ក្រុមប្រឹក្សាសន្តិសុខ អ.ស.ប ៖ ក្រុមប្រឹក្សាសន្តិសុខ អ.ស.ប កាលពីថ្ងៃទី១៦ វិច្ឆិកា បានបដិសេធគម្រោងដំណោះស្រាយមួយរបស់រុស្ស៊ីពន្យារពេលអាណត្តិរបស់ពួកអ្នកជំនាញការអន្តរជាតិ ដែលស៊ើបអង្កេតលើអាវុធគីមីនៅស៊ីរី ។
គម្រោងដំណោះស្រាយរបស់រុស្ស៊ីនេះក្នុងការបោះឆ្នោតក្នុងក្រុមប្រឹក្សាសន្តិសុខទទួលការគាំទ្រ៤សំឡេង ៧សំឡេងប្រឆាំង ហើយ៤សំឡេងអនុប្បវាទ ។ គម្រោងដំណោះស្រាយនេះទាមទារឱ្យពិនិត្យឡើងវិញបេសកកម្មរបស់ពួកអ្នកស៊ើបអង្កេត ដែលការងាររបស់គេត្រូវបានរុស្ស៊ីថា ពុំប្រាកដនិយម ។ មនុស្សជាង៨០នាក់ស្លាប់ក្នុងការវាយប្រហារមួយដោយឧស្ម័ន SARIN នៅស៊ីរី ។
មុននេះបន្តិចរុស្ស៊ីបានប្រើវេតូប្រឆាំងគម្រោងដំណោះស្រាយមួយទៀតតាក់តែងដោយសហរដ្ឋអាមេរិកដែលស្នើពន្យារពេល១ឆ្នាំ អាណត្តិរបស់ពួកអ្នកជំនាញការអន្តរជាតិ ដែលស៊ើបអង្កេតលើការប្រើប្រាស់អាវុធគីមីទាំងនេះនៅស៊ីរី ។ អាណត្តិរបស់ពួកអ្នកស៊ើបអង្កេត អ.ស.ប ត្រូវបញ្ចប់ត្រឹមយប់ថ្ងៃទី១៦ វិច្ឆិកា ។
រឿងពន្យារអាណត្តិនេះមានការប្រទាំងប្រទើសគ្នារវាងក្រុងវ៉ាស៊ីនតោន និងក្រុង
មូស្គូដែលប្រកាន់ជំហរផ្ទុយគ្នាលើរបាយការណ៍របស់ពួកអ្នកជំនាញការ អ.ស.ប និងរបស់អង្គការដើម្បីការហាមឃាត់អាវុធគីមី OIAC ។ អ្នកជំនាញការទាំងនេះធ្វើការសន្និដ្ឋានកាលពីដំណាច់ខែតុលាពីការចូលរួមរបស់យន្តហោះទម្លាក់គ្រាប់បែកស៊ីរីមួយគ្រឿងក្នុងការវាយប្រហារឧស្ម័ន SARIN កាលពីថ្ងៃទី៤ មេសា នៅ KHAN CHEIKHOUN បណ្តាលឱ្យមនុស្សស្លាប់ជាង៨០នាក់ ។ ទោះបីយ៉ាងណា រុស្ស៊ីថា ការវាយប្រហារនេះតាមពិតជាការផ្ទុះគ្រាប់ផ្លោងមួយនៅលើដីក្នុងតំបន់មួយត្រួតត្រាដោយពួកឧទ្ទាម និងពួកជីហាដ ហើយរុស្ស៊ីតែងបរិហារការនិយាយស្មានៗក្នុងរបាយការណ៍របស់ក្រុមដឹកនាំដោយជនជាតិហ្គាតេម៉ាឡា លោក EDMOND MULET ៕
ចែករំលែកព័តមាននេះ