រាជធានីភ្នំពេញ ៖ ទីតាំងស្តុក ជើង និងស្លាបមាន់អត់ច្បាប់ របស់ក្រុមហ៊ុន ហេង វីរៈសុខ ត្រូវបានគណៈកម្មាធិការប្រយុទ្ធប្រឆាំងផលិតផលក្លែងក្លាយ ដែលមានហានិភ័យខ្ពស់ដល់សុខភាព និងសុវត្ថិភាពសង្គមចុះត្រួតពិនិត្យដោយជាប់សង្ស័យមានប្រើសារជាតុគីមី ដែលជាហេតុប៉ះពាល់ដល់សុខភាពប្រជាពលរដ្ឋ។ ទោះបីជាយ៉ាងណា បន្ទាប់ពីត្រួតពិនិត្យ អស់រយៈពេលជាច្រើនម៉ោង សមត្ថកិច្ចអះអាងថា មិនមានជាតិគីមីឡើយ ហើយដកថយវិញ ដោយគ្រាន់តែយកស្លាប និងជើងមាន់មួយចំនួនទៅពិនិត្យបន្តទៀត តែប៉ុណ្ណោះ។
ប្រតិបត្តិការនេះធ្វើឡើង នៅរសៀលថ្ងៃទី១៤ ខែវិច្ឆិកា ឆ្នាំ២០១៧ នៅទីតាំងសិប្បកម្មផលិតស្តុកទុកចំណីអាហារ ស្ថិតនៅផ្ទះគ្មានលេខ នៅផ្លូវមាត់ប្រឡាយទឹកស្អុយ សង្កាត់បឹងសាឡាង ខណ្ឌទួលគោក ក្រោមការដឹកនាំដោយលោកឧត្តមសេនីយ៍ត្រី ទូច យុទ្ធា អនុប្រធានលេខាធិការដ្ឋានប្រយុទ្ធប្រឆាំងផលិតផលក្លែងក្លាយ ដែលមានហានិភ័យខ្ពស់ដល់សុខភាព និងសុវត្ថិភាពសង្គម និងជាប្រធានក្រុមប្រតិបត្តិការពិសេសក្រសួងមហាផ្ទៃ និងមានការសម្របសម្រួលពីលោក ងិន ពេជ្រ ព្រះរាជអាជ្ញារងអមសាលាដំបូងរាជធានីភ្នំពេញ ព្រមទាំងមានការចូលរួមពីអាជ្ញាធរ និងសមត្ថកិច្ចជំនាញផ្នែកស្តង់ដា និងកាំកុងត្រូលផងដែរ។
តាមព័ត៌មានឲ្យដឹងថា ដោយមានការស្រាវជ្រាវ តាមរយៈរថយន្តដឹក ជើង និងស្លាបមាន់ សមត្ថកិច្ចក៏ឈានទៅឆែកឆេរទីតាំងស្តុកនេះតែម្តង។ បន្ទាប់ពីត្រួតពិនិត្យសមត្ថកិច្ចរកឃើញមានស្លាប និងជើងមាន់ជាច្រើនតោន ដែលស្តុបទុក និងមានធំក្លិនស្អុយ។ បន្ទាប់ពីមានការត្រួតពិនិត្យសមត្ថកិច្ចជំនាញអះអាងថា ជើង និងស្លាបមាន់ទាំងនោះមិនមានការប្រើប្រាស់ជាតិគីមីឡើយ។ តាមប្រជាពលរដ្ឋ ដែលរស់នៅកន្លែងកើតហេតុ បានឲ្យដឹងថា ទីតាំងខាងលើបានលួចនាំចូលជើង ស្លាបមាន់ខូចគុណភាពពីប្រទេសជិតខាង មកលក់នៅទីផ្សារនានាក្នុងរាជធានីភ្នំពេញ ហើយកន្លងមកគេឃើញទីតាំងនោះចេញចូលដោយបិទទ្វារ។ មិនតែប៉ុណ្ណោះ ទីតាំងស្តុកស្លាបមាន់ នៅក្បែរប្រឡាយទឹកស្អុយ ហាក់ដូចជាពុំសមស្របនិងមានច្បាប់អនុញ្ញាតឡើយ។ បន្ទាប់ពីត្រួតពិនិត្យ សមត្ថកិច្ចក៏បាននាំយកស្លាប និងជើងមាន់មួយចំនួន ទៅត្រួតពិនិត្យនៅក្នុងមន្ទីរពិសោធន៍បន្តទៀត៕
ចែករំលែកព័តមាននេះ