រាជធានីភ្នំពេញ ៖ គិតត្រឹមវេលាម៉ោង០៥ និង០៥នាទីល្ងាច ថ្ងៃទី១៦ វិច្ឆកា នេះ បន្ទាប់ពីបើកសវនកាអស់រយៈពេលពេញមួយថ្ងៃរួចមក តុលាការកំពូលបានសម្រេចចេញដីការំលាយគណបក្សសង្គ្រោះជាតិ និងគណៈកម្មាធិការនាយកនៃគណបក្សសង្គ្រោះជាតិ១១៧នាក់ ព្រមទាំងទីប្រឹក្សាម្នាក់ឲ្យផ្អាកសកម្មធ្វើនយោបាយរយៈពេល៥ឆ្នាំផងដែរ។
គួរបញ្ជាក់ថា កាលពីវេលាម៉ោង០៨ និង៤០នាទីព្រឹកថ្ងៃទី១៦ វិច្ឆិកា ដដែលនេះ តុលាការកំពូល បានបើកសវនាការជាសាធារណៈលើបណ្តឹង «រំលាយបក្សសង្គ្រោះជាតិ» ដោយមានចៅក្រម៩រូប ដឹកនាំដោយលោក ឌិត មុន្ទី និងតំណាងមហាអយ្យការមួយរូប ក្រឡាបញ្ជីមួយរូប និងមានមេធាវីដើមបណ្តឹងមាន៤រូប ។
នៅក្នុងអង្គសវនាការ គឺមិនអនុញ្ញាតឱ្យថតសំឡេង និងថតរូបភាពទេ ហើយអ្នកចូលរួមតាមដានអាចកត់ត្រាបាន ។
លោក គី តិច មេធាវីតំណាងឱ្យក្រសួងមហាផ្ទៃបានថ្លែងថា ប្រធានក្រុមប្រឹក្សាតុលាការកំពូលសម្រេចរំលាយបក្សសង្គ្រោះជាតិចាប់ពីថ្ងៃនេះតទៅ ។ តុលាការកំពូល ក៏បានសម្រេចហាមឃាត់ថ្នាក់ដឹកនាំបក្សនេះចំនួន១១៨រូបរយៈពេល៥ឆ្នាំ មិនឱ្យធ្វើសកម្មភាពនយោបាយ ចាប់ពីថ្ងៃប្រកាសសាលដីកានេះតទៅ ។ សេចក្តីសម្រេចនេះ បិទផ្លូវតវ៉ាទាំងស្រុង ៕
ចែករំលែកព័តមាននេះ