ផលិតកម្មអាភៀនកើន87%
ប្រទេសអាហ្វហ្គានីស្ថាន ៖ យោងតាមតួលេខចុងក្រោយនៃការសិក្សាមួយចេញផ្សាយនាថ្ងៃទី១៥ វិច្ឆិកា ដោយការិយាល័យ អ.ស.ប ប្រឆាំងគ្រឿងញៀន និងឧក្រិដ្ឋកម្ម ONUDC និងក្រសួងតស៊ូប្រឆាំងគ្រឿងញៀនអាហ្វហ្គានីស្ថានថា…
ប្រទេសអាហ្វហ្គានីស្ថាន ៖ យោងតាមតួលេខចុងក្រោយនៃការសិក្សាមួយចេញផ្សាយនាថ្ងៃទី១៥ វិច្ឆិកា ដោយការិយាល័យ អ.ស.ប ប្រឆាំងគ្រឿងញៀន និងឧក្រិដ្ឋកម្ម ONUDC និងក្រសួងតស៊ូប្រឆាំងគ្រឿងញៀនអាហ្វហ្គានីស្ថានថា រវាងឆ្នាំ២០១៦ និង២០១៧ ផលិតកម្មអាភៀននៅអាហ្វហ្គានីស្ថានមានការកើនឡើងដល់ទៅ៨៧% ឡើងដល់កម្រិតខ្ពស់ជាឯតទគ្គកម្ម៩.០០០តោន ។
តាមការសិក្សានេះផ្ទៃដីដាំអាភៀនក៏កើនឡើងខ្លាំងជាឯតទគ្គកម្មដល់៣២៨.០០០ហិកតា ដែរក្នុងឆ្នាំ២០១៧ ដែលមានការកើនឡើង៦៣% បើប្រៀបធៀបនឹង២០១.០០០ហិកតា កាលពីឆ្នាំ២០១៦ ។
នាយកប្រតិបត្តិរបស់ ONUDC លោក YURY FEDOTOV ក្នុងសេចក្តីប្រកាសមួយថ្លែងថា ដល់ពេលសហគមន៍អន្តរជាតិ និងប្រទេសអាហ្វហ្គានីស្ថានផ្តល់អាទិភាពឡើងវិញដល់ការត្រួតពិនិត្យគ្រឿងញៀន ហើយទទួលស្គាល់ថា ប្រជាជាតិនីមួយៗត្រូវចូលរួមទទួលខុសត្រូវលើបញ្ហាពិភពលោកនេះ ។
ការកើនឡើងនៃផលិតកម្មអាភៀនបណ្តាលមកជាពិសេសការបង្កើនផ្ទៃដីដាំអាភៀន ព្រមទាំងការបង្កើនទិន្នផលអាភៀនក្នុង១ហិកតា ។ ទិន្នផលកើនខ្ពស់គឺនៅតំបន់ភាគខាងត្បូងប្រទេស ដែលនៅទីនោះទិន្នផលមធ្យមកើន១៩% ហើយនៅតំបន់ភាគឦសាន ទិន្នផលកើន១៤% ។
ប្រទេសអាហ្វហ្គានីស្ថានជាប្រទេសដាំអាភៀនធំជាងគេលើពិភពលោក ដែលអាភៀនត្រូវចម្រាញ់ទៅជាហេរ៉ូអ៊ីន ។ កម្រិតខ្ពស់បំផុតនៃផលិតកម្មអាភៀន និងដំណាំអាភៀនក្នុងឆ្នាំ២០១៧ បង្កើតការប្រឈមជាច្រើនសម្រាប់ប្រទេស បណ្តាប្រទេសជិតខាង ព្រមទាំងប្រទេសឯទៀតៗជាច្រើនដោយសារការបញ្ជូនឆ្លងកាត់ ឬជាគោលដៅនៃទីផ្សារអាភៀន អាហ្វហ្គានីស្ថាន ។
ដោយសារអាភៀនអាហ្វហ្គានីស្ថានមានគុណភាពខ្ពស់ ហើយមានតម្លៃក៏ទាប ញ៉ាំងឱ្យមានកំណើននៃអ្នកសេពគ្រឿងញៀន ហើយបង្កផលវិបាកដ៏អាក្រក់នានា ៕
ចែករំលែកព័តមាននេះ