ខេត្តត្បូងឃ្មុំ ៖ ពីមួយឆ្នាំទៅមួយឆ្នាំ ច្រាំងទន្លេមេគង្គបានបាក់ ដោយមកជិតដល់កុដិចៅអធិការវត្តរកាធំ ដែលជាកន្លែងអនុស្សាវរីយ៍របស់ សម្តេចតេជោ ហ៊ុន សែន ធ្លាប់បានតស៊ូក្នុងពេលដែលប្រទេសជាតិមានសង្គ្រាមនោះ គឺនៅសល់ចំងាយប្រមាណ២០ម៉ែត្រទៀតប៉ុណ្ណោះ ដែលមានស្ថិតនៅភូមិរកាធំ ឃុំជីរោទ៍ទី១ ស្រុកត្បូងឃ្មុំ ។ បង្កឲ្យមានក្តីកង្វល់គឺមិនទាន់ដីកន្លែងណាមួយ សម្រាប់សាង់សង់ទីអារាមថ្មីនោះទេ មិនដឹងថាតើត្រូវដោះស្រាយដោយពិធីណានោះទេ ។
លោក សុង គង់ អាយុ៥៤ឆ្នាំ ផ្ទះនៅជាប់របងវត្តនេះ ប្រាប់ឲ្យដឹងនៅព្រឹកថ្ងៃទី១៧ ខែវិច្ឆិកា ឆ្នាំ២០១៧ ថា រាល់ថ្ងៃនេះដីរបស់គាត់ ដែលមានទំហំ២៧ម៉ែត្រគុណ១,០០០ម៉ែត្រ ត្រូវបានបាក់ចូលទៅក្នុងទន្លេអស់ហើយ មិនមានដីនៅទៀតទេ ផ្ទះរាល់ថ្ងៃនេះគឺសុំដីអ្នកភូមិផងរបងជាមួយ នៅជាបណ្តោះអាសន្នតែប៉ុណ្ណោះ តែច្រាំងបានបាក់មកជិតដល់ទៀតហើយ ដូច្នេះផ្ទះគាត់ចេះតែរំកិលមកមុខបន្តទៀត ។ លោក សុង គង់ បានរំឭកថា ច្រាំងទន្លេមេគង្គនៅត្រើយខាងជីរោទ៍ទី១ និងត្រើយខាងលិចទល់មុខវត្តជ្រោយថ្ម ក្រុងកំពង់ចាម កាលពីមុននៅពេលដែលចុះងូតទឹកទន្លេលេង គឺស្រែកហៅគ្នាស្តាប់ឮពីត្រើយម្ខាងទៅត្រើយម្ខាងបានច្បាស់ ។ តែចាប់ពីឆ្នាំ១៩៨៧មកដល់ឆ្នាំ២០១៧ គ្រាន់តែតាមការកត់សម្គាល់របស់គាត់ ច្រាំងបានបាក់អស់ជាង១,០០០ម៉ែត្រហើយ សូម្បីតែដីរបស់គាត់ក៏ត្រូវបាក់ចូលទៅក្នុងទឹកទន្លេអស់រលីងតែម្តង ។ ចំពោះប្រជាពលរដ្ឋដែលមានដីជាកម្មសិទ្ធ នៅជាប់តាមដងទន្លេមេគង្គបានបាក់អស់រលីងមានចំនួនប្រមាណ៤០គ្រួសារផងដែរ ។ លោកថាការបាក់នេះជាបាតុភូតគ្រោះធម្មជាតិមិនអាចបន្ទោសទៅលើអ្នកណាបាននោះទេ ព្រោះថាខ្សែទឹកបានហូរបុកមកចំត្រង់ក្រោយដីផ្ទះគាត់ ។
លោកស្រី ពេជ្រ ស៊ន់ អាយុ៦៦ឆ្នាំ គណៈកម្មការវត្តរកាធំមានប្រសាសន៍ឲ្យដឹងដែរថា កាលពីមុនមកដីបរិវេណវត្តនៅឆ្ងាយរាប់រយម៉ែត្រនៅមាត់ទន្លេ តែច្រាំងបានបាក់រាល់ឆ្នាំដោយកាលពីប៉ុន្មានឆ្នាំមុនបាក់មកកល់នឹងដល់បន្ទប់ទឹកកុដិចៅធិការវត្ត ក៏បានជួលជាងមកឲ្យរុញរំកិលកុដិឈើ២ខ្នង និងរោងម៉ាស៊ីន១ខ្នងចូលមកក្នុងទៀត អស់ប្រាក់ឈ្មួលជាង៣,០០០ដុល្លារ ។ តែមកដល់ឆ្នាំ២០១៧ ច្រាំងទន្លេមេគង្គបានបន្តបាក់គឺនៅសល់ចំងាយប្រមាណ២០ម៉ែត្រទៀត នឹងដល់កុដិចៅអធិការវត្តហើយកំពុងតែព្រួយបារម្ភ មិនដឹងថាតើមានដីនៅកន្លែងណា ដើម្បីសាងសង់ទីអារាមថ្មីនូវឡើយទេ ។
សូមបញ្ជាក់ថា នៅល្ងាលថ្ងៃទី១៦ ខែវិច្ឆិកា ឆ្នាំ២០១៧ លោក លី ឡេង អភិបាលខេត្ត និងលោក ប៉ែន កុសល អភិបាលរងខេត្ត ក៏បានចុះមកពិនិត្យពីស្ថានភាពច្រាំងទន្លេដែលបាក់នៅវត្តរកាធំនេះផងដែរ ៕
ចែករំលែកព័តមាននេះ