ខេត្តប៉ៃលិន ៖ រហូតមកដល់ពេលនេះ គេសង្កេតឃើញដំណាំតាង៉ែន ហៅមៀនប៉ៃលិន ត្រូវបានប្រជាពលរដ្ឋរស់នៅក្នុងខេត្តប៉ៃលិន ប្រមូលផលជាបណ្តើរៗ ដោយលក់ឱ្យឈ្មួញចូលទៅទិញដល់ក្នុងចម្ការតែម្តង ។ ចំណែកអ្នកខ្លះ បេះលក់នៅក្នុងផ្សារប៉ៃលិន សម្រាប់ប្រជាពលរដ្ឋទិញយកទៅទទួលទានផងដែរ ។
ប្រភពព័ត៌មានបានឱ្យដឹងថា បន្ទាប់ពីដាំពោត និងដំឡូងមី ដែលជាទីពេញនិយមរបស់ប្រជាពលរដ្ឋរស់នៅក្នុងប៉ៃលិន គេសង្កេតឃើញដំណាំតាង៉ែន ហៅមៀនប៉ៃលិន ត្រូវបានកសិករដាំជាច្រើនគួរឱ្យកត់សម្គាល់ ។ ប្រភពបន្តទៀតថា រហូតមកដល់ពេលនេះ អ្នកខ្លះបានដាក់អរម៉ូនរហូតទទួលបានផលផ្លែ រួចមៅឱ្យឈ្មួញបេះលក់នៅក្នុងខេត្ត រហូតដល់រាជធានីភ្នំពេញ និងបន្តលក់ទៅប្រទេសថៃ ។ តែតម្លៃហាក់ដូចជាធ្លាក់ចុះ ក្នុង១គីឡូក្រាម ត្រឹមតែ២,០០០ ទៅ៣,០០០រៀលប៉ុណ្ណោះ ។ បើប្រៀបធៀបនឹងឆ្នាំមុនៗ មៀនប៉ៃលិន អាចលក់បានថ្លៃចាប់ពី៣,៥០០ ទៅ៤,០០០រៀលក្នុង១គីឡូក្រាមឯណោះ ។ លើសពីនេះ ពួកគាត់ពិតជាលំបាកក្នុងការថែទាំដំណាំមួយនេះយ៉ាងខ្លាំង តាំងពីស្រោចទឹក ដាក់បំប៉នជី ខណ:ម្នាក់ៗដាំបានច្រើនរាប់ពាន់ដើម ត្រូវចំណាយអស់ច្រើន ។
ពាក់ព័ន្ធទៅនឹងបញ្ហានេះ លោក សាយ សុផាត ប្រធានមន្ទីរកសិកម្មខេត្តប៉ៃលិនបានឱ្យដឹងដេរថា ក្រៅពីដាំដំណាំពោត និងដំឡូងមី កសិករបានដាំមៀនប៉ៃលិនសរុបទៅរាប់ពាន់ដើមដែរ ។ លោកបន្តទៀតថា ចំណែកឯតម្លៃទីផ្សារវិញ ក៏មិនឡើងថ្លៃប៉ុន្មាន ដោយប្រជាពលរដ្ឋលក់រាយ ៣,៥០០ទៅ៤,០០០រៀល ក្នុង១គីឡូក្រាមដែរ ៕
ចែករំលែកព័តមាននេះ