រាជធានីភ្នំពេញ ៖ យុវជនម្នាក់ត្រូវរថយន្តមួយគ្រឿងបានកៀរទាក់ដៃចង្កូត បណ្តាលឲ្យដួលបោកក្បាលសន្លប់មួយសន្ទុះ ខណៈពេលដែលជិះម៉ូតូមួយគ្រឿង ។ បន្ទាប់ពីបង្កគ្រោះថ្នាក់រថយន្តបង្កបានបើកគេចខ្លួនបាត់ ។
គ្រោះថ្នាក់ចរាចរនេះបានកើតឡើងកាលពីវេលាម៉ោង១០និង៣០នាទីព្រឹក ថ្ងៃទី១៦ ខែវិច្ឆិកា ឆ្នាំ២០១៧ នៅតាមវិថីកែវចិន្តា ក្បែរភូមិគ្រឹះរបស់លោក ញឹក ប៊ុនឆៃ ក្នុងភូមិ៣ សង្កាត់ជ្រោយចង្វារ ខណ្ឌជ្រោយចង្វារ ។
យុវជនរងគ្រោះឈ្មោះ លាង ផេង អាយុ២២ឆ្នាំ ជាសិស្សវិទ្យាស្ថានបច្ចេកទេសព្រះកុសុៈមៈ មានទីលំនៅក្នុងខណ្ឌច្បារអំពៅ បានរងបួសក្បាល និងដៃ សន្លប់មួយសន្ទុះធំ រួចដឹងខ្លួនវិញ ។
តាមព័ត៌មានបានឲ្យដឹងថា នៅមុនពេលកើតហេតុ គេឃើញជនរងគ្រោះបានជិះម៉ូតូម៉ាកវ៉េវ ពណ៌ខ្មៅមួយគ្រឿងពាក់ស្លាកលេខ ភ្នំពេញ ១DD-៨៥៧៤ មួយគ្រឿងតែម្នាក់ឯង ធ្វើដំណើរតាមវិថីកែវចិន្តា ក្នុងទិសដៅពីកើតទៅលិច ។ នៅពេលធ្វើដំណើរមកដល់កន្លែងកើតហេតុ ស្រាប់តែមានរថយន្តមួយគ្រឿង ពណ៌ប្រផេះ ធ្វើដំណើរក្នុងទិសដៅច្រាស់ទិសគ្នា ហើយបើកមកទាក់ដៃចង្កូតម៉ូតូ បណ្ដាលឲ្យដួលបោកក្បាលសន្លប់តែម្តង ។
តាមព័ត៌មានបានឲ្យដឹងទៀតថា បន្ទាប់ពីបង្កគ្រោះថ្នាក់រថយន្ត ដែលគេដឹងថា ពាក់ស្លាកលេខ ភ្នំពេញ ២AE-៤៦៥០ បានបើកឡើងស្ពានជ្រោយចង្វារគេចបាត់ ៕
ចែករំលែកព័តមាននេះ