់ធ្វើការវាយប្រហារភេរវកម្មនានា ព្រោះគ្រឿងផ្ទុះត្រូវគេដាក់ខាងក្នុង ។
ទាហានរូបនេះរៀបរាប់ទៀតថា នៅតាមអតីតទីតាំងរបស់ពួកភេរវករក៏រកឃើញបណ្តាឧបករណ៍ស៊ើបការណ៍តាមអាកាស និងតាមជើងគោក បណ្តាមធ្យោបាយទូរគមនាគមន៍តាមផ្កាយរណប និងថង់ស្ពាយដាក់គ្រឿងផ្ទុះទាំងឡាយ ។
យោងតាមវ៉េបសាយ INSIDE SYRIA MEDIA CENTER ថា សហរដ្ឋអាមេរិកបានផ្តល់ដោយខុសច្បាប់ដល់ពួកភេរវករនូវរថយន្តកាំមីញ៉ុងដឹកអាវុធ និងសម្ភារយោធាយ៉ាងតិច១.៥០០គ្រឿង រវាងថ្ងៃទី៥ មិថុនា និងថ្ងៃទី១៥ កញ្ញា ឆ្នាំ២០១៧ ។ ក្រុងវ៉ាស៊ីនតោនអះអាងថា អាវុធទាំងនេះ ព្រមទាំងរថយន្តគឺសម្រាប់ផ្តល់ឱ្យពួកឧទ្ទាមជាសម្ព័ន្ធមិត្តសហរដ្ឋអាមេរិក ក៏ប៉ុន្តែត្រូវធ្លាក់ជាបន្តបន្ទាប់ក្នុងដៃពួកភេរវករ ។
ឧត្តមសេនីយ៍ស៊ីរីមួយរូបអះអាងថា កាំភ្លើងវាយលុកអាមេរិកធុន M16 ក្លាយជានិមិត្តរូបរបស់ពួកភេរវករនៅស៊ីរី ។ កងទ័ពស៊ីរីជាច្រើនលើកបានប្រទះឃើញបណ្តាកេស ដាក់កាំភ្លើងធុននេះដែលជាកាំភ្លើងរបស់សហរដ្ឋអាមេរិក ។
ម្យ៉ាងទៀត ពួកភេរវករបានប្រើប្រាស់បណ្តាអាវុធរបស់អង្គការអូតង់ដូចជាកាំភ្លើងបែលហ្ស៊ិកធុន FN FAL កាំភ្លើងខ្លីស្វ័យប្រវត្តិអាល្លឺម៉ង់ធុន HECKLER និង KOCH MP5 ឬកាំភ្លើងខ្លីអូទ្រីសធុន GLOCK ១៩ជាដើម ៕
ចែករំលែកព័តមាននេះ