រាជធានីភ្នំពេញ ៖ អតីតតារាចម្រៀងដែលបច្ចុប្បន្នកំពុងស្ថិតក្នុងស្បង់ចីវរ គឺភិក្ខុសង្ឃឆោម ប៊ុនយ៉ុង បានវិលត្រឡប់មកពីប្រទេសបារាំងវិញហើយកាលពីដើមខែនេះ បន្ទាប់ពីបានទៅសម្រាកព្យាលជំងឺនៅក្រៅប្រទេសអស់រយៈពេល៣ឆ្នាំ ។ ការវិលមកកាន់ទឹកដីកំណើតរបស់ភិក្ខុឆោម ប៊ុនយ៉ុង…
រាជធានីភ្នំពេញ ៖ អតីតតារាចម្រៀងដែលបច្ចុប្បន្នកំពុងស្ថិតក្នុងស្បង់ចីវរ គឺភិក្ខុសង្ឃឆោម ប៊ុនយ៉ុង បានវិលត្រឡប់មកពីប្រទេសបារាំងវិញហើយកាលពីដើមខែនេះ បន្ទាប់ពីបានទៅសម្រាកព្យាលជំងឺនៅក្រៅប្រទេសអស់រយៈពេល៣ឆ្នាំ ។
ការវិលមកកាន់ទឹកដីកំណើតរបស់ភិក្ខុឆោម ប៊ុនយ៉ុង មិនទាន់មានគោលបំណងណាមួយ ដើម្បីលាចាកសិក្ខាបទនៅឡើយទេ ដោយសារតែលោកកំពុងតែលង់ទៅនឹងព្រះធម៌ដែលធ្វើឲ្យមានចិត្តស្ងប់។
លោកសុះ ម៉ាច ដែលជាមិត្តភក្តិស្និទ្ធស្នាលរបស់ភិក្ខុឆោម ប៊ុនយ៉ុង ឱ្យដឹងថា បន្ទាប់ពីនិមន្តពីប្រទេសបារាំងក្រោយពីទៅគង់នៅទីនោះអស់រយៈពេលជាង៣ឆ្នាំសម្រាកព្យាបាលព្រះហស្តដែលបាក់ដោយសារគ្រោះថ្នាក់ចរាចរណ៍នៅខេត្តព្រះវិហារ ពេលនេះបាននិមន្តមកកាន់មាតុប្រទេសវិញហើយ ។
ដោយសេចក្តីនឹករលឹកគ្នាកាលនៅជាមិត្តក្នុងអាជីពសិល្បៈ ព្រះតេជគុណឆោម ប៊ុនយ៉ុង (អតីតតារាចម្រៀង និងសម្តែង)ក៏និមន្តទៅផ្ទះលោកសុះ ម៉ាច ហើយលោក និងភរិយាប្រគេនចង្ហាន់ និងបច្ច័យខ្លះដល់ព្រះអង្គ ។
បើតាមលោកសុះ ម៉ាច នេះជាការសាងភ្នួសលើកទី២របស់ព្រះតេជគុណឆោម ប៊ុនយ៉ុង ដែលគិតរហូតមកដល់ពេលនេះមានរយៈពេលជាង៤ឆ្នាំមកហើយ ។ លោកសុះ ម៉ាច បានសាកសួរព្រះតេជគុណឆោម ប៊ុនយ៉ុង ពីពេលវេលាដែលលាចាកសិក្ខាបទ ប៉ុន្តែព្រះអង្គមានថេរដីកាថា មិនទាន់ដឹងទេព្រោះមិនទាន់អស់និស្ស័យនឹងព្រះធម៌នៅឡើយ ។ ភិក្ខុឆោម ប៊ុនយ៉ុង អាចនឹងទៅគង់នៅវត្តមួយក្នុងខេត្តកំពង់ចាម ទីដែលលោកធ្លាប់បួសនៅទីនោះ។ ព្រះអង្គគ្រោងនឹងធ្វើពិធីបុណ្យឆ្លងដើមពោធិ៍ដែលនាំពីប្រទេសស្រីលង្កា និងបានដាំនៅទីវត្តដែលលោកគង់នៅទីនោះផងដែរ ។
លោកសុះ ម៉ាច បញ្ជាក់ថា បើទោះបីជាពេលនេះភិក្ខុឆោម ប៊ុនយ៉ុង នៅតែគ្រងស្បង់ចីវរនៅឡើយ ប៉ុន្តែបើនិយាយពីនិស្ស័យក្នុងសិល្បៈនោះគឺលោកនៅតែមាន តែដោយសារលោកលង់នឹងព្រះធម៌ច្រើនជាងនោះ ទើបធ្វើឲ្យលោកមិនទាន់មានបំណងលាចាកសិក្ខាបទនៅពេលណា ។
បើតាមលោកសុះ ម៉ាច ប្រសិនបើភិក្ខុឆោម ប៊ុនយ៉ុង លាចាកសិក្ខាបទនៅពេលណានោះលោកនឹងវិលចូលវិស័យសិល្បៈចម្រៀងវិញ ព្រោះលោកនៅតែមានចិត្តស្រឡាញ់។ លោកនៅតែទទួលយកការស្នើសុំទៅច្រៀងពីបណ្តាស្ថានីយទូរទស្សន៍នានាដដែល ប្រសិនបើទស្សនិកជននៅតែគាំទ្រ ។ ករណីដែលលោកវិលរកអាជីពចម្រៀងវិញនោះ ទាមទារឲ្យលោកហាត់រៀនឡើងវិញ ព្រោះបច្ចុប្បន្នលោកគិតតែរៀនទន្ទេញធម៌តែមួយមុខប៉ុណ្ណោះ ៕
ចែករំលែកព័តមាននេះ