រឿង២ដែលមានសារសំខាន់ចំពោះការគ្រប់គ្រងជំងឺទឹកនោមផ្អែម គឺរបបអាហារ និងការហាត់ប្រាណ ។ ខណៈពេលដែលការសម្របខ្លួនទៅនឹងការផ្លាស់ប្តូររបបអាហារមានភាពងាយស្រួល ប៉ុន្តែការហាត់ប្រាណដោយមិនបានឆ្លងកាត់ការពិគ្រោះយោបល់ជាមួយអ្នកជំនាញអាចមានគ្រោះថ្នាក់ ។ ប្រសិនបើអ្នកមានជំងឺទឹកនោមផ្អែម ហើយមិនធ្លាប់ហាត់ប្រាណពីមុនទេនោះសូមចាប់ផ្តើម យឺតៗ ហើយកុំជ្រើសរើសការហាត់ប្រាណណាដែលមិនសមស្របនឹងរាងកាយរបស់អ្នក ។ ប្រសិនបើអ្នកចង់ទៅកន្លែងហាត់ប្រាណដើម្បីសម្រកទម្ងន់ ចូរអនវត្តតាមគន្លឹះខាងក្រោមនេះ ។
១-ពិភាក្សាជាមួយវេជ្ជបណ្ឌិតរបស់អ្នក
ប្រសិនបើអ្នកមានបំណងចង់ហាត់ប្រាណនៅកន្លែងហាត់ប្រាណ សូមពិគ្រោះជាមួយគ្រូពេទ្យរបស់អ្នកដើម្បីដឹងថាតើការធ្វើលំហាត់ប្រាណបែបណាដែលអ្នកគួរតែធ្វើ និងរយៈពេលយូរប៉ុនណា ។ ការធ្វើលំហាត់ប្រាណនឹងបន្ថយកម្រិតជាតិស្ករនៅក្នុងឈាម ហើយដូច្នេះអ្នកត្រូវមានការប្រុងប្រយ័ត្ននៅពេលលេបថ្នាំ ។ អ្នកប្រហែលជាត្រូវប្រើប្រាស់ថ្នាំ ឬកម្រិតអាំងស៊ុយលីនរបស់អ្នកអាស្រ័យលើកាលវិភាគនៃការធ្វើលំហាត់ប្រាណ ។
២-ពិនិត្យកម្រិតជាតិស្កររបស់អ្នក
ជាទូទៅកម្រិតជាតិស្ករនៅក្នុងឈាមរបស់អ្នកមុនពេលទទួលទានគួរតែមានចាប់ពី១១០ទៅ១៣០មីលីក្រាមក្នុងមួយដេស៊ីលីត្រ និងមិនលើសពី១៥០ទៅ២០០មីលីក្រាមក្នុងមួយដេស៊ីលីត្រក្រោយពេលបរិភោគអាហារ ។ ប្រសិនបើនៅថ្ងៃណាមួយដែលកម្រិតជាតិស្កររបស់អ្នកមានកម្រិតទាប ឬខ្ពស់ពេកសូមកុំទៅកន្លែងហាត់ប្រាណ ហើយត្រូវទៅជួបគ្រូពេទ្យជំនួសវិញ ។ ប្រសិនបើអ្នកមិនអើពើនឹងតួលេខនេះ និងបន្តការហ្វឹកហាត់យ៉ាងខ្លាំងក្លានៅកន្លែងហាត់ប្រាណ អ្នកអាចនឹងដួលនៅកន្លែងហាត់ប្រាណដែលអាចនាំឱ្យមានគ្រោះថ្នាក់ ។
៣-ទទួលទានអាហារសម្រន់មុនពេលហាត់ប្រាណ
វាមិនមែនជាការល្អទេក្នុងការហាត់ប្រាណជាមួយនឹងពោះទទេ ដូច្នេះប្រសិនបើអ្នកមានជំងឺទឹកនោមផ្អែម ។ សូមបរិភោគអាហារសម្រន់បន្តិចមុនពេលហាត់ប្រាណ និងធ្វើឱ្យរាងកាយរបស់អ្នកមានថាមពល ។ បើមិនដូច្នោះទេរាងកាយរបស់អ្នកនឹងបំបែកសាច់ដុំដើម្បីទទួលបានថាមពល ដែលវាអាចនាំឲ្យមានបញ្ហា ផ្សេងៗ ។ ទឹកដោះគោមួយកែវ គ្រាប់ធញ្ញជាតិ ឬផ្លែឈើជាជម្រើសដ៏ល្អក្នុងការទទួលទានអាហារសម្រន់មុនធ្វើលំហាត់ប្រាណ ។
៤-ប្រយ័ត្នចំពោះអ្វីដែលអ្នកបរិភោគក្រោយការហាត់ប្រាណ
ក្រោយការធ្វើលំហាត់ប្រាណ សូមបំពេញបន្ថែមរាងកាយរបស់អ្នកជាមួយនឹងអាហារដែលមានជាតិកាបូអ៊ីដ្រាតចម្រុះ និងប្រូតេអ៊ីន ។ ការទទួលទានកាបូអ៊ីដ្រាតបន្ទាប់ពីការហាត់ប្រាណជួយឱ្យមានតុល្យភាពជាតិស្ករ និងប្រូតេអ៊ីនអាចជួយឱ្យមានថាមពលឡើងវិញ និងការបង្កើតសាច់ដុំ ។ ប្រសិនបើអ្នកមិនទទួលទានអាហារក្រោយការហាត់ប្រាណទេ វាអាចនាំឲ្យសាច់ដុំចុះខ្សោយ ។ ម្យ៉ាងទៀតជាតិស្កររបស់អ្នកនឹងនៅតែមានកម្រិតទាប ដែលអាចនាំឲ្យថយចុះជាតិស្ករក្នុងឈាម ៕
ចែករំលែកព័តមាននេះ